Roma 15

Hangaa-ngaa tatulungi hángká rángántaꞌ, tiꞌara peá wátántaꞌ haduduántaꞌ

1Kitaꞌ to maróhó pepoináláintaꞌ i Pueꞌ Ala, hangaa-ngaa sabaraꞌkeꞌ i hángká rángántaꞌ to bata-bata mani laluraꞌ, láwiꞌ tiꞌara mani maróhó pepoináláiraꞌ. Ineeꞌ mampeliꞌ pekeꞌ kagóeꞌántaꞌ haduduántaꞌ, 2ngkáliꞌna riꞌi, kitaꞌ upu-upu hangaa-ngaa mobábehikeꞌ bábehiá to mopagóeꞌ laluna rángántaꞌ hai motulungikeꞌ hángká rángántaꞌ bona maróhó pepoináláiraꞌ. 3Talámbiꞌ pándiriꞌ hangko i Kerisitu, láwiꞌ Ia woꞌo tiꞌara mampeliꞌ kagóeꞌáNa haduduáNa. {Ánti pampeuláꞌiNa peundeꞌána Pueꞌ Ala, Nalámbiꞌ handaꞌ kapári,} nodo to teukiꞌ hangkoia i lalu Sura Magasaꞌ mokana i Pueꞌ Iesu: “Upu-upu laluita to mopakóiꞌ Pueꞌ Ala, kana miꞌi woꞌo i Kódóꞌ.”#15:3 Básá Sura Petóiá 69:10b. 4Upu-upu to teukiꞌ hangkoia i lalu Sura Magasaꞌ, teukiꞌ bona mopaturoꞌkeꞌ. Hangko i paturoꞌ to tahumba i lalu Sura Magasaꞌ iti, peisákeꞌ mantaha i lalu kapári, hai tepalindó laluntaꞌ bona maróhó pehárungántaꞌ i Pueꞌ Ala.

5Pueꞌ Ala to motulungikeꞌ bona mantahakeꞌ i lalu kapári, hai Ia to mopakaróhó laluntaꞌ. Mekakaeaꞌ i Hia bona mohintuwuꞌkou hadua hai hadua mouláꞌ peundeꞌána Kerisitu Iesu, 6bona hampepekirikou, hai hingkakanikou motóiá Pueꞌ Ala Umána Iesu Kerisitu Pueꞌtaꞌ.

Ngkóráꞌ Marasa i toIahudiꞌ hai tauna to tiꞌara toIahudiꞌ

7Mewaliꞌ halalu-halalu, onoꞌ miꞌi haneꞌi Kuhángáꞌáꞌákou: hangaa-ngaa nitarima maroꞌa halalu hampepepoináláimi, nodo woꞌo Kerisitu motarimakou. Ane onoꞌ to nibábehi, Pueꞌ Ala ina rapomahile. 8Hangaa-ngaa nipailalu laluitangkuꞌ deꞌe: Kerisitu mai i duniáꞌ bona motulungiangkaiꞌ toIahudiꞌ, bona tongawaꞌ Pueꞌ Ala mobukeki dándina i toiorungkiꞌ. 9Hai kamaina Kerisitu iti, Ia mai mobungkáhi rárá bona tauna to tiꞌaraheꞌ toIahudiꞌ peisáheꞌ woꞌo molámbiꞌ katehómpóꞌ hai motóiáheꞌ Pueꞌ Ala ánti kamahilena ahiꞌNa i hira. Iti to natunggái i lalu Sura Magasaꞌ to manguliꞌ node:

“Ó Pueꞌ Ala, ina kupomahileKoꞌ i oloꞌraꞌ tauna

to tiꞌaraheꞌ toIahudiꞌ.

Ina monaniaꞌ motóiá hangaꞌMu.” (2 Semueli 22:50; Sura Petóiá 18:50)

10Ara woꞌo laluita to teukiꞌ hangkoia i lalu Sura Magasaꞌ to manguliꞌ node:

“Kómu to tiꞌarakou toIahudiꞌ,

góeꞌkou hingkakani hai toIahudiꞌ

to Napileꞌi miꞌi Pueꞌ Ala hangkoia.” (Pohuleki 32:43)

11Ara woꞌo laluita to teukiꞌ node:

“Nitóiá miꞌi Pueꞌ, upu-upukou to tiꞌara toIahudiꞌ.

Kómu upu-upu tauna to tueꞌ i duniáꞌ, nitóiá miꞌi Pueꞌ!” (Sura Petóiá 117:1)

12Ara woꞌo laluita to naukiꞌ nabiꞌ Iesaia hangkoia to manguliꞌ node:

“Hangko i pemuleꞌána Isai,#15:12 Isai: Ia miꞌi umána Datu Daudiꞌ. Básá Ruti 4:22; 1 Semueli 16. ina mesupaꞌ Hadua#15:12 ina haweꞌ Hadua: Ia miꞌi Iesu.

to ina mopárentá tauna to tiꞌaraheꞌ toIahudiꞌ.

Ia miꞌi to ina mewaliꞌ pehárungáꞌáraꞌ.” (Iesaia 11:10)

13Kupembiáꞌ bona Pueꞌ Ala, ntóáꞌna pehárungáꞌántaꞌ, mampoweꞌikou kagóeꞌ lalu hai roꞌa ngkatueꞌ ánti pepoináláimi i Pueꞌ Iesu. Kupembiáꞌ noꞌonoꞌ, bona moliu kuasaꞌna Inao to Magasaꞌ ina tetámbái kamaróhóna pehárungámi i Hia.

Tunggáiána Paulu moukiꞌ sura deꞌe

14Halalu-halalu! Kupoinálái upu-upu to nibábehi maroꞌa ntepuꞌu. Niꞌisá ntepuꞌu paturoꞌ hangko i Ngkóráꞌna Pueꞌ, hai niꞌisá mombepaturoꞌ hadua hai hadua. 15Agáiáná kehapiꞌ noꞌonoꞌ, i lalu surangkuꞌ deꞌe, pebáiꞌaꞌ mopaturoꞌákou bahangapa pákáꞌna paturoꞌ. Tunggáiángkuꞌ bona mampopambuhinaoákou huleꞌ paturoꞌ to nitarima miꞌi, láwiꞌ ánti kabulána laluNa, 16Pueꞌ Ala mopileꞌiaꞌ mewaliꞌ topobágóꞌna Kerisitu Iesu, hai Nahuoꞌaꞌ lao i tauna to tiꞌaraheꞌ toIahudiꞌ. Bágóꞌkuꞌ iti peisá rapándiriꞌ nodo pobágóꞌna tadulako menómbá, láwiꞌ mopahaweꞌaꞌ Ngkóráꞌ Marasa. Hai hira to tiꞌaraheꞌ toIahudiꞌ, to mepoinálái i Pueꞌ Iesu ánti pobágóꞌkuꞌ iti, kurekeꞌheꞌ nodo popenómbángkuꞌ i Pueꞌ Ala. Hai popenómbángkuꞌ iti, bateꞌna natarima Pueꞌ Ala, láwiꞌ Inao to Magasaꞌ to mopamagasaꞌheꞌ hai mampopewaliꞌheꞌ taunána Pueꞌ Ala.

17Ánti pohintuwuꞌkuꞌ hai Kerisitu Iesu, góeꞌ ntepuꞌu lalungkuꞌ mampopolumao bágóꞌ to naweꞌiaꞌ Pueꞌ Ala. 18Tiꞌaraꞌaꞌ pebáiꞌ mampolaluita apa peá ane tiꞌara kana i apa to nabábehi Kerisitu moliu kódóꞌ. Kubábehi iti bona tauna to tiꞌara toIahudiꞌ, peisáheꞌ mepoinálái moliu paturoꞌkuꞌ, bábehiángkuꞌ, 19hai tandaꞌ kuasaꞌ to kubábehi.#15:19 Tandaꞌ kuasaꞌ to nabábehi Paulu ia miꞌi: mopabilo tauna to kadake (Suro 13:11), mopakauriꞌ topaluꞌ (Suro 14:8-10), mopakauriꞌ tauna hai mampopesuwuꞌ setáꞌ (Suro 19:11-12), mampekakaeá tomate haneꞌi tueꞌ huleꞌ (Suro 20:9-10), hai hangaa-ngaa ara woꞌo tandaꞌ kuasaꞌ to ntániꞌna. Upu-upuna iti mewaliꞌ ánti kuasaꞌna Inao to Magasaꞌ. Hangko i kótá Ierusale duuꞌna haweꞌ i tampoꞌ Iliriku,#15:19 Iliriku: tándáꞌ i wongko tampoꞌ Makedonia. Deꞌe-deꞌe rauliꞌ tampoꞌ Albania, Yugoslavia, hai Bosnia-Herzegovnia. kupahaweꞌámoheꞌ Ngkóráꞌ Marasa i katoꞌu-toꞌuána. 20Deꞌe miꞌi tunggáiángkuꞌ: tiꞌara kuꞌundeꞌ moánti Ngkóráꞌ Marasa i tauna to mohádimoheꞌ hangko i tauna ntániꞌna,#15:20 tiꞌara kuꞌundeꞌ moánti Ngkóráꞌ Marasa i tauna to mohádimoheꞌ hangko i tauna ntániꞌna - Básá Iunani: tiꞌara kuꞌundeꞌ moaró támbi i wongko watu to naꞌaró tauna ntániꞌna. agáiáná kuꞌundeꞌ moánti Ngkóráꞌ Marasa i tampoꞌ ntániꞌna, i tauna to tiꞌara maniheꞌ moisá mokana i Kerisitu. 21Kupoinao mobukeki laluita i lalu Sura Magasaꞌ to manguliꞌ node:

“Tauna to tiꞌara maniheꞌ rabámbáriá kana i Hia,

ina moisá ntepuꞌuheꞌ kaheánáNa.

Tauna to tiꞌara maniheꞌ hangkani mohádi bámbáriNa,

ina moisá ntepuꞌuheꞌ lempóna bámbári iti.” (Iesaia 52:15)

Poliwona Paulu lao moweoꞌ toSarani to toroꞌ i kótá Roma

22Tiꞌara mani ara tempóngkuꞌ lao moweoꞌkou, láwiꞌ tepatuhuaꞌ hai bágóꞌkuꞌ {moánti Ngkóráꞌ Marasa i tauna to tiꞌara mani mohádi}. 23Agáiáná deꞌe-deꞌe, hópóꞌ miꞌi bágóꞌkuꞌ iti i tampoꞌ deꞌe. Mewaliꞌ, kuhárungá ina ara tempóngkuꞌ mampombelámbiꞌákou i kótámi. I parena miꞌi kupoinao ina laoaꞌ i kómu. 24Hai ane laoaꞌ i tampoꞌ Sapanio, bateꞌna ina mehupeꞌaꞌ i kótámi iti. Mewaliꞌ, kahópóꞌána ina góeꞌaꞌ, kehapiꞌaꞌ tiꞌara marue hingkakani hai kómu. Hai kuhárungá ina nipopeángkáꞌaꞌ maroꞌa ane liliuaꞌ lao i Sapanio. 25Agáiáná deꞌe-deꞌe tangaꞌkuꞌ lao i kótá Ierusale moánti dóiꞌ petulungi hangko i toSarani to ara ieneꞌ. Dóiꞌ iti rapakatu i toIahudiꞌ to hampepepoináláintaꞌ, 26láwiꞌ toSarani to tiꞌaraheꞌ toIahudiꞌ i tampoꞌ Makedonia hai Akaia deꞌe, morámpumoheꞌ dóiꞌ bona raweꞌi to meahiahiꞌ tueꞌraꞌ i oloꞌraꞌ halalu hampepepoináláintaꞌ to ara i Ierusale.#15:26 Básá Suro 11:29-30; 24:17; 1 Korintu 16:1-4; 2 Korintu gáláꞌna 8 haweꞌ 9; Galatia 2:10. 27Bábehiáraꞌ iti mentóáꞌ hangko i kagóeꞌna laluraꞌ, hai hintotoꞌ ntepuꞌu tauna to tiꞌara toIahudiꞌ motulungi toIahudiꞌ mouláꞌ pebukuáraꞌ, láwiꞌ Pueꞌ Ala mowátiꞌheꞌ moliu toIahudiꞌ. 28Mewaliꞌ, ina laoaꞌ sieruꞌ i Ierusale moánti dóiꞌ petulungi to rarámpu miꞌi, hangko laoraꞌaꞌ i tampoꞌ Sapanio, hai ina mehupeꞌaꞌ i kótámi. 29Kuisá, ane haweꞌaꞌ i kómu, handaꞌ pewátiꞌ to hangko i Kerisitu ina nilámbiꞌ moliu kódóꞌ.

30Halalu-halalu! Mohintuwuꞌmokeꞌ hai Pueꞌtaꞌ Iesu Kerisitu, hai mombepokaꞌahiꞌkeꞌ ánti pokalena Inao to Magasaꞌ i laluntaꞌ. Onoꞌ miꞌi haneꞌi kupembiáꞌ bona madota ntepuꞌukou mampekakaeáꞌaꞌ i Pueꞌ Ala. 31Mekakaekou bona Pueꞌ Ala mokámpáiaꞌ hangko i tauna to tiꞌaraheꞌ mepoinálái i Iesu ane laoaꞌ i tampoꞌ Iudá. Mekakaekou woꞌo bona toSarani to i Ierusale ina motarima maroꞌa dóiꞌ petulungi to kuánti deꞌe. 32Kahópóꞌána, ane napokana Pueꞌ Ala, ina haweꞌaꞌ i kótámi i lalu kagóeꞌ-góeꞌ, hai ina lindó lalungkuꞌ ane araꞌaꞌ hingkakani hai kómu. 33Kupembiáꞌ i Pueꞌ Ala to mampoweꞌikeꞌ roꞌa ngkatueꞌ bona mamporángákou upu-upu. Ami!

Currently Selected:

Roma 15: NTBEP

Highlight

Compare

Copy