FILIPI 3
3
Nabisaan tuuno
1Doibundu, Utus-utusonggu, siokai komuyu popolaba-labakon sabab komuyu lapamo pomeenggon tukon Temeneno. Yaku aki kurasayo babalat motulise koidan oila komo lapamo yaku tulise doikoo doi tumbenodoo; sabab langgedoo monondok tuuk mukasalamatan. 2Podaga-dagaiyo ko mian-mian mo kubaiyo kolangge-langge mo lokis sabab domianoila moola nasinombuikon ‘asu’. Yanila pakisaayo komian sulano nasinunat. 3Banggokai kitamo komian mo lapamo mantalima sunat mo tutuu, bolikon yanila. Kita sosuba doi Mian Bisa tukon Mian Bisa Na Roh susuungo komo lolainge, tukon kita basukuur sabab kita tubo pomeenggon tukon Kristus Yesus. Kita aki ndabataani doi bakolobokian-bakalobokian dunia koona. 4Kona tutunan maukai yaku moola bataani doi bakolobokian-bakolobokianoo. Sabab kalu daano komeeng komian mobantile yana daano kona alasan tobikon nataaniyo dobakolobokianoo dunia koona, yaku lobiyoniiyo koidan yana. 5#Rm. 11:1; Kis. R. 23:6, 26:5 Yaku sinunat salataa alumo kooloyo daku umur. Yaku sinuung buno Israel miano, doi suku bangsa Benyamin; yaku Ibrani miano tuuno. Doi taatiyano koukum-ukum agama Yahudi, yaku meengkai koanggota golongan Parisi. 6#Kis. R. 8:3, 22:4, 26:9-11 Yaku taaniyo tutuu doukum agamadoo tobikon doiya yaku lokis-lokise kojemaat. Kalu kinita doi segi ukum agama Yahudi, yaku meeng komian monondok mo akiyo kososiboliino. 7Bai sabab Kristus, maka doi mololukoo sasaibino yaku anggape buno meeng kolobo mo daano kountungo, diabudodoo teali meeng kolobo momorugikon. 8Bolikonkai talongo dolangge-langgedoo mobinantil; baikai doiya sasaibinomo yaku anggape buno langge-langge molubatene kokorugian. Komo daano doi yaku diabudodoo nia lobian koanggano: doiyamo tingoniiyo Kristus Yesus, daku Temeneno. Sabab Kristus doiya sasaibino lapamo yaku lapaase. Yaku anggape sasaibino doiya buno limbut, sulano tobikon doiya yaku kakaate sulano kulaate Kristus, 9tukon tutuu pomeenggon tukon Yana. Kopotaamian mo monondok tukon Mian Bisa aki koidan kuusahakanggene susuunggu bai tolongo yaku taat doi ukum agama. Diabudodoo yaku daano potaami tukon Mian Bisa, sabab yaku anggayo ko Kristus. Jadi dopalaamianoo momonondok lubat doi Mian Bisa, tukon konadasar kita mangangga doi Yesus Kristus. 10Tukon koidan daku iniyas doiyamo sulano kutingoniiyo ko Kristus, tukon sulano kualamiyo kokuasa mo otobuiyo yaku kokoidan luwedoi matean. Yaku yase turut susa tukon Yana tukon teali pokakana buno Yana doi Namatean. 11Tukon yaku moinikene baikon yaku susuunggu naikon abali inotuboi doi kumatean.
Ndalaate kotujuan sio ndaobulen
12Yaku aki kubantile baikon yaku berhasilo, kai yaku monondoko. Bai yaku kai momeenggon kakaate sulano kulaate kotambo Kristus Yesus molapamo sadiayo. Tuuk doiya Yana lapamo laate yaku tukon tealikene yaku koona-Mo. 13Kona bisaan, Utus-utus, yaku tutuu baikon aki kurasayo yaku moberhasilo tukon momalaato tambo. Bai naikon daano komeeng kolangge yaku komo kubaiyo, doiyamo yaku toliminggene oila komo daano doi tonggulunggu tukon kakaate tuuno momalaat oila mo daano doi salaanggu. 14Doiya kona sabab yaku obulen banggadudul polong doi napupusan sulano kulaate kokemenangan, doiyamo tuboan doi surgaa; tobikon doiya ko Mian Bisa uange kita lolo doi Kristus Yesus.
15Kita sasaibino mototoboso doi secara rohani, siokai koposikap nabuno doiya. Bai kalu doi antara komuyu daano komo daano konapandapat bailonggon, maka ko Mian Bisa naikon jelaskanggene koidan doikoo. 16Maukai nalangge nia siokai napinalaatikanggon: Kita sio ndatataap tubo turutiyo koaturan mo lapamo kita taatiyo polong diabudodoo.
17 #
1Kor. 4:16, 11:1 Utus-utus sasaibino! Loingiyo daku kokubai. Kami lapamo beena tudoikene kokokubai mo kana, sabab doiya palatikanggene mono-monondok komian badaang mo loingiyo domai kokubaidoo. 18Yaku bubula moluunggon kupailukene doikoo, tukon diabudodoo yaku ulange koidan tukon kokiil, sabab baikon daanomo komian kona tuboan rusakemo koalatino Kristus momate sinempang. 19Komian natuboan mobuno doiya naikon pupus tukon doi nainakamanasan, sabab konapoila kona nainiyas tongo tuuk doi butongoila. Langge-langge mominamaakon, doiyamokai konapo binanggaakon; sabab yanila pikikene tongo langge-langge mo pokonoi tukon nadunia nia. 20Bai kita niakai mian-mian motongusokono doi Temeneno Nabatomundoan doi surgaa. Luwedoo koidan konda Temeneno Pasalamat doiyamo Temeneno Yesus Kristus, naikon lubat. Yanamo konda tinotiili tukon pinoloonggon. 21Butonggita mo muyuk tukon momoola manas nia, naikon Kristus boliiyo teali buno butongo susuungo mo moliyous. Yana moola kubaiyo doiya sabab Yana daano kona kuasa tuuk motaaluukanggene sasaibino kolobo.
Currently Selected:
FILIPI 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
