Roma 1

Molámbiꞌ toSarani

i kótá Roma

1Sura deꞌe hangko i kódóꞌ Paulu, huoꞌána Iesu Kerisitu, to Napileꞌi mewaliꞌ suroNa moánti Ngkóráꞌ Marasa to hangko i Pueꞌ Ala. 2Hangkoia, hangko tiꞌara mani Iesu haweꞌ i duniáꞌ, Pueꞌ Ala modándi miꞌi moliu nabiꞌ-nabiꞌ mokana i Ngkóráꞌ Marasa, hai iti to teukiꞌ i lalu Sura Magasaꞌ.#1:2 Handaꞌ to teukiꞌ i Pototowiá to Sae tebukeki i Pototowiá to Woꞌu, rápáꞌna: mokana i pesupaꞌna Iesu (básá Iesaia 7:14; Mika 5:2), mokana i pantódihána Iesu (básá Iesaia gáláꞌna ka-53; 50:6; Sura Petóiá 22); mokana i kanasulewátáintaꞌ Iesu bona dósántaꞌ peisá raꞌámpungi (básá Iesaia 53:5-12); hai mokana i pearóna huleꞌ Iesu hangko i kapate (básá Sura Petóiá 16:10). 3Ngkóráꞌ Marasa iti kana i Ánáꞌna Pueꞌ Ala, Pueꞌtaꞌ Iesu Kerisitu. Mouláꞌ karapoánákaNa, Ia tauna, hadua pemuleꞌána Datu Daudiꞌ.#1:3 pemuleꞌána Datu Daudiꞌ - hibali tunggáiána hai: “Datu Topehómpóꞌ to nadándi Pueꞌ Ala”. 4Agáiáná Iesu Ia miꞌi woꞌo Ánáꞌna Pueꞌ Ala, hai Ia magasaꞌ hibali hai Pueꞌ Ala. Upu-upuna iti tongawaꞌ, láwiꞌ Pueꞌ Ala mopatueꞌ huleꞌ hangko i kapate. Ia miꞌi Pueꞌtaꞌ Iesu Kerisitu!

5Ánti kaꞌIesuna, Pueꞌ Ala mampoweꞌiaꞌ pewátiꞌ mahile, láwiꞌ Napileꞌiaꞌ mewaliꞌ suroNa, bona kódóꞌ to moánti Ngkóráꞌ Marasa i humalele duniáꞌ i tauna to tiꞌara toIahudiꞌ, bona mepoináláiheꞌ hai mengkoruꞌheꞌ i Pueꞌ Iesu, duuꞌna hangaꞌna Iesu rapomahile. 6Noꞌonoꞌ woꞌo kómu toSarani to i kótá Roma. Kahandaꞌámi tiꞌarakou toIahudiꞌ, agáiáná Pueꞌ Ala mokióꞌkou woꞌo mewaliꞌ taunána Iesu Kerisitu. 7Onoꞌ miꞌi haneꞌi kupakatu sura deꞌe i upu-upu toSarani to ara i Roma. Pueꞌ Ala mampokaꞌahiꞌkou hai mokióꞌkou mewaliꞌ taunáNa to magasaꞌ. Mekakaeaꞌ i Pueꞌ Ala Umántaꞌ hai i Pueꞌ Iesu Kerisitu bona Nawátiꞌkou hangko i kabulána laluNa hai mampoweꞌikou roꞌa ngkatueꞌ.

Paulu mampoinao moweoꞌheꞌ toSarani to ara i Roma

8Ioru-oru, kuꞌuliꞌ handaꞌ kamaroꞌana i Pueꞌ Ala ánti kakómuna halalu-halalu. Peisá kuꞌuliꞌ noꞌonoꞌ ánti pewátiꞌ to talámbiꞌ hangko i Iesu Kerisitu. Kuꞌuliꞌ handaꞌ kamaroꞌana láwiꞌ kamaróhóna pepoináláimi i Pueꞌ Iesu tebámbári i humalele duniáꞌ. 9Hangko i lalungkuꞌ ntepuꞌu mampopolumaoaꞌ bágóꞌ to naweꞌiaꞌ Pueꞌ Ala. Bágóꞌkuꞌ iti, mopahaweꞌ Ngkóráꞌ Marasa mokana i ÁnáꞌNa. Hai Pueꞌ Ala moisá ntepuꞌu lalungkuꞌ. Naisá kakukábeláimi oaꞌ i lalu pekakaengkuꞌ. 10Kupembiáꞌ i lalu pekakaengkuꞌ, ane Napokana Pueꞌ Ala, bona Napoweꞌiaꞌ tempó lao moweoꞌkou. 11Kupoinao ntepuꞌu mampohidupaꞌákou, bona moliu kódóꞌ, ina molámbiꞌkou pewátiꞌ hangko i Inao to Magasaꞌ to ina mopakaróhó pepoináláimi. 12Tunggáiángkuꞌ bona kitaꞌ peisákeꞌ mombepakaróhó mpolalu, láwiꞌ kitaꞌ hingkakanimokeꞌ mepoinálái i Iesu Kerisitu.

13Halalu-halalu, katoꞌuána handaꞌ miꞌi kánina kupoinao moweoꞌkou, agáiáná paka ara to mosalemporiaꞌ. Tunggáiángkuꞌ lao moweoꞌkou, bona ara wuaꞌna pobágóꞌkuꞌ i kótámi, nodo wuaꞌna pobágóꞌkuꞌ i oloꞌraꞌ tauna to tiꞌara toIahudiꞌ i wánuá-wánuá ntániꞌna. 14Kupoinao lao i kótámi, láwiꞌ kupoinao ntepuꞌu mopahaweꞌ Ngkóráꞌ Marasa i upu-upu tauna, maroꞌa i to moisá básáraꞌ hai ádáraꞌ toIunani, maroꞌa to tiꞌara; maroꞌa to mosikolaꞌ hai to tiꞌara mosikolaꞌ. 15Onoꞌ miꞌi haneꞌi kupoinao ntepuꞌu mopahaweꞌ Ngkóráꞌ Marasa i kómu woꞌo to toroꞌ i kótá Roma.

Hangko i Ngkóráꞌ Marasa, taisá noumbá rárána Pueꞌ Ala morekeꞌkeꞌ manótó i peitáNa

16Tiꞌaraꞌaꞌ mahili mopahaweꞌ Ngkóráꞌ Marasa, láwiꞌ moliu Ngkóráꞌ Marasa iti, Pueꞌ Ala mopatongawaꞌ kuasaꞌNa mokábáhá tauna hangko i huku dósá, heáná peá to mampoinálái Ngkóráꞌ Marasa iti, rungu-runguna toIahudiꞌ,#1:16 toIahudiꞌ: hibali lempóna hai toSáráeliꞌ ba toIberani. haweꞌ-haweꞌ woꞌo tauna to tiꞌaraheꞌ toIahudiꞌ. 17Hangko i Ngkóráꞌ Marasa iti, taisá noumbá rárána bona mohintuwuꞌkeꞌ huleꞌ hai Pueꞌ Ala. Node rárána: mewaliꞌkeꞌ manótó i peitáNa ánti pepoináláintaꞌ i Hia. Tiꞌara ara rárá ntániꞌna, láwiꞌ i lalu Sura Magasaꞌ teukiꞌ miꞌi node: “Tauna to manótó i peitána Pueꞌ Ala, hira miꞌi to molámbiꞌ katehómpóꞌ ánti pepoináláiraꞌ.”#1:17 Básá woꞌo Habakuꞌ 2:4; Roma 3:21; Galatia 3:1-14, Pilipi 3:9; Iberani 10:38.

Handaꞌ tauna hintotoꞌ molámbiꞌ pehukuna Pueꞌ Ala ánti kamadósáraꞌ (1:18–3:20)

Handaꞌ tauna moisá kaꞌárána Pueꞌ Ala, agáiáná tiꞌaraheꞌ mau menómbá i Hia

18Hangko i surugáꞌ, Pueꞌ Ala haduduáNa mopatongawaꞌ kamabukoꞌNa#1:18 Pueꞌ Ala mopatongawaꞌ kamabukoꞌNa: Rápáꞌna, moliu kamarimi, linu, pepopeahiahiꞌ. Moliu woꞌo pehádintaꞌ láwiꞌ taisá kamasalaꞌtaꞌ. ánti upu-upu dósá to ara i laluraꞌ tauna hai upu-upu bábehiáraꞌ to kadake. Hai ánti bábehiáraꞌ to kadake iti, tauna mosápuáka paturoꞌ to toꞌu. 19Upu-upu tauna moisá miꞌi i laluraꞌ kana i Pueꞌ Ala, láwiꞌ Pueꞌ Ala haduduáNa to mopakanótóáheꞌ. 20Kehapiꞌ tiꞌara taita lenggeꞌna Pueꞌ Ala, agáiáná hangko i pewaliꞌána duniáꞌ, tauna moisá kaꞌárána Pueꞌ Ala, láwiꞌ hangko i upu-upu to Napopewaliꞌ, tongawaꞌ kamahilena tueꞌNa, hai tongawaꞌ woꞌo kuasaꞌNa to tiꞌara mokahópóꞌá. Mewaliꞌ, tiꞌara ara tauna to peisá manguliꞌ, “Tiꞌara kuisá kaꞌárána Pueꞌ Ala.” 21Kehapiꞌ raisá ntepuꞌu kaꞌárána Pueꞌ Ala, agáiáná tiꞌaraheꞌ mebiláꞌ, hai tiꞌaraheꞌ woꞌo metóiá. Pampekiriraꞌ tiꞌara mobunduꞌ, hai bebeheꞌ láwiꞌ laluraꞌ makáindi hai karaoꞌheꞌ hangko i Pueꞌ Ala. 22Rapekiri mapándeheꞌ, mole riꞌi bebeheꞌ! 23Tiꞌaraheꞌ mau menómbá i Pueꞌ Ala to tueꞌ haweꞌ i rue-ruena, hai to tiꞌara ara katebálikiáNa. Menómbáraheꞌ i lenggeꞌ ánitu to rabábehi haduduáraꞌ mouláꞌ lenggeꞌna tauna to hampaiꞌ peá katueꞌraꞌ i duniáꞌ deꞌe. Menómbá peheꞌ i ánitu to rabábehi nodo lenggeꞌ tádáhi ba binataꞌ to mendólóꞌ, hai binataꞌ to mobiti iba.#1:23 Deꞌe-deꞌe tauna masisiákáheꞌ mampeliꞌ bona mapángkáꞌ lántiꞌraꞌ, ba dóiꞌ, ba mampomahileheꞌ tauna ntániꞌna, duuꞌna mokáláliꞌámoheꞌ Pueꞌ Ala. Hibali hai menómbáheꞌ i ánitu.

24Mewaliꞌ, ánti katiꞌárána raundeꞌ tauna menómbá i Pueꞌ Ala, onoꞌ miꞌi haneꞌi Napatodáhimoheꞌ mouláꞌ peundeꞌána laluraꞌ to kadake, álána mobábehiheꞌ salaꞌ to metitidiꞌi hai mehihiliꞌi i wátáraꞌ hai i hángká rángáraꞌ. 25Tiꞌaraheꞌ mampoinálái apa to toꞌu mokana i Pueꞌ Ala, ngkáliꞌna raundeꞌ riꞌi mampoinálái apa to salaꞌ. Loheheꞌ menómbá i Pueꞌ Ala to mampopewaliꞌheꞌ, ngkáliꞌna to napopewaliꞌ riꞌi Pueꞌ Ala to rapenómbái hai to rapengkoruꞌi. Mole katoꞌuána, Tomampopewaliꞌ riꞌi to hangaa-ngaa tatóiá duuꞌna i rue-ruena. Ami!

26Mewaliꞌ, ánti katiꞌáráraꞌ mau menómbá i Pueꞌ Ala, agáiáná menómbáraheꞌ i to ntániꞌna, onoꞌ miꞌi haneꞌi Napatodáhimoheꞌ mouláꞌ peundeꞌána laluraꞌ to mepakahiliá iti, haweꞌ-haweꞌ i towawine, tiꞌarapoheꞌ mobábehi bábehiá to hintotoꞌ. Towawine mamposambokoá hangka towawinena. 27Noꞌonoꞌ woꞌo tobaleilo: tiꞌaraheꞌ mamposambokoá towawine, agáiáná moundeꞌraheꞌ hangka tobaleiloraꞌ. Tobaleilo mobábehi bábehiá to tiꞌara hintotoꞌ i hangka tobaleiloraꞌ, hai bábehiá iti mepakahiliá. Kahópóꞌána, molámbiꞌheꞌ pehuku to hintotoꞌ hai bábehiáraꞌ to salaꞌ ntepuꞌu iti.

28Ánti katiꞌáráraꞌ moundeꞌ mopangákuꞌ Pueꞌ Ala i lalu pekiriraꞌ, onoꞌ miꞌi haneꞌi Pueꞌ Ala mopatodáhi pekiriraꞌ mewaliꞌ kadake, álána mobábehiheꞌ to tiꞌara hintotoꞌ. 29Handaꞌ pákáꞌna dósá hai pekiri to tiꞌara manótó i laluraꞌ.

Kadake bábehiáraꞌ,

mehioroꞌ,

mopakadakeheꞌ tauna,

mahiniꞌheꞌ,

mepapateheꞌ,

mosisalaꞌheꞌ,

modongkoꞌheꞌ,

mombekáhihiꞌheꞌ

hai moánti-ántiheꞌ laluita.

30Mopapakóiꞌheꞌ hángká rángáraꞌ,

mokáhihiꞌheꞌ Pueꞌ Ala,

tiꞌaraheꞌ mebiláꞌ,

mampepemahileheꞌ,

hai mampopetóiáheꞌ.

Mampeliꞌheꞌ rárá to woꞌu mobábehi to kadake.

Tiꞌaraheꞌ mengkoruꞌ i tosaeraꞌ.

31Tiꞌaraheꞌ moundeꞌ moisá peundeꞌána Pueꞌ Ala,

tiꞌaraheꞌ mobukeki dándiraꞌ,

tiꞌaraheꞌ maꞌahiꞌ i hángká rángáraꞌ,

tiꞌaraheꞌ mambuhinao hángká rángáraꞌ.

32Moisá ntepuꞌuheꞌ áturána Pueꞌ Ala to manguliꞌ heáná peá to noꞌonoꞌ, hangaa-ngaa rahuku mate. Agáiáná kehapiꞌ noꞌonoꞌ, mobábehi peheꞌ oaꞌ bábehiá to kadake, hai mampokagóeꞌraheꞌ tauna to mobábehi woꞌo to noꞌonoꞌ.

Currently Selected:

Roma 1: NTBEP

Highlight

Compare

Copy