1 KORINTUS 2
2
Bilita kaliangano Kristus namatean doi kayung sempang
1Utus-utus! Tempodoo yaku lubat doikoo tukon babotilangganano doikoo kaliangano ko Mian Bisa natetel mo akiyoon kodunia natoiyo, yaku aki kupakeyo daku pandoiyan doi dunia kai basilingan tukon bantilan-bantilan mo monondok. 2Sabab yaku lapamo niatene baikon kalu yaku daanoon mopolaing tukon komuyu, yaku aki kumopolonggon oioila, tolongo kaliangano doi Yesus Kristus; baikon yana lapamo mate doi kayung sempang. 3#Kis. R. 18:9 Salataa daano yaku tukon komuyu, yaku matalamuyuk tukon busak-busak matakut. 4Bilita yaku mo pelenggene doikoo yaku aki kupelenggene tukon bantilan-bantilan mo babayo menurut banggapi napandoiyan. Yaku pelenggene doiya tukon cara mo bukutiikanggene baikon ko Mian Bisa Na Roh balakuasa. 5Yaku kubaiyo buno doiya, sulano komu manganggaan doi Kristus aki naluwe doi banggapi napandoiyan, bai luwedoi Mian Bisa nakuasa.
Mian Bisa napandoiyan
6Mau kai nabuno doiya, daano doi mian badaangoo kona tuboan doi rohani lapamo mono-monondok, takainomo yaku basilingan kokaliangano pandoiyan. Bai naiya pandoiyan nia bolikon pandoiyan doi dunia, kabai pamarenta-pamarenta napandoiyan doi lounu nia, kona kakuasaan molapus. 7Do pandoiyanoo yaku mo lakukanggenemo doiya pandoiyan moluwedoi Mian Bisa. Do pandoiyanoo dunia aki natoiyo, bai ko Mian Bisa lapamo sadiakene komo tuuk kona monondokan doi kita akiyoon nadunia nia napinasitaka. 8Akiyo komeeng doi pamarenta-pamarenta doi lounu nia komo toiyo do pandoiyanoo. Sabab kalu kai yanila toiyomo, tantu yanila akimo napo sempanggene ko Temenenodoo mo babasal. 9#Yes. 64:4 Kobalino doiya langgedoo daano buno komo totulis doi Kitab Moliyous lalomo,
“Oilamo komo aki nabiasa kinita kai banggapi moola nalengele,
tukon moaki nabiasa sumbut doi banggapi napikilan,
doiyamo ko Mian Bisa nasinadiakon
tuuk doi mian badaang mo mamaasikene yana.”
10Bai ko Mian Bisa lapamo okitakene doi kita tukon parantaraan Na Roh. Mian Bisa Na Rohdoo solidikiyo sasaibino kolangge, polong doi Mian Bisa natetel-tetel mo sosookon tutuuno. 11Sabab komo toiyo memeeng komian noano tolongo do mianoo naroh susuungo, bolikon? Bunomo koidan ko Mian Bisa. Komo toiyo ko Mian Bisa noano tolongo Mian Bisadoo Na Roh susuungo! 12Tukon kita aki nabineekon koroh dunia nia, bai tolongo Roh mo luwedoi Mian Bisa, sulano kita sasaibino toiyo komo lapamo Mian Bisa beekene doi kita.
13Tobikon doiya, kalu kami jelaskanggene kolangge-langge kaliangano doi Mian Bisa motuuk doi mian-mian mo daano ko Mian Bisa Na Roh, kami aki mai pelenggene tukon banggapi napandoiyan, bai tolongo luwe otunggul doi Mian Bisa Na Roh. 14Mian mo akiyo ko Mian Bisa Na Roh, aki namoola mantalima oila do Rohdoo nainokitakon. Sabab doiya mianoo langge-langgedoo nabinantil tolongo buno meeng kokabodokan tolong. Doiya mianoo aki namoola mangalatikene, sabab doiya langge-langgedoo tolongo moola tiningonii tukon secara rohani. 15Mian mo daano ko Mian Bisa Na Roh moola nilaiyo sasaibino kolangge, bai akiyo komeeng komian momoola nilaiyo Yana. 16#Yes. 40:13 Doi Kitab Moliyous lalomo totulis,
“Indee komo toiyo ko Temeneno napikiran?
tukon indee komo moola otinauwo Yana?”
Kitamo komo daano kopikilan mo pokakana tukon Kristus!
Currently Selected:
1 KORINTUS 2: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
