RASUL-RASUL SALITANO 4
4
Petrus tukon Yohanes doi Pangadilan Agama salaano
1Daanoon Petrus tukon Yohanes mobasalita tukon dopai mianoo, imam-imam kapalano tukon komondan padagai Temeneno Na Bonua tukon Saduki miano lubat doi Petrus tukon Yohanes. 2Yanila nggimal sabab Petrus tukon Yohanes bantile doi mian baikon Yesus lapamo tubo doi namatean. Tukon doiya kobukutiino baikon komian momate naikon tubo koidan. 3Jadi yanila lakoyo doi Petrus tukon Yohanes maka usekene doi talunggu lalomo. Badungga mopopooko, Petrus tukon Yohanes daanoon motinaan loolukon polong modoakon. 4Bai komian mo lapamo molongol Petrus tukon Yohanes naotungguloo badaango komo mangangga. Jadi kona kadaang yanila tosuungi teali uga-ugaate lima koloon komian.
5Modoakon kolobo komo Pangadilan Agama, pamarenta-pamarenta tukon guru-guru agama yanila pototongi doi Yerusalem. 6Yanila ampakon pososuung tukon Hanas Imam Mobabasal, tukon Kayafas, Yohanes, Aleksandel, tukon sasaibino komian mo tongusokon imam babasal napuli. 7Petrus tukon Yohanes binaba namangadap doi yanila, maka yanila mansadai, “Bulaando kopo kubaiyano do mianoo molapit teali tangalin? Tukon bukuanan oilakai indee miano nakuasa komuyu molakukanggene doiya?”
8Petrus, mo inusokimo Mian Bisa Na Roh timbiliyo, “Tuan-tuan katua bangsa tukon Tuan-tuan anggota pangadilan agama! 9Kami pinalesa doi oloyo nia sabab kami mongkubai lobo momonondok tulungiyo komian molapit, tukon tobikon Tuan-tuan yase toiyo bulaando do mianoo nainalinan. 10Nah, Tuan-tuan sasaibino sio potoiyo tukon sasaibino kobangsa Israel sio natoiyo baikon namian nia budodoiya mokokondong tukon kobutongo sehat doi Tuan-tuan salaano, tobikon bukuan tukon kakuasaan moluwedoi Yesus Kristus Nasaretoo miano. Tuan-tuan lapamo sempanggene Yesus, bai ko Mian Bisa lapamo otuboiyo Yana koidan. 11#Sad. 118:22 Yesus naiyamo komo minakisuuti doi ayat nia doi Kitab Moliyous lalomo,
‘Batu mo aki natapake doi komuyu tukang-tukang bangunan,
tokita teali batu mo toloutama.’
12Tolongo luwedoi Yesus komian sinalamaton. Sabab doi posaapon kodunia doi antara banggapi akiyo komeeng komian kai mo malaat kakuasaan moluwedoi Mian Bisa sulano nasalamatene kita.”
13Anggota-anggota Sidang Pangadilanoo masainding mokitayo Petrus tukon Yohanes nabaranian, oila koidan yanila toiyo baikon do rasuloo molua daano mian biasa mo akiyo kona sikolah. Maka yanila sadal baikon do rasuloo molua daano mian mo polaing tukon Yesus. 14Bai yanila aki nanggoola mabantil oioila, sabab do mianoo mo lapamo tinangalinggon daano mokokondong idoo doi yanila salaano posinggat-singgat tukon Petrus maka Yohanes. 15Maka yanila sumboliiyo do rasuloo molua natobuat luwedoi luang sidangoo, doibundu yanila pobisalaikenemo. 16Yanila bantile, “Kita oila konda kubaiyano doi mian nia? Sasaibino komian mo dungol doi Yerusalem lapamo toiyo baikon mominasaindinggonoo mo luar biasa nia, yanila luaila komo kubaiyo. Kita aki namoola akiyenggene doiya. 17Bai sulano naiya langge nia naaki natasabukon todudul luas koidan doi antara mian badaang, mai kita ancame yanila luaila baikon yanila aki namoola koidan mobasilingan mau doi meeng komian tukon pakeyo Yesus sambuno.”
18Maka yanila uange doi Petrus tukon Yohanes usok koidan, maka yanila bontiikene baikon Petrus tukon Yohanes akimo namoola koidan bantile kai bangotunggul tukon Yesus sambuno.
19Bai Petrus tukon Yohanes timbiliyo, “Popikikene susuumuyu oila komo kana doi Mian Bisa salaano; tulutiyo Tuan-tuan naparenta kai tulutiyo ko Mian Bisa naparenta. 20Sabab kami aki namoola tade mosilingane manganai oila komo lapamo kami kitayo tukon lengele.” 21Anggota-anggota sidangoo aki namoola malaat meeng koalasan sulano ukume Petrus tukon Yohanes. Jadi yanila ancame do rasuloo molua, maka yanila sodiiyo luaila, sabab sasaibino komian nggaa-nggaale ko Mian Bisa sabab do kadadianoo. 22Mian mo toupiyo do tangalinanoo lobiano sangkap kolono kotaun kona umur.
Mian-mian momangangga mangkabi baranian doi Temeneno
23Sambuno lapa Petrus tukon Yohanes sinodii, yanila abalimo doi tula-tulano tukon basalitakene sasaibino oila koimam-imam kapalano tukon pamarenta-pamarenta Yahudi nabinantil doi yanila. 24#Tob. 20:11; Neh. 9:6; Sad. 146:6 Sambuno do tula-tulano lengele, yanila sambeang posinggat-singgat tukon pomeenggon noa doi Mian Bisa. Yanila bantile, “Temeneno, Ikoomo komo tealikene kotimbu tukon buta tukon tobun tukon sasaibino koantoko. 25#Sad. 2:1-2 Tukon Mu Roh Ikoo sidutu pobasilingonii lolo doi tumbunggami, Daud, doiyamo Muata; Ikoo bantile,
‘Bulaando ko mian-mian, mo aki natingoniiyo ko Temeneno, nggimal;
bulaando kobangsa-bangsa mongkubai tetel mo aki nabalaguna?
26Tomundo-tomundo doi dunia batotobo sulano napolobosi,
tukon sasaibino kokatua pomeenggon
molawane ko Temeneno tukon Tomundo Pasalamat.’
27 #
Mat. 27:1-2; Mrk. 15:1; Luk. 23:1, 7:11; Yoh. 18:28-29 Sabab takainomo Herodes tukon Pontius Pilatus lapamo mongkubai kombulan tukon mian mo aki natingoniiyo ko Temeneno tukon koidan Israel miano doi kota nia. Yanila pokombuli tukon pomeenggon sulano napo lawane Yesus domu peleleani mo moliyousoo, mo lapamo Ikoo bingkate teali Tomundo Pasalamat. 28Yanila pomeenggon sulano napo mongkubai sasaibino kolobo, mo lapamo Ikoo tantukene doi tumbe-tumbeno baikon doiya naikon nateali. Tukon Ikoo tantukene doiya luwe mukuasa tukon mumongiasan susuumu. 29Budodoiya, Temeneno, kitayomo bulaando yanila naancamano kami. Tukon pataikene kami, Muata-ata nia, mobabilitakene Komu bilita tukon aki mai matakut. 30Beekenemo komutulungan sulano komian moseselon tinangalinggon tukon kuasa mominasaindinggon-minasaindinggon tukon langge-langge mominasaindinggon mololoi nakuasa moteali tukon nabukuanan luwedoi Yesus sambuno, Mupeleleani mo moliyousoo.”
31Sambuno lapa yanila sambeang, doi yanila natampat pototongiandoo unggot. Yanila sasaibino Mian Bisa Na Roh kuasaiyomo, tukon tambuuno basilingan tukon barani tuuno tentang bilita moluwedoi Mian Bisa.
Sasaibino posinggat-singgat
32 #
Kis. R. 2:44-45
Sasaibino komian mo manganggadoo tubo pomeenggon noa tukon pikilan. Akiyo komeeng komian kai luwedoi yanila moaanggene baikon oila kona lobo daanoon susuungo. Sasaibino kolangge mo daano doi yanila, yanila pakeyo posinggat-singgat. 33Tukon kuasa mo babasal, rasul-rasuloo mebee kasaksian baikon Yesus lapamo tubo koidan. Jadi ko Mian Bisa balakaatiyo tuuno yanila. 34Tukon akiyo komeeng doi yanila mo akiyo kona oioila. Sabab yanila mo daano kona buta kai nabonua, yanila balukene; maka do pongolinodoo yanila babayo 35tukon yanila beekene doi rasul-rasuloo. Doibundu do doynodoo inobos-obos doi memeeng komian mo mapalaluu.
36-37Bunomo lakon doiya tukon Yusuf. Mau yana balukene kona buta, maka kopongolinodoo yana babayo tukon salakanggene doi rasul-rasul. Yusuf nia daano meeng komian doi Lewi natulunan moluwedoi Siprus; rasul-rasul bantile yana koidan Barnabas (komaanano Pengibul).
Currently Selected:
RASUL-RASUL SALITANO 4: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
