1 TESALONIKA 2
2
Paulus nalimang doi Tesalonika
1Utus-utus! Komuyu toiyo baikon komai lubotiiyano komuyu aki napalasuma. 2#Kis. R. 16:19-24, 17:1-9 Komuyu toiyo baikon kami akiyoon mai lubat doikoo doi Tesalonika, kami lapamo sinakisaa tukon tinotulai doi Filipi. Bai mau nabadaang komian molawane kami, konda Mian Bisa lapamo beena baranian doi kami sulano mai pelenggene doikoo Ko Bilita Monondok moluwedoi Yana. 3Komai tobiano ikoo bolikon meeng kolobo nasalaan; koidan bolikon tukon makisuut mo aki namonondok kabai bakokolian. 4Aki! Kami aki mai basilingan tuuk mokindendeke komian noano, bai tuuk nasanaangan ko Mian Bisa noano, mo ujiyo konoanggami. Sabab kami Mian Bisa akuiyo moolamo pelenggene do Bilitadoo Monondok. 5Komuyu susuumuyu toiyo baikon kami aki natolongo mai silingan komo maamis kabai abuiyo komuyu sulano natosookon kobapilogotan. Mian Bisa komo teali sakisii! 6Kami koidan aki mai kakaate sulano mai malaat panggaal doi mian – bai doi komuyu kabai doi mian bailon. Kona bisaan buno meeng korasul Kristus, kami moolakai mai umbale meeng kolobo doi komuyu. 7Bai kondondoonggami tolongo bamuyuk-muyuk kalu kami daanoon mopototongi tukon komuyu, pokakana meeng kopau tinano mopialayo kona pau-pau. 8Sabab tukon mai seang maasi, kami basadia mobeekene doikoo bolikon tolongo do Bilita Monondokoo mo luwedoi Mian Bisa, bai maukai mai tuboan koidan. Sabab kami seseange tuuno komuyu! 9Tantu komuyu daano moneneeke bulaando komai motikasan mokakaate tukon kokobukuan. Oloyo maka popook kami balimang sulano kami naaki nakubaiyo susa doi meeng komian koidan doi komuyudoo doi mai babulitakanano do Bilitadoo Monondok mo luwedoi Mian Bisa tuuk doikoo.
10Kami tubo moliyous, talakana tukon akiyo kososiboliino doi komuyudoo mo lapamo mangangga doi Kristus. Komuyumokai komai sakisii-sakisii, bunomo koidan doi Mian Bisa. 11Komuyu toiyo baikon kami kubaiyo komuyu memeeng kopau buno meeng kopau tamano mokindendeke kona pau-pau. 12Kami otinauwo komuyu, kami mebee dorongan doikoo tukon kami desaake komuyu sulano potubo pobabunokon doiya sulano ko Mian Bisa noano nasanaang. Sabab ko Mian Bisa lapamo uange komuyu sulano poteali Mian Bisa namian doi Dunia mo Boolu tukon potoupiyo kona babasalan.
13Daano koidan komeeng kolangge bailon mo kubaiyo kami sidutu pelenggene kinatauwan doi Mian Bisa. Langgedoo doiyamo, baikon salataa mai polongganano kobilita moluwedoi Mian Bisa tuuk doikoo, komuyu lengele tukon talimayo bilitadoo bolikon buno bilita moluwedoi banggapi, bai buno bilita mo bisa-bisa moluwedoi Mian Bisa. Yanamo komo balimang doi butomuyu mo mangangga doi Kristus. 14#Kis. R. 17:5 Utus-utus, kolangge komuyu mo toupiyo lapamo koidan Mian Bisa naanggota-anggota jemaat doi Yudea toupiyo mo tealimo Yesus Kristus namian. Komuyu toupiyo kosakisaa moluwedoi pobangsa, bunomo lakon ko Mian Bisa naanggota-anggota jemaat doi Yudeadoo natinoupidoo luwedoi Yahudi miano. 15#Kis. R. 9:23, 29, 13:45, 50, 14:2, 5, 19, 17:5, 13, 18:12 Dopai mian-mianoo komo akateyo Yesus tukon nabi-nabi, tukon sakisaayo kami. Yanila musuwo komian sasaibino, tukon ko Mian Bisa aki nasanaanggene tuuno doi yanila. 16Tukon yanila ala-alangiyo kami mopelenggene kobilita doi bangsa-bangsa mobolikon Yahudi miano bilita mo moola salamatene dopai bangsa-bangsadoo. Kalu buno doiya dopai Yahudidoo miano suungiyo momeenggon kona pai lalim sulano napolong koaito. Tukon budodoiya kona pupusan yaniladoo laate ko Mian Bisa naukuman!
Paulus naiyasano koidan molubotiiyo komian badaang doi Tesalonika
17Bai Utus-utus, salataa kami pobabandakon tolongo aki namalumbit doi komuyu – pobabandakon doi matanggita bai konoanggita aki – kami pololokon neneeke ikoo tukon kakaate tutuuno nda pososuung koidan! 18Komai tetel sio mai ampakon lubotiiyo komuyu; tukon yaku, lapamo soba-sobayo idan lua luunggon, bai ko Ibiliis alangiyo kami. 19Bisa tuuno komuyumo komai moinian tukon komai labaan. Sabab kalu naikon Temeneno Yesus lubat, tukon kita mangadap, maka komuyumo naikon komo teali mai banggaalan! 20Takainomo komuyumokai komo teali mai banggaalan tukon mai labaan!
Currently Selected:
1 TESALONIKA 2: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
