AYUB 27
27
Ayub
1-2Ayub banggadudukene konakatalangan, konabantilano,
“Tolongo Mian Bisa motubo, moaki nabeenggu kaadilan,
3Yaku batotopi: Ko Mian Bisa modanon mobeenggu ansaang,
doi nadaanoan koansaang doi butonggu lalomo,
4kosuunggu akimo naikon namabantilan-bantilan mokala,
koaleponggu akimo naikon nabantile kobakokoliian.
5Jadi, aki kuiyase bantile baikon komuyu kana;
yaku palataanggene sampe mate baikon aki kulokis.
6Yaku tataap bataani doi kumololean,
tukon konoanggu lalomoo sidutu bilisii.
7Boliisi dakumusuh nainukum salaku mian mopalalentel,
tukon nabinobokii dakulawan salaku mian molokis.
8Kai komian molokis daano konamoinian
doi tempo ko Mian Bisa natuntutano konaansaang?
9Kai ko Mian Bisa naikon lengele konakokiilan
kalukai kosusaan lubotiiyo yana?
10Siokai yana rindukanggene kosanaangan moluwedoi Mian Bisa,
tukon sambeang doi Yana aki nalasayo pakadak.
11Kuotunggulikene naikon komuyu kaliangano nababasalan ko Mian Bisa nakuasa,
kopopitoikene doi komuyu Mo Balakuasadoo natetel.
12Bai, komuyu sasaibino lapamo pokitayo susuumuyu,
Jadi, bulaando komuyu mobeena otinau moakiyo koalatino?”
Zofar
13Maka Zofar bantile,
“Bunonaiya ko Mian Bisa Mo Balakuasa natetel
naukumano komian modano konalalim tukon moaki nataat.
14Kalu badaang konapau, yanila naikon mate doi polobosian lalomo
tukon konapau tumbu naikon tubo daano konakakulangan.
15Konapau mototinggal, mate sabab panakit,
tukon kobalu-baluno aki nakokiiliyo yanila.
16Moolakai kona suasa nabadaang kotambuno
tukon naposusuni konapakean,
17bai suasa tukon pakeanoo sasaibino naikon teali
mian momoliyous konoano koona.
18Mian molokis nabonua manas buno loa-loa natelea,
tolongo bonua sementara buno mian badagai tenda.
19Yana nggenggela kobutongo salaku mian mokaasa,
bai yana aki nateali ulange,
salataa yana bangun luwedoi namooloan,
lapuso sasaibino konakaasaan.
20Komominatakuton lupayo
buno paisu eaba mososinggot lubat.
Mbombuul makansang doi tempo popook
puule tukon saakene yana nataus.
21Mbombuul tolopot bingkate yana,
tukon sapuwo luwedoi nabonua.
22Yana binupa akiyo koseang
tukon pakisaayo obulen mounggolii soopan.
23Konaotuwongan mian sambute tukon balaupan;
doiyayaa yana malaat totulai.”
Currently Selected:
AYUB 27: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
