RASUL-RASUL SALITANO 3
3
Mian lapit tinangalinggon
1Daano kooloyo meeng Petrus tukon Yohanes ampakon doi Temeneno Na Bonua tepat batong tolu kinobian, doiya kotempono tuuk sambeangan. 2Indaa doi tataapon babasaloo mo sinombuikon “Tataapon Monondok”, daano komeeng komalane mo lapit salataamo doi nasinuungan. Samba-samba kooloyo mianoo binaba indaa sulano nabakabi-kabi doi mian-mian mo usok doi Temeneno Na Bonua. 3Sambuno do mian lapitoo kitayo Petrus tukon Yohanes mousok doi Temeneno Na Bonua, yana kabiyo doi yanila sulano yana nabinee meeng kolangge. 4Maka yanila mbalenge yana, boobus Petrus bantile, “Mbalenge kami!” 5Maka mian lapitoo palatikanggene yanila tukon yana moinikene naikon momalaat meeng kolangge doi yanila. 6Bai Petrus bantile doi yana, “Yaku akiyo daku doy mau nakidik. Bai oila komo daano doi yaku, doiya yaku beekonggon: Tukon Yesus Kristus nakuasa Nasaret mianodoo, papakono!” 7Maka Petrus taaniyo kolimano bakalinga do mianoo mopiit yana kedele maka kokondong. Banggadudul do mianoo aino tukon aino matano tealimo bukuan. 8Maka yana osuut kokondong, tukon mulaimo ampa-ampakon dombaa dombulo. Doibundu yana usok polaing-laing tukon Petrus maka Yohanes doi Temeneno Na Bonua, tukon yana ampakon lua-luanggon nggaale ko Mian Bisa. 9Sasaibino komian kitayo yana moampakon tukon nggaa-nggaale ko Mian Bisa. 10Maka yanila sadaliyo baikon yanamo domo bakabi-kabidoo mo biasa osulang doi “Tataapon Monondok” doi Temeneno Na Bonua. Yanila masainding tuuno tukon masaindinggene oila komo teali doi yana.
Petrus naotunggul doi Temeneno Na Bonua lalomo
11Mianoo banggadudul momeeng lainge Petrus tukon Yohanes. Doiya kosinggatoo yanila toluila polong doi gandalia mo sinombuikon “Salomo na Gandalia”, sasaibino komian lubat pokombuli doi yanila sabab masainding. 12Salataa Petrus kitayo do mian-mianoo mobadaang, yana bantile doi yanila, “Eh Israel mian-miano, bulaando Utus-utus momasaindinggene naiya hallia? Bulaando komuyu pateekene kami momeenggon? Kai komuyu aanggene naiya mian nia moola ampa-ampakon sabab daano kokuasa doi kami kai sabab kami motaat doi Mian Bisa? 13#Tob. 3:15 Mian Bisa Abraham mo sosubaiyo, Ishak tukon Yakub nda tulunan na Mian Bisa, do Mian Bisadoo lapamo akabasale Konapeleleani, doiyamo Yesus. Yesus doiyamo doi komuyudoo mo salakanggene doi pamarenta, tukon lawane doi Pilatus salaano, doiya kosinggatoo Pilatus yase osodiiyo. 14#Mat. 27:15-23; Mrk. 15:6-14; Luk. 23:13-23; Yoh. 19:12-15 Yana moliyous tukon monondok, bai komuyu lawane Yana tukon desaake sulano Pilatus nasodiiyo komeeng komian momangakate doi komuyu. 15Utus-utus akateyo Yesus, banggokai doi Yanamo kotuboan naluwean motuuk doi sasaibino komian. Tukon Mian Bisa otuboiyomo Yana koidan doi namatean. Kami lapamo sakisiiyo doiya halloo. 16Utus-utus lapamo kitayo tukon sakisiiyo oilamo komo teali doi mian nia mo lapit. Yana lapamo teali bukuan tukon sehato koidan sabab yana anggayo Yesus tukon Nakuasa. Tobikon namanganggaan doi Yesus maka namian nia teali bukuan abali doi Utus-utus salaano sasaibino.
17Utus-utus! Budodoiya yaku toiyo baikon oila komo komuyu tukon pokatua-katua nalikukanggon motuuk doi Yesus, doiya komuyu kubaiyomo sabab komuyu aki potoiyo oila komo sio pokubaiyo. 18Tobikon doiya tealimo koidan oila komo lapamo Mian Bisa pailukene loolukonoo doi sasaibino Nanabi-nabi, baikon Tomundo Pasalamat mo pinaladandikon sio namandarita. 19Tobikon doiya Utus-utus, pobadodoloon doi polalim-lalim tukon posula doi Mian Bisa, sulano Yana alapuse komu lalim. 20Yesus lubat doi komuyu tukon komuyu toupiyo kosanaangan doi rohani. Tukon Temeneno sumboliiyo Yesus molubat doi komuyu, sabab Yana lapamo Mian Bisa tantukene moteali Tomundo Pasalamat doikoo. 21Yesus dungol doi surgaa polong ko Mian Bisa tealikene sasaibino boolu buno mo lapamo Mian Bisa bantile doi Nanabi-nabi doi lounu loolukonoo. 22#Kua. 18:15, 18 Musa biasa bantile, ‘Mian Bisa komu Temeneno naikon Yana sumboliiyo doikoo komeeng konabi doi mubangsa susuumu, buno Yana mosumboliiyo yaku. Komuyu sio pondongoliiyo sasaibino do nabidoo nabinontiikon doi komuyu. 23#Kua. 18:19 Mian mo aki napalatikanggene oila do nabidoo nabinantil, do mianoo sinaakon doi Mian Bisa namian bailon tukon sinilaka.’ 24Nabi-nabi mo sidutu pelenggene kobulita moluwedoi Mian Bisa, tambuun doi Nabi Samuel tukon nabi-nabi bailon mo lubat doibundu, sasaibino babilitakene tentang nalounu nia. 25#Tea. 22:18 Teteba-teteba moluwedoi Mian Bisa nabi-nabi mo pelenggene doiya tuuk doi Utus-utus. Doi perjanjianoo lalomo Mian Bisa mokubai tukon tumbunggita, Mian Bisa bantile doi Abraham buno naiya, ‘Doi mukatulunan Yaku naikon balakaatiyo sasaibino kobangsa doi dunia nia.’ Perjanjianoo doiya tuuk doi komuyu koidan. 26Doiyamo kosababpo ko Mian Bisa piliyo Konapeleleani, maka sumboliiyo Yana lubat doi komuyu tumbe, sulano nabalakaatiyo komuyu. Kona cara mobalakaatiyo komuyu doiyamo tukon kubaiyo Utus-utus sasaibino teali badodoloon doi mutuboan mo lokis.”
Currently Selected:
RASUL-RASUL SALITANO 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
