Roma Laluita to mopakanótó óntóꞌna sura
Laluita to mopakanótó óntóꞌna sura
Hangkoia kótá Roma ia miꞌi pehodaꞌá popárentá kadatuá Roma to mokuasaꞌi handaꞌ tampoꞌ ntániꞌna. Tunggáiána Paulu moukiꞌ sura deꞌe bona mopaturoꞌ toSarani i Roma mokana agama Sarani, láwiꞌ Paulu tiꞌara mani nampakaꞌ lao i Roma mopaturoꞌheꞌ. Tempóna Paulu moukiꞌ sura deꞌe, tangaꞌna molumao moánti Ngkóráꞌ Marasa i katáluna kánina, hai babilaꞌ ia ara i kótá Korintu rekeꞌ-rekeꞌna pare lima puloꞌna hai pitu roo karapoánákana Iesu (57M).
Ntóáꞌ laluita sura deꞌe talámbiꞌ i Roma 1:17 to manguliꞌ: “Hangko i Ngkóráꞌ Marasa, taisá noumbá rárána bona mohintuwuꞌkeꞌ huleꞌ hai Pueꞌ Ala. Node rárána: mewaliꞌkeꞌ manótó i peitána Pueꞌ Ala ánti pepoináláintaꞌ i Hia.” I lalu sura deꞌe, Paulu moukiꞌ: Kitaꞌ upu-upu tauna to madósá, maroꞌa toIahudiꞌ, maroꞌa to tiꞌara toIahudiꞌ. Ánti kamadósántaꞌ, hintotoꞌkeꞌ nahuku Pueꞌ Ala (3:9-19). Ánti kamaꞌahiꞌna Pueꞌ Ala, Ia mohómpókikeꞌ hangko i huku dósántaꞌ moliu kamatena Pueꞌ Iesu (3:24-25; 5:8). Mewaliꞌ ane mepoináláikeꞌ i Iesu, Pueꞌ Ala mohómpókikeꞌ hangko i huku dósántaꞌ, hai morekeꞌkeꞌ manótó i peitáNa (3:22,26; 4:24-25; 5:1).
I lalu sura deꞌe, Paulu mopaturoꞌ kana i tunggáiána Pueꞌ Ala i toIahudiꞌ, to rauliꞌ woꞌo toSáráeliꞌ (9:1–11:32). Nauliꞌ Paulu, deꞌe-deꞌe kahandaꞌáraꞌ toIahudiꞌ tiꞌaraheꞌ molámbiꞌ katehómpóꞌ láwiꞌ tiꞌaraheꞌ mau mepoinálái i Iesu (10:1-4). Ánti pesápuákaraꞌ, tebungkáhi miꞌi rárá bona handaꞌ tauna to tiꞌara toIahudiꞌ molámbiꞌ katueꞌ to maroꞌa to tiꞌara mokahópóꞌá (11:11-15, 30-31). Tunggáiána Pueꞌ Ala, bona kahópóꞌána, “handaꞌ toSáráeliꞌ ina tehómpókiheꞌ hangko i huku dósáraꞌ” (11:26).
Kahópóꞌána Paulu mopaturoꞌheꞌ toSarani to toroꞌ i kótá Roma kana i bábehiá to hintotoꞌ i toSarani. Napaturoꞌheꞌ bona mampokaꞌahiꞌheꞌ hángká rángáraꞌ (12:9-16, 13:8-14), mengkoruꞌheꞌ i topopárentá (13:1-7), hai mombeádáiheꞌ (14:1–15:13).
Óntóꞌna
A. Tabeá (1:1-15)
B. Ntóáꞌ paturoꞌ: rárá tauna mewaliꞌ manótó i peitána Pueꞌ Ala (1:16-17)
C. Ngkóráꞌ Marasa (1:18–11:36)
1. Upu-upu tauna madósá
a. Kamadósáraꞌ to tiꞌara toIahudiꞌ (1:18–2:16)
b. Kamadósáraꞌ toIahudiꞌ (2:17–3:18)
c. Upu-upu tauna masalaꞌ hai hintotoꞌ nahuku Pueꞌ Ala (3:19-20)
2. Rárá bona tauna mewaliꞌ manótó i peitána Pueꞌ Ala (3:21–5:21)
a. Mewaliꞌkeꞌ manótó ánti kabulána laluna Pueꞌ Ala (3:21-31)
b. Pándiriꞌ hangko i Burahima to mewaliꞌ manótó ánti pepoináláina (4:1-25)
c. Mewaliꞌkeꞌ manótó ánti kanasulewátáintaꞌ Iesu Kerisitu hai ánti pepoináláintaꞌ i Hia (5:1-21)
3. Rárá bona mewaliꞌkeꞌ magasaꞌ (6:1–8:39)
a. Katueꞌtaꞌ ane mohintuwuꞌkeꞌ hai Kerisitu (6:1-23)
b. Paturoꞌna Musa hai kuasaꞌ dósá i kitaꞌ (7:1-25)
c. Inao to Magasaꞌ mokábáhákeꞌ hangko i kuasaꞌ dósá hai molámbiꞌkeꞌ katueꞌ to woꞌu (8:1-39)
4. ToIahudiꞌ hai tauna to tiꞌara toIahudiꞌ (9:1–11:36)
a. Pueꞌ Ala mopileꞌi tauna mouláꞌ peundeꞌáNa haduduáNa (9:1-29)
b. Kitaꞌ hangaa-ngaa mepoinálái (9:30–10:21)
c. Tunggáiána Pueꞌ Ala (11:1-36)
D. Bábehiá to hintotoꞌ i kitaꞌ to mepoinálái i Pueꞌ Iesu (12:1–15:13)
1. Pohintuwuꞌtaꞌ kitaꞌ to mepoinálái (12:1-21)
2. ToSarani hai topopárentá (13:1-7)
3. Bágóꞌraꞌ toSarani (13:8-14)
4. Hangaa-ngaa mombeádáikeꞌ (14:1–15:13)
5. Bágóꞌna Paulu moánti Ngkóráꞌ Marasa i tauna to tiꞌaraheꞌ toIahudiꞌ (15:14-33)
6. Tabeá to kahópóꞌána (16:1-27)
Currently Selected:
Roma Laluita to mopakanótó óntóꞌna sura: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.