FILIPI 4
4
Pongotunggul-pongotunggul
1Tobikon doiya! Utus-utusonggu mo sineang, bunomo doiya siokai potubo tukon tutuu mangangga doi Temeneno. Konoanggu poloonggene doikoo! Komuyumo daku binanggaakon mo kubaiyo yaku laba-laba.
2Utus boine Euodia tukon Utus boine Sintike! Yaku kabiyo tukon tutuu sulano Utus boine pomeenggon noa buno komian mo pokakana kona manganggaan. 3Doi tulanggu mosetia, yaku kabiyo koidan sulano Utus natomboniiyo boinedoo molua. Yanila lapamo balimang tuuno polaing yaku tuuk doi babotilangganano ko Bilita Monondok doi Mian Bisa; pokakana buno Klemen tukon kokabuson komian bailon mo balimang polaing-laing yaku. Yanila sambu-sambuno daanomo doi Buku Mian Mo Tubo lalomo.
4Boliisi posidutu labakene sabab komuyu lapamo tubo pomeenggon tukon Temeneno. Daano koidan yaku bantile: palabakene!
5Siokai sasaibino komian moola kitayo komu ndondoong doi namonondokan konoamu. Sabab akimo namalumbit koidan ko Temeneno naikon lubato. 6Inai momolili tentang oilamo. Doi sasaibino kolangge, posambeang tukon pelenggene komu kakabi doi Mian Bisa. Oila kopopinalaluu, pailukene doiya sidutu doi Mian Bisa tukon mangkabi kinatauwan. 7Maka ko Mian Bisa namonondokan mo aki namoola kobanggapi mangalatikene, naikon dagaiyo konoamu tukon mupikiran mo lapamo pomeenggon tukon Kristus Yesus.
8Doibundu, Utus-utus, usokiyomo komu pikiran tukon langge-langge mo daano koanggano, mo moola ngginaal, doiyamo langge-langge mo bisa, mo inodotii, mo adil, molino, maamis, tukon momonondok. 9Ampakonggenemo oila kopopinalajari komuyu motarimayomo doi yaku; mau doi bantilan-bantilan mau doi yaku kukokubai-kokubai. Kona monondokan uuno doi Mian Bisa, naikon loolainge komuyu.
Bakinatauwanan
10Doi kutuboan lalomo yaku pomeenggono tukon Temeneno, yaku rasayo sanaang tuuno, sabab lapamo buno doiya kona kalumbit, diabudodoo komuyu moolamo koidan pikikene daku ndondoong. Daku makisuut bolikono baikon komuyu motolimingganakumo; komuyu siokai popalaatikanggene yaku, bai komuyu aki pomalaat todanan sulano potudoikene. 11Yaku mantailukene naiya bolikon sabab yaku kakurangano, sabab yaku lapamo palajario komarasaan mobiai tukon oila komo daano. 12Yaku lapamo toupiyo kotuboan mobadaang kokakurangan, tukon koidan kotuboan molobi-lobian. Yaku lapamo tingoniiyo korahasiano tuuk doi sasalaano kokaadaan mau doi nabulaandoan kai koidan; maukai keadaan mocukup maukai keadaan motalalais, mau ndondoong molobian mau ndondoong mokakulangan. 13Tukon kuasa Kristus mo bineekon doi yaku, yaku malaat kobukuanan tuuk doi sasalaano kobula-bulaa kokaadaan.
14Bai komuyu lapamo tulungiyo yaku doi kususaan lalomo; tukon oila dopokinubaidoo bisa monondok. 15#2Kor. 11:9 Utus-utus Filipi miano! Komuyu susuumuyu toiyo bisa baikon salataa yaku tinggale ko Makedonia loolukoo doi tempo do Bilitadoo Monondok yaku mobabotilanggene tumbeno, komuyumokai komemeeng kojemaat mo bantuwe yaku; kotumbe-tumbeno morasa kanggene kountung tukon rugi polaing-laing yaku. 16#Kis. R. 17:1 Salataa yaku doi Tesalonika tukon mapalaluu sambungan, lobiano idan luunggon pomakapatu sumbangan potombonii doi yaku. 17Doiya koartino bolikon yaku tongo yase mantalima mobineekon. Daku yasano doiyamo sulano kumoola kitayo kohasil-hasil mo suungiyo komu kountungan. 18#Tob. 29:18 Yaku lapamo talimayo sasaibino – tukon lobian doi nasukupan! Sasaibino koposumbangan komuyu mokapatuwe doi yaku, yaku lapamo talimayo doi Epafroditus. Diabudodoo daanomo sasaibino daku pinalaluu. Dosumbangan-sumbanganoo moluwe doi komuyu buno boono mobabangi doi sosuba mo sinosubakon doi Mian Bisa tukon Mian Bisa mo talimayo tukon noa sanaang. 19Mian Bisa mo yaku mososubaiyo kona kaasaan tokita doi Kristus Yesus lalomo tukon naikon daanokene sasaibino komu kapalaluuwan. 20Nggaale ko Mian Bisa Tamanggita sidutu-posidutukon! Amin.
Teteba napupusan
21Pelenggene daku teteba doi sasaibino ko Mian Bisa namian mo pemeenggono tukon Kristus Yesus. Tukon talimayo koidan nateteba doi utus-utus mo daano polaing-laing yaku naimbaa. 22Sasaibino ko Mian Bisa namian doi kota nia, utamano yanila moluwedoi Tomundo naistana, daano yanila momakapatu teteba doi komuyu.
23Boliisi Temeneno Yesus Kristus nabalakaatiyo Utus sasaibino.
Komai Hormat, Paulus tukon Timotius
Currently Selected:
FILIPI 4: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
