SADEONG 115
115
Nggaalano ko Mian Bisa Mobabasal Konakuasa
1Bolikon kami, oh Temeneno, bolikon kami,
tongo Ikoo komo ngginaal,
sabab Ikoo tataap meseseang tukon setia.
2Bulaando kobangsa-bangsa mosio nabantile,
“Inaandoo konapo Mian Bisa?”
3Konda Mian Bisa daano doi surgaa,
Yana lakukanggene oilamo Kona inias.
4 #
Sad. 35:15-18; Ink. 9:20 Konapo uuno luwedoi mosoni tukon suasa,
banggapi komo kubaiyo.
5Daano kobabano, bai aki namoola basilingan,
daano komatano, bai aki namoola kitayo kolangge-langge.
6Daano kotolingaino, bai aki nalengele kolipu,
daano kosoongano, bai aki namoola nomiiyo kolangge boono.
7Daano kolimano, bai aki namoola mopulut langge,
daano koaino, bai aki namoola ambakon,
tukon akiyo koalalo motobuat luwedoi kokoyoko.
8Boliisi nabunodoiya konanasib komian mokubaiyo,
tukon sasaibino komian moanggayo douunodoo.
9Eh ko Israel miano pomoini doi Temeneno,
Yanamo komo tulungiyo tukon lindungiyo komuyu.
10Eh sasaibino komian, pomoini doi Temeneno,
Yanamo komo tulungiyo tukon lindungiyo komuyu.
11Eh sasaibino komian momatakutene ko Temeneno, pomoini doi Temeneno,
Yanamo komo tulungiyo tukon lindungiyo komuyu.
12Ko Temeneno neneeke kita tukon balakaatiyo kita,
Yana naikon balakaatiyo ko Israel miano
tukon sasaibino koimam moluwedoi Harun nakaturunan.
13 #
Ink. 11:18, 19:5 Yana naikon balakaatiyo komian momatakutene ko Temeneno,
mau mopoipoisik maukai mobabasal.
14Boliisi ko Temeneno nabeena pau mobadaang,
doi komuyu tukon mukaturunan.
15Boliisi ko Temeneno nabalakaati komuyu,
mopasitakayo kotimbu tukon buta!
16Ko timbu daanokai Temeneno koona,
bai kodunia Yana beekene doi banggapi.
17Komian momate aki nanggaale ko Temeneno,
sabab yanila obuluso doi lipu mokiis.
18Bai kita mo tubo basukuur doiya-Na,
diabudodoo polong sidutu-posidutukon.
Tanggaalokai ko Temeneno!
Currently Selected:
SADEONG 115: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
