1 KORINTUS 1
1
1-3 #
Kis. R. 18:1
Utus-utus Mian Bisa najemaat doi Korintus! Utus lapamo Mian Bisa uange sulano nateali namian sabab Utus Kristus Yesus namian, polaing-laing doi sasaibino komian inaando kona daanooan komo sosubaiyo konda Temeneno Yesus Kristus, doiyamo konapo Temeneno tukon nda Temeneno koidan. Yaku, Paulus, tukon utusonggita Sostenes, moinikene sulano ko Mian Bisa Tamanggita tukon nda Temeneno Yesus Kristus mebee balakaat tukon namonondokan doikoo. Yaku tulise naiya suratia buno meeng korasul Yesus Kristus, Mian Bisa susuungo mo oduduke tukon luwe koidan doi namongiasan.
Balakaat-balakaat moluwedoi Mian Bisa mololo doi Yesus Kristus
4Yaku sidutu bakinatauwan doi Mian Bisa kokaliangano komuyu, sabab komuyu lapamo mantalima maasi doi Mian Bisa mololo doi Kristus Yesus. 5Sabab komuyu lapamo teali Kristus namian, maka komu tuboan kaasakene kolangge sasaibino. Komu motoiyan doi sasaibino kolangge atean tuuno, tukon komuyu pandoi bangotunggulkene doiya motoiyanoo. 6Doiya tudoikene baikon kobilita kaliangano Kristus lapamo kai tangabos doi noamu lalomo, 7tobikon komuyu akipo kakulangan mau nabaino meeng kobalakaat, samantara komuyu mototiiliyo konda Temeneno Yesus Kristus nalubatan tukon sasaibino komian kitayo. 8Kristus susuungo naikon dagaiyo komuyu polong doi napupusan; sulano doi tempo yana lubat koidan, komuyu polinaat akiyo kososiboliino. 9Ko Mian Bisa moola nainangga tutuuno. Yanamo ko Mian Bisa mo lapamo uange komuyu sulano poteali pomeenggon tukon na Pau, doiyamo Yesus Kristus, nda Temeneno.
Poliitonan doi jemaat lalomo
10Utus-utus! Tukon doi nda Temeneno Yesus Kristus sambuno, yaku kabiyo sulano komuyu sasaibino pomeenggon bantilan; sulano naakiyo kopoalaasan doi komuyu. Siokai komuyu pomeenggon, pomeenggon noa tukon pikiran. 11Sabab, komian badaang doi Kloe solipuan popitoikene doi yaku baikon daano koponggeelekian doi komuyu. 12#Kis. R. 18:24 Daku minakisuuti doiyamo baikon doi komuyu daano komo bantile, “Yaku lainge Paulus,” daano koidan komo bantile, “Yaku lainge Apolos,” kobailon bantile, “Yaku lainge Petrus,” daano kobailon bantile, “Yaku lainge Kristus.” 13Bulaando Kristus motongobos-obos! Paulus aki namate sinempang motuuk doi komuyu! Komuyu aki posinau paisu salani sulano poteali Paulus napololaing-pololaing, bolikon?
14 #
Kis. R. 18:8, 19:29; Rm. 16:23 Kinatauwan aki kusauwo paisu salani mau nabaino meeng komian doi komuyudoo, sangalaasan Krispus tukon Gayus. 15Inai nadaano meeng komian mobantile baikon yaku lapamo sauwo paisu salani yana sulano nateali pololaing yaku. ( 16#1Kor. 16:15 Oo, ide, Stepanus tukon napokaluarga, memang yakumo komo sauwo paisu salani yanila. Bai kobai-bailonggon, kalu kuneneeke, akiyono komian bailon yaku mo sauwo paisu salani.) 17Kristus bintekene yaku bolikon sulano kusauwo komian, bai sulano kubabotilanggene Bilita Monondok moluwedoi Mian Bisa; tukon doiya sio kukubaiyo tukon bolikon kupandoiyan basilingan secara banggapi, sulano kokuasa molengget doi Kristus namatean doi kayung sinempang aki nabaino palasuma.
Mian Bisa nakuasa tukon napandoiyan tangabos doi Kristus
18Sabab doi mian badaang mo ompokoniiyo kosilakaan, kobilita kaliangano Kristus namatean doi kayung sempang babunokon kala-kala. Bai doi kita Mian Bisa mo salamatene, doiya bilitadoo buno meeng ko Mian Bisa nakokubai motudoikene kona kuasa. 19#Yes. 29:14 Sabab doi Kitab Moliyous lalomo, ko Mian Bisa bantile,
“Kona pandoiyan mian mosaleh naikon kunggalanggabute,
tukon pangalatian mian badaang kona motoiyan naikon yaku alapuse.”
20 #
Ayb. 12:17; Yes. 19:12, 33:18, 44:25 Jadi, oila kona totuuk do mian badaangoo mosaleh? Oilamo kona totuuk doi yanila mo daano kona ilimuu? Oila kona totuuk komian mopandoy pikikene nadunia nia? Ko Mian Bisa lapamo tudoikene baikon nadunia nia napandoiyan akiyo kotakoso!
21Sabab mau nabulaandomo kobanggapi napandoiyan, yana aki namoola tingoniiyo ko Mian Bisa kalu tolongo napandoiyan susuungo. Bai sabab ko Mian Bisa napandoiyan, maka yana salamatene komian badaang mo mangangga doi yana luwe dobilitadoo kami mo babilitakene komian doi dunia nia mo tolongo aanggene akiyo kotakoso. 22Ko Yahudi miano palaluuwo komo minasaingdinggon buno meeng kobukutii, tukon Yunani miano palaluuwo tuuno kopandoiyan doi dunia nia. 23Bai kita nia tolongo babilitakene Kristus mo mate doi kayung sempang. Doiya bilitadoo singgunge ko Yahudi miano napalasaan, tukon mian badaang mobolikon Yahudi miano tolongo aanggene kala-kala. Tukon mian mobolikon Yahudi miano aanggene meeng kobodoan. 24Bai doi mian badaang mo lapamo Mian Bisa uange – mau doi Yahudi miano mau doi mobolikon Yahudi miano – doiya bilitadoo buno meeng ko Mian Bisa nakokubai motudoikene kona kuasa tukon napandoiyan. 25Sabab komo tokita bodo doi Mian Bisa, daano lobian kona pandoiyan doi banggapi napandoiyan; tukon komo tokita matalamuyuk doi Mian Bisa, daano lobian kona bukuanan doi banggapi nabukuanan.
Kuasa Mian Bisa tukon banggapi nakelemahan
26Utus-utus! Coba poneneeke bulaando kopoo tuboan salataa ko Mian Bisa nauangano komuyu. Tolongo soisik tolong doi komuyudoo komo pandoi, kabai mobalakuasa, kabai motatandak kona sambu dinudukon menurut banggapi napokita. 27Sabab takainomo ko Mian Bisa sangaja lilike komo inaanggon bodo doi dunia nia, sulano komian badaang mopandoi doi dunia nia teali mammaa. Tukon ko Mian Bisa lilike komo inanggon lemah doi dunia nia, sulano ko mian-mian mo bukuan nateali mammaa. 28Ko Mian Bisa lilike komo inaanggon pau-pauno, talalais, tukon baikon nadunia nia mo aanggene akiyo kotakoso, sulano ko Mian Bisa namanase nadunia nia nainaanggon palaluu. 29Tukon nabuno doiya akiyo komeeng komian momoola banggaalkene kobutongo doi Mian Bisa salaano. 30Tolongo Mian Bisa susuungo komo kubaiyo tobikon Utus pomeenggon tukon Kristus Yesus. Luwedoi Kristus, kita tinealikon pandoi. Tukon luwedoi Yana koidan ko Mian Bisa kubaiyo kita pokindokon tukon kobutongo, tealikene kita namian mo tangalaas, tukon bebaskanggene kita. 31#Yer. 9:24 Jadi, bunomo komo totulis doi Kitab Moliyous lalomo, “Komian mo yase banggal-banggaal, sio nabanggaalkene doi oilamo ko Temeneno mo lapamo lakukanggene.”
Currently Selected:
1 KORINTUS 1: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
