AYUB 12
12
Ayub
1-2Ayub timbiliyo,
“Bisa, komuyu nia komo wakiliyo kobangkapi.
Kalu komuyu mate, komotoiyan naikon mate koidan.
3Mauyakukai bangkapi modaano konapikilan;
sasaibino dopobinantiloo yaku lapamo mangalatikene.
Koidan lakon, indee komoaki natoiyo sasaibino doiya?
Jadi, inai posangkayo komuyu liisiyo yaku!
4Tulanggu tukon sobat kokumbite yaku,
banggokai yaku nia bisa tukon akiyo kososiboliino.
Looluk ko Mian Bisa timbiliyo dakusambeang,
kalukai yaku nggeleamon mangkabi tulung.
5Komuyu totulaiyo komian mosilaka,
banggokai komutuboan daano moaman
komian mokabi otuwong komuyu bobokiiyo.
6Bai kopalambok natuboan aki nainotokuti;
mian mobarani lawane ko Mian Bisa tubo monondok.
Banggokai pilogot komo teali napoo moonggolan,
tolongokai nabukuanan susuungo.
7Masadaikene doi tomisi tukon iyayon bailonggon,
maka yanila naikon beena komuyu otunggul.
8Makabi katalangan doi sasaibino komo tubo doi buta tukon doi tobun,
maka komuyu matalima katalangan.
9Indee doi sasaibinoiladoo komo aki nasadariyo,
baikon komo pasitakayo yanila doiyamo Mian Bisa susuungo?
10Yana atule sasaibino komo tubo natuboan doi dunia;
Yana balakuasa doi samba kobangkapi naansaang.
11Buno aleponggu moyase matamis kinaan momonondok,
bunomokai doiya kotolingainggu yase mondongolii bantilan.
12-13Kobilitano, motoiyan daano doi mian momotuamo konatuboan,
bai komotoiyan tukon bukuanan daano tolong doi Mian Bisa.
Tolongo komotoiyan komo daano doi mian momotuamo konatuboan,
bai komotoiyan tukon kakuasaan daano tolong doi Mian Bisa!
14Oila Kona linombak akimo namoola kinokondong koidan,
indee komo tinaan aki namoola abali bebas.
15Yana pepete kopaisu, maka namotiis tukon motuul sasaibino;
Yana osodiiyo namololon, maka eaba namanase!
16Ko Mian Bisadoo bukuan, bukuan tukon tambongan!
Mobangakakon tukon motangakakon daano doi Yana nakuasa,
17Yana sabute sasaibino komokuasaiyo kopamarenta namotoiyan,
tukon sasaibino kokatua Yana tealikene langge mokinokumbit.
18Yana pusake kotomundo tukon Yana taane yanila;
19Yana rendah kanggene koimam-imam tukon sasaibino kotano-tano.
20Komian mopandoi basilingan yana tealikene aki nabiyok,
Yana sabute kopau-paulakai namotoiyan.
21Yana okimaayo komian mopaubakalingakon;
Yana alayo konapoo basambuan kuasano mobalakuasa.
22Yana kadiolongiyo kotampat-tampat mokalipookan tuuno
Yana sinariyo kombombokounomopook tuuno.
23Kobangsa-bangsa Yana tealikene momaju tukon monondok
maka Yana sakisaayo yanila sampe mate.
24Yana tealikene sasaibino kokatua bingung,
tobikon yanila lausala akiyo konatujuan.
25Yanila tataap doi kalipookan lalomo,
tukon tapa-tapasokon buno mian momalangukene komoiminum.
Currently Selected:
AYUB 12: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
