1 TESALONIKA 3
3
1 #
Kis. R. 17:15
Doibundu komai poloonan akimo mai moola taane koidan. Tobikon doiya kami bapikir kona monondokan, tadukai kuinotinggal susuunggu doi Athena, 2tukon kami daano bintekene koutusonggita Timotius. Yana meeng ko Mian Bisa napeleleani mo balimang pomeenggon kami doi babilitakanano ko Bilita Monondok tentang Kristus. Kami bintekene Timotius doikoo sulano yana naekeenggele komuyu tukon naderenge komuyu sulano napololokon moonggol kopomanganggaan doi Kristus. 3Tukon kalu buno doiya akiyo komeeng komian doi komuyudoo komo mundur sabab doi nda sakisaa nia. Komuyu susuumuyu toiyo baikon do sakisaadoo tongusokon doi Mian Bisa natetel motuuk doi kita. 4Doi tempodoo kami modaano polaing komuyu, kami lapamo pailukene doikoo loolukonoo baikon kita naikon malaat sakisaa. Tukon doiya takainomo bisa-bisa motealimo; komuyu susuumuyu toiyomo. 5Doiyamo kosababpo yaku bintekene Timotius, sabab yaku yase koidan toiyo bulaando kona tobinggatan kopomanganggaan doi Kristus. Yaku sasaakiyo ko Ibiliis nggoola oluliyo komuyu maka sasaibino komai pakadakan teali akiyo kolabano.
6 #
Kis. R. 18:5
Budodoiya Timotius lapamo abali tukon lapamo pelenggene doi kami kobilita laba-labaan tentang bulaando kopomanganggaan doi Kristus tukon koposeangan. Yana pailukene doi kami baikon komuyu sidutu daano kopokenang-kenangan mo monondok doi kami motangabos doi noamu. Tukon komuyu yase pososuung tukon kami, pokakana buno kamidoo yase pososuung tukon komuyu. 7Doiyamo kosababpo, Utus-utus, doi susaan tukon sakisaa lalomo, kami moola terhibur tentang dosalitadoo doi komuyu. Kopomanganggaan doi Kristus akabasale konoanggami, 8tobikon budodoiya kami rasakanggene kotuboan mobisa-bisa, tongo komuyu tataap kokondong kokoonggol, pomeenggon tukon Temeneno. 9Bulaando kona babasalan komai kinatauwan doi Mian Bisa doi sasaibino kolaba-labaan kami mo toupiyo doi salaano sabab komuyu. 10Oloyo popook kami kabiyo doi Yana tukon tootubo konoanggami, sulano kami moola pososuung tukon komuyu sulano mai osukupiyo oilamo kopopinalaluu motuuk manganggaan doi Kristus tentang kona bisaan.
11Boliisi lakon ko Mian Bisa Tamanggita susuungo, tukon nda Temeneno Yesus nakeseayo kololoon doi kami sulano mai pososuung tukon komuyu! 12Boliisi ko Temeneno nakubaiyo komuyu pololokon pomamaasikon meeng tukon bailon tukon popololokon mamaasikene sasaibino komian, sulano doposeangoo nasosuungi, pokakana buno komai seang doi komuyu. 13Tukon buno doiya ko Temeneno naikon ekeenggele konoamu, sulano komuyu moliyous tukon akiyo kososibolii doi Mian Bisa Tamanggita salaano, doi tempodoo nda Temeneno Yesus Nalubatan polaing sasaibino komian mo teali Namian.
Currently Selected:
1 TESALONIKA 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
