YESAYA 16
16
Ko Moab akiyono kona daya
1Luwedoi kota Sela doi padang gurun, kobangsa Moab makapatu domba pauno teali hadiah doi pamarentah Yerusalem.
2Ko Moab miano totiili doi Aruon Paisunobatango bibilo maka napo amba-ambakon bai yanila bingung pokakana kotomisi mosiniika luwedoi natelea. 3Tukon yanila bantile doi bangsa Yehuda, “Pobantilemokai oila komai linakukanggon. Tealikai mai soopan momomol doi oloyo namoonasan, tukon sobiiyomokai mai dungol doi musoopanoo. Kami nia mian modampas; sokanggamikai tukon inai moloilokisami. 4Pataikanggami momonumpang doimutano nia. Lindungikamikai luwedoi mian-mian moiyase akatekami.”
(Kopalailainggon tukon komangakatean naikon pupuso, tukon komian momanas tukon molailainggene kotano Israel naikon lapuso. 5Doibundu naikon daano komeeng komian moluwedoi Daud naturunan doiyamo naikon komo teali tomundo, tukon naikon yanamo komo parentayo kona bangsa tukon mamaasikene maka nasetia. Yana ekeenggele kokaadilan tukon mosobit mokubai tindakan mokakana.)
6Kobangsa Yehuda bantile, “Kami lengelemo tentang ko bangsa Moab nasombongan. Kami toiyo baikon yanila babanggaal tukon sombong. Konapo bantilan tongo bantilan moakiyo koantoko.”
7Tobikon doiya kobangsa Moab miano yanila pokokiili. Sobiiyomokai napo kokiil kalu yanila neneeke konapo kinaan momaamis doi kota Kir-Hareset. Sobiiyomokai napo putus asa tukon napo bakalaakon.
8Kokombung-kombung moloolani ko Hesybon tukon koanggur asi-asino doi Sibma linopumo kabus, koasi-asi mobiasa konahasil momonondok tuuno tukon tuuk doi mokuasaiyo kobangsa tukon kalu yanila inume teali yanila malangukene. Doiloolukonoo doanggur-angguroo asino bebelan polong doi kota Yaezer; tukon doi tolopot polong doi padang pasir, tukon taalikon talise polong doi Tobun Mate sembeleng. 9Budodoiya yaku kokiiliyo koanggur batango doi Sibma pokakana daku kokiiliyano ko Yaezer. Tokumbe komatanggu leelo tuuk doi Hesybon tukon Eleale, sabab konapo asi lololungguno musuh kaanemo kabus. 10Akiyokai komeeng komian molaba-laba doi kombung-kombungoo mosubur. Akiyono komeeng komian motolo-toloukon labaan kai momanyanyi doi anggur asino. Akiyono komo mopiis anggur sulano kopaisuno nakinubai anggur, yaku atadeyomo konapo wowookonan molaba. 11Manggadidi konoanggu tukon manasal tuuno konoanggu kalu kukitayo ko Moab ndondoongo tukon Kir-Heres. 12Ko Moab miano kakaate tuuno motoliboiyo kobunggul basosubakonan doi napo lipu bakaledaan tukon napo sambeangan, bai akiyo kotakoso.
13Doiyamokai koteteba doi loolukoo Temeneno mobeekene tentang doi Moab miano. 14Tukon budodoiya ko Temeneno bantile koidan : “Tapaat tolu kotaun koidan, sasaibino ko Moab miano nabuat yanila mobakiallakene naikon lapuso. Kona rayat mobadaang naikon tealimo soisik tukon muyuko.”
Currently Selected:
YESAYA 16: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
