ANDEAN 22
22
1Sambu monondok lobian koanggano luwedoi buat momadaang;
lobian monondok mian seseange luwedoi mobine suasa tukon mosonii.
2Komian mokaasa tukon mian motalalais daanong komeeng kolangge mopokakana;
Temenenokai moposilakayo yanila saibino.
3Komian momamangan konapikiran badodonggon kalukai kitayo kosilakaan;
komian longos ampakon bangadudul maka ilupa kasusahan.
4Komian momangga doi Temeneno tukon kependeo kobutonggo,
naikon monondok, makmur tukon inodotii.
5Talong tukon palako talaat doi mian molokis naloloon;
dedenggene saibino doiya kalu ikoo yase mosalamat.
6Otunggulekai meeng kopau cara tuboan mobisa tuuk doiyana,
maka polong doi tempo nalakaian yana naikon tubo bunodoiya.
7Komian motalalais mian mokaasa kuasaiyo;
komian mobabinggat kinuasai luwedoi mobinggotiyo.
8Komian momotifas kolokisan naikon pupuiyo kokasuhan;
doibundu kona kuasa tuuk lakukene todu-todudulo naikon lapus.
9Komian monondok konoano Temeneno balakaatiyo,
sabab yana ebese komokinaan doi mian mokakulangan.
10Sikayomokai komian moyase batotulai,
maka tademokai kopasalakonan,
pomusuwan tukon pososibolian.
11Komian moyase kototobosan tukon momaamis kona silingan,
naikon teali tomundo nasobat.
12Tukon bongkale kobakakalaan mian molokis,
Temeneno dagaiyo sulano komotoiyan mobisa tataap topiala.
13Sipamalas yase dongol doi bonua;
yana bantil, “Daano kosinga doi tonggulung,
yaku bisa mosinoku doi loloon tangano.”
14Boine mobabalowa nalayuan bunokai patalonggon;
mian mo Temeneno moukume tepelesok doilalomo.
15Kanamokai pau-pau mokubai langge-langge molongas,
bai bonggon moola naajale yanila naboliyo kona kalakuan.
16Indee komo yase teali kaasa
tukon pipike komian motalalais
tukon beena palasen doi mian modaano
doi bundu naikon talalais.
Talu kolono kootunggul mian mopandoi
17Ndongoliyokai yaku naikon otunggule doi komuyu otunggul mian mopandoi! Palatikanggenekai daku otunggul. 18Ikoo naikon sanaang kalukai daku otunggul doo ikoo abese doi noamo lalomo. Sabab tukon buno doiya ikoo siapo kalukai ikoo naikon mopakeyo. 19Yaku otunggulikene diabudodoo doi komuyu sabab yaku yase ikoo momangabos mumangganggaan doi Temeneno. 20Tolukolono kootunggul molapamo kutulise tuuk ikoo – otunggul-otunggul koantoko montoiyan tukon otinau momonondok; 21tukon naikon mootunggulikene doi komuyu oila komo bisa-bisa kana. Totiili, kalu ikoo sinadai, ikoo moola beena potimbili mokana.
–1–
22Inaikai muloingiyo komian motalalais, tolongo sabab yana akiyono kona daya; tukon doi sidang Pangadilan Inakai mopalakosayo komian moakiyo kona daya. 23Sabab Temeneno naikon belayo yanila kopalakala tukon kibute komian ansaang tukon pipike yanila.
–2–
24Inaimo balagaul tukon mian moiyase nggimal tukon mosobit liba kosau. 25Totili ikoo naikon kitayo yana, tukon akimo nateali koidan lapusene kabiasaandoo.
–3–
26Inaikai mopalandandi tuuk motanggunge komian bailon nasamea. 27Totiili kalu ikoo aki namoola olunasio, komu, tampat mooloan kai naikon inala.
–4–
28Inaikai idan-idan mobiyele buta kallatano molapamo kotumbumuyu tataap kanggene.
–5–
29Anomokai ko mumongkitaan mian mo pandoi lakukene kona limang? Doi mianoo naikon balimang doi tomundo-tomundo nakamali bolikon doi bonua mian mo biasa.
Currently Selected:
ANDEAN 22: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
