Roma 16
16
Tabeá hai paturoꞌ to kahópóꞌána
1Deꞌe-deꞌe, ina kupopaisáꞌákou kaheánána Pebe. Ia iti towawine to paka motulungi jemaꞌa to ara i wánuá Kengkerea. 2Kupembiáꞌ bona nitarima mpakaroꞌa i lalu hangaꞌna Pueꞌ Iesu, láwiꞌ ia halalu hampepepoináláimi. Hintotoꞌ nibábehi noꞌonoꞌ ánti peuláꞌmi i Iesu. Ane ara apa-apa to naparaluu, kupembiáꞌ bona nitulungi, láwiꞌ handaꞌ woꞌo tauna to natulungi, tepasuaꞌ kódóꞌ.
3Tabeángkuꞌ nipahaweꞌ i Pirikila hai Akila.#16:3 Básá Suro 18:2-3,18,26; 1 Korintu 16:19. Tohamboko iti rángángkuꞌheꞌ to mampopolumao woꞌo bágóꞌna Kerisitu Iesu. 4Hangkoia, hira hungkuꞌntoheꞌ ina rapapate i tempóraꞌ mampelae katueꞌkuꞌ. Ánti petulungiraꞌ iti, kuꞌuliꞌ handaꞌ kamaroꞌana, hai tiꞌara kódóꞌ peá, agáiáná upu-upu toSarani to tiꞌaraheꞌ toIahudiꞌ manguliꞌ woꞌo handaꞌ kamaroꞌana i hira.
5Nipahaweꞌ woꞌo tabeángkuꞌ i halalu hampepepoináláintaꞌ to hirámpu i támbiraꞌ Pirikila hai Akila.
Tabeá i Epenetu to kupokaꞌahiꞌ. Ia miꞌi to rungu-runguna mepoinálái i Kerisitu i poropensi Asia.
6Hai tabeá woꞌo i Maria.#16:6 Maria: Tiꞌara taisá heáná Maria iti. Rumihi pobágóꞌna motulungikou.
7Nipahaweꞌ woꞌo tabeángkuꞌ i Andoroniku hai Iunia.#16:7 Andoroniku hai Iunia: Babilaꞌ tohambokoheꞌ ba ntaliadi tobaleilo hai towawine. Hira iti, hangka toIahudiꞌkuꞌheꞌ to ratarungku hingkakani hai kódóꞌ. Hai hira iti rabiláꞌ ntepuꞌu upu-upu surona Kerisitu. Maruemoheꞌ mepoinálái i Kerisitu. Hangko tiꞌara maniaꞌ mepoinálái i Kerisitu, ambiꞌraꞌ miꞌi mepoinálái.
8Tabeá i Ampiatu to kupokaꞌahiꞌ i lalu hangaꞌna Pueꞌ Iesu.
9Tabeá i Ubanu, rángángkiꞌ mampopolumao bágóꞌna Kerisitu.
Tabeá woꞌo i Sataki to kupokaꞌahiꞌ.
10Tabeá i Apele to molámbiꞌ handaꞌ kapári, agáiáná kehapiꞌ noꞌonoꞌ, meuláꞌ mani i Kerisitu.
Tabeá i Aritobulu hantámbi hai upu-upu to toroꞌ i támbina.
11Tabeá i Herodio, hangka toIahudiꞌkuꞌ.
Tabeángkuꞌ woꞌo i Nakisu hantámbi hai upu-upu halalu hampepepoináláintaꞌ to toroꞌ i támbina.
12Tabeá i Tiripena hai Tiriposa. Towawine to roduaheꞌ iti, mampopolumaoheꞌ ntepuꞌuheꞌ bágóꞌna Pueꞌ.
Tabeá woꞌo i Perisi to kupokaꞌahiꞌ. Ia mobágóꞌ matimi mampopolumao bágóꞌna Pueꞌ.
13Tabeá i Rupuꞌ#16:13 Rupuꞌ: Básá Marakusi 15:21. Babilaꞌ ia ánáꞌna Simoꞌ hangko i Kirene to mopáháꞌá kau mombehape modurei Iesu. hai i hinána to kurekeꞌ nodo inángkuꞌ. Rupuꞌ iti to madota ntepuꞌu mampopolumao bágóꞌna Pueꞌ.#16:13 Rupuꞌ iti to madota ntepuꞌu mampopolumao bágóꞌna Pueꞌ - I lalu básá Iunani: Rupuꞌ iti napileꞌi Pueꞌ Ala. Upu-upu tauna to mepoinálái napileꞌi Pueꞌ Ala, lempóna to natunggái ieneꞌ melumbuꞌ hangko ionoꞌ.
14Nipahaweꞌ tabeángkuꞌ i Asikiritu, Pelego, Heme, Patoroba, Herema hai upu-upu halalu hampepepoináláintaꞌ to hirámpu hingkakani hai hira.
15Tabeá i Pilologu, Iulia, Nereu hai ádina towawine, hai tabeá woꞌo i Olimpa hai upu-upu halalu hampepepoináláintaꞌ to hirámpu hingkakani hai hira.
16Mombetabe-tabemokou hangko i lalumi ntepuꞌu.
Upu-upu jemaꞌa ieneꞌ mopakatu tabeáraꞌ haweꞌ i kómu.
17Halalu-halalu, kupembiáꞌ ntepuꞌu i kómu: hangaa-ngaa maingáꞌ-ingáꞌkou i tauna to mopaꞌara posisalaꞌ i oloꞌraꞌ tauna to mepoinálái. Mampoinaoheꞌ mopakanawoꞌkou moliu paturoꞌraꞌ to mosisalaꞌ hai paturoꞌ to rapaturoꞌámokou. Nikaraohiheꞌ tauna to noꞌonoꞌ! 18Láwiꞌ tauna to noꞌonoꞌ bábehiáraꞌ, tiꞌaraheꞌ mampopolumao bágóꞌna Pueꞌtaꞌ Kerisitu, agáiáná mouláꞌ peheꞌ peundeꞌána laluraꞌ haduduáraꞌ. Mopamaluluheꞌ laluraꞌ tauna moliu laluitaraꞌ, haneꞌi mopakanawoꞌheꞌ tauna to tiꞌara maniheꞌ moisá apa-apa. 19Agáiáná ane kómu, handaꞌ miꞌi tauna to moisá pengkoruꞌmi i paturoꞌna Pueꞌ Ala. Góeꞌaꞌ i kakuhádina bábehiámi iti. Peundeꞌángkuꞌ bona niꞌisá ntepuꞌu i lalu katueꞌmi apa to maroꞌa hai apa to tiꞌara maroꞌa. 20Pueꞌ Ala to mampoweꞌikeꞌ katinda lalu, Ia to ina moropuꞌ kuasaꞌna Datu Tokadake, hai Ia mampoweꞌikeꞌ kuasaꞌ monangi Datu Tokadake iti.#16:20 Básá Pewaliꞌána 3:15.
Mekakaeaꞌ i Pueꞌ Ala bona nawátiꞌkou oaꞌ Pueꞌtaꞌ Iesu Kerisitu. Ami!
21Timotiu#16:21 Timotiu: Básá Suro 16:1-3; 17:14-15; 20:3-4. rángángkuꞌ mobágóꞌ, mopahaweꞌ tabeána i kómu halalu hampepepoináláingkiꞌ to toroꞌ i Roma. Noꞌonoꞌ woꞌo Lukiu,#16:21 Lukiu: Básá Suro 13:1. Iaso#16:21 Iaso: Básá Suro 17:5-9. hai Sosipate,#16:21 Sosipate: Básá Suro 20:4. Babilaꞌ Sosipate hai Sopate hibali. hangka toIahudiꞌkuꞌheꞌ.
22Kódóꞌ Teretiu to mewaliꞌ topoukiꞌna Paulu sura deꞌe. I lalu hangaꞌna Pueꞌ Iesu, mopahaweꞌaꞌ woꞌo tabeángkuꞌ haweꞌ i kómu.
23Gaiu#16:23 Gaiu: Básá 1 Korintu 1:14. woꞌo mopahaweꞌ tabeána. Kódóꞌ Paulu, toroꞌaꞌ i támbina, hai jemaꞌa i kótá deꞌe pakaheꞌ hirámpu ieneꞌ. Eratu to mokádipurá dóiꞌ kótá, hai halaluntaꞌ woꞌo Kuartu mopahaweꞌ tabeáraꞌ. [ 24Ahiꞌ to mahile hangko i Pueꞌtaꞌ Iesu Kerisitu mamporángákou upu-upu. Ami.]#16:24 I surana Paulu deꞌe (Roma) básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ.
25Tatóiá miꞌi Pueꞌ Ala, láwiꞌ Ia to makuasaꞌ mopakaróhó pepoináláimi moliu Ngkóráꞌ Marasa to kupahaweꞌákou, bona niꞌisá kaheánána Iesu Kerisitu. I átuna miꞌi parena, Ngkóráꞌ Marasa mokana i Iesu Kerisitu iti tewuniángi. 26Agáiáná deꞌe-deꞌe Pueꞌ Ala to tueꞌ duuꞌna i rue-ruena, mopatongawaꞌámokeꞌ tunggáiáNa, onoꞌ haneꞌi taisá miꞌi lempóna apa to raukiꞌ nabiꞌ-nabiꞌ hangkoia. TunggáiáNa iti rapahaweꞌ i tauna i humalele duniáꞌ hiolaꞌ hai párentáNa, bona upu-upu tauna peisá mepoinálái hai mengkoruꞌ i Hia.
27Ia miꞌi to moisá upu-upuna.
Ia miꞌi to tiꞌara ara kahibaliána.
Tatóiá miꞌi Pueꞌ Ala duuꞌna i rue-ruena
ánti bágóꞌna Iesu Kerisitu. Ami!
Hangko i kódóꞌ,
PAULU
Currently Selected:
Roma 16: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
