Surona Pueꞌ Iesu 21
21
Paulu lao i kótá Ierusale
1Karoongkiꞌ mepálákáná i tadulakoraꞌ toSarani to hangko i kótá Epesu, kipaliliu polumaongkiꞌ lao i tampoꞌ Siria. Mengkaheꞌangkaiꞌ i duanga tahiꞌ liliu lao i puló Kos, hai kahalona haweꞌangkaiꞌ i puló Rodo. Hangko ionoꞌ, liliuangkaiꞌ lao i wánuá Patara. 2I Patara, molámbiꞌangkaiꞌ hambuaꞌ duanga tahiꞌ to lao i roboꞌ Penisia i tampoꞌ Siria.#21:2 Hangko i kótá Patara (wátiꞌna ka-2) haweꞌ i Tiru (wátiꞌna ka-3) rekeꞌ-rekeꞌna ini átuna lima puloꞌna kiló kakaraoꞌna. Mewaliꞌ mengkaheꞌangkaiꞌ i duanga tahiꞌ iti, mopaliliu polumaongkiꞌ. 3I tangaꞌ polumaongkiꞌ, moitaꞌangkaiꞌ puló Sipuru tándáꞌ i kabeoꞌkiꞌ, agáiáná liliu peangkaiꞌ duuꞌna haweꞌangkaiꞌ i tampoꞌ Siria. Mendáuluangkaiꞌ hangko i duanga tahiꞌ i kótá Tiru,#21:3 kótá Tiru: Rekeꞌ-rekeꞌna hangatu pitu puloꞌna hai lima kilómete tándáꞌ i wongko i katámpuá alo hangko i kótá Ierusale. láwiꞌ inántina duanga hangaa-ngaa ratáurá ionoꞌ. 4Tangaꞌkiꞌ mampegiá duanga iti, laoangkaiꞌ moweoꞌ toSarani to ara ionoꞌ,#21:4 Ánti pepopeahiahiꞌ to mewaliꞌ karoona Setepanu rapapate (básá Suro 8:1,4; 11:19), handaꞌ toSarani melangka lao i katoroꞌá ntániꞌna. Babilaꞌ hira miꞌi to moánti Ngkóráꞌ Marasa haneꞌi ara jemaꞌa-jemaꞌa i roboꞌ Penisia (wátiꞌna ka-3), tepasuaꞌ jemaꞌa i kótá Tiru (wátiꞌna ka-4) hai kótá Petolemai (wátiꞌna ka-7). hai toroꞌangkaiꞌ hingkakani hai hira haminggu kamaruena. Ánti peteteꞌna Inao to Magasaꞌ, tauna to mepoinálái to ara i Tiru mopaingáꞌi Paulu bona ineeꞌ liliu lao i Ierusale.#21:4 Naisá miꞌi Paulu ia hangaa-ngaa lao i Ierusale, hai naisá woꞌo ina molámbiꞌ kapári ionoꞌ. Básá Suro 20:22-24. 5Agáiáná haweꞌ miꞌi tempóna kaꞌina pohuꞌna duanga tahiꞌ, onoꞌ miꞌi haneꞌi ina kipaliliu polumaongkiꞌ lao i Ierusale. Mewaliꞌ upu-upu tauna to mepoinálái hai toináraꞌ hai ánáꞌraꞌheꞌ mamporángáꞌangkaiꞌ lao i rawa kótá. I wiwi tahiꞌ, molingkudu hai mekakaeangkaiꞌ. 6Karoongkiꞌ mekakae, mepálákánámongkaiꞌ haneꞌi mengkaheꞌangkaiꞌ i duanga tahiꞌ, hai tauna to laoangkaiꞌ mowawa, mesuleꞌmoheꞌ woꞌo lao i támbiraꞌ.
7Hangko i kótá Tiru, liliuangkaiꞌ haweꞌ i kótá Petolemai. Ionoꞌ moweoꞌangkaiꞌ halalu hampepepoináláingkiꞌ hai kipombetabeáheꞌ. Hambengiangkaiꞌ hai hira. 8Kahalona, pohuꞌ wopangkaiꞌ lao i kótá Kaisarea. Ionoꞌ toroꞌangkaiꞌ i támbina Pilipu. Pilipu iti, hadua topoánti Ngkóráꞌ Marasa, hai ia woꞌo hadua hangko i tauna to pitu to rapileꞌi mewaliꞌ diaken i Ierusale hangkoia.#21:8 Pilipu: Básá Suro 6:1-7. Lukasi mopakeꞌ laluita “topoánti Ngkóráꞌ Marasa”, bona tongawaꞌ tiꞌara hibali hai Pilipu topeguruna Iesu (básá Suro 1:13). Babilaꞌ Pilipu iti to rungu-runguna moánti Ngkóráꞌ Marasa i Kaisarea (básá Suro 8:1-40). 9Araheꞌ iba ánáꞌna towawine to tiꞌara mani mohamboko. Upu-upuheꞌ mewaliꞌ nabiꞌ toSarani.
10Bahangapa miꞌi alongkiꞌ i támbina Pilipu, haweꞌ miꞌi hadua nabiꞌ toSarani hangko i tampoꞌ Iudá. Hangaꞌna Agabu. 11Ia moala pámpouna Paulu haneꞌi mampopotimpuku bitina hai taena haduduána. Roo onoꞌ, nauliꞌ, “Deꞌe miꞌi to napahaweꞌ Inao to Magasaꞌ: Pueꞌna pampou#21:11 pampou: Báná to raweweha i hopeꞌ mewaliꞌ petakaꞌna badu nodo pampou. deꞌe ina rahakaꞌ toIahudiꞌ i Ierusale. Ia ina ratimpuku nodeꞌe, hai ina rahuhuꞌáheꞌ tauna to tiꞌara toIahudiꞌ.”
12Kakihádina noꞌonoꞌ, kaiꞌ hai rángángkiꞌ i Kaisarea, kipembiáꞌ mpuꞌu i Paulu bona ineeꞌ liliu lao i Ierusale. 13Agáiáná nahánikiangkaiꞌ, nauliꞌ, “Moapa riꞌi haneꞌi teriaꞌkou? Ineeꞌkou mopamasusa lalungkuꞌ! Tiꞌaraꞌaꞌ agi ratimpuku peaꞌ, mogalo riꞌi rapapateaꞌ ánti peuláꞌkuꞌ i Pueꞌ Iesu, timamamoꞌ lao i Ierusale.”
14Ánti katiꞌárána mampokana pekóntóngkiꞌ, onoꞌ miꞌi haneꞌi tiꞌara piꞌi kikóntó. Kiuliꞌ perái, “Peundeꞌána peá Pueꞌ to mewaliꞌ.”
15Roo onoꞌ, kikádipurá miꞌi tasingkiꞌ haneꞌi pohuꞌangkaiꞌ lao i kótá Ierusale. 16Bahangapa halalu hampepepoináláingkiꞌ hangko i kótá Kaisarea mamporángáꞌangkaiꞌ duuꞌna haweꞌ i támbi katoroꞌángkiꞌ i kótá Ierusale.#21:16 Kótá Kaisarea Pilipi rekeꞌ-rekeꞌna hangatu hai iba kilómete hangko i kótá Ierusale. Támbi katoroꞌángkiꞌ iti ia miꞌi támbina Manaso, hadua tauna hangko i puló Sipuru, to marue miꞌi mepoinálái i Iesu.
Paulu moweoꞌ Iakobu
17Kahaweꞌkiꞌ i kótá Ierusale, halalu hampepepoináláingkiꞌ motarimaꞌangkaiꞌ maroꞌa hai góeꞌ laluraꞌ. 18Kahalona meuláꞌangkaiꞌ i Paulu lao moweoꞌ Iakobu#21:18 Iakobu iti ia miꞌi ádina Iesu. Ia moukiꞌ woꞌo Surana Iakobu. Básá woꞌo Matiu 13:55; Marakusi 6:3; Suro 15:13; 1 Korintu 15:7. {tadulakoraꞌ toSarani i Ierusale}. Upu-upu tadulako ntániꞌna hirámpu woꞌo ionoꞌ. 19Karoongkiꞌ mombetabe, Paulu mopahaweꞌ upu-upu to nabábehi Pueꞌ Ala i tempóna moánti Ngkóráꞌ Marasa i tauna to tiꞌara toIahudiꞌ.
20Karahádina laluitana Paulu, motóiáheꞌ Pueꞌ Ala haneꞌi rauliꞌ, “Halalungkiꞌ Paulu, bona nuisá, i sábuna miꞌi hangka toIahudiꞌtaꞌ to mepoinálái i Iesu. Upu-upuheꞌ maróhó pampeuláꞌiraꞌ Paturoꞌna Musa. 21Mohádimoheꞌ woꞌo bámbári to mosalaꞌikoꞌ. Ara to manguliꞌ, nupaturoꞌheꞌ toIahudiꞌ to toroꞌ i wánuáraꞌ tauna to tiꞌara toIahudiꞌ, bona tiꞌarapoheꞌ paraluu mampeuláꞌi Paturoꞌna Musa. Hai rauliꞌ woꞌo, nupaturoꞌheꞌ bona ineeꞌheꞌ motileꞌ ánáꞌraꞌ hai ineeꞌheꞌ woꞌo mampeuláꞌi ádáraꞌ toioruntaꞌ. 22Mewaliꞌ noumbá miꞌi? Bateꞌna ina rahádi kahaweꞌmu miꞌi ieneꞌ. 23Maroꞌa riꞌi ane nupeuláꞌi paturoꞌkiꞌ deꞌe. Ieneꞌ araheꞌ iba rángángkiꞌ to mopaꞌara miꞌi podándi i Pueꞌ Ala. 24Mewaliꞌ, hangaa-ngaa laokoꞌ i Támbina Pueꞌ Ala hingkakani hai tauna to iba iti, nupamagasaꞌ woꞌo mouláꞌ ádá ágámántaꞌ. Hai hangaa-ngaa nubaiari woꞌo binataꞌ popenómbáraꞌ, bona tauna iti peisá ralóli weluáꞌraꞌ mouláꞌ dándiraꞌ. Ane nubábehi noꞌonoꞌ, ina tongawaꞌ i upu-upu tauna katiꞌárána toꞌu bámbári to rahádi mosalaꞌikoꞌ, láwiꞌ nupeuláꞌi woꞌo Paturoꞌna Musa. 25Mewaliꞌ, iti miꞌi laluitangkiꞌ i hio Paulu. Agáiáná i tauna to tiꞌara toIahudiꞌ to mepoináláiheꞌ i Iesu, roomoheꞌ kipopakatuá sura mopahaweꞌáheꞌ pobutusingkiꞌ, bona ineeꞌheꞌ mandeꞌ pandeꞌ to rapopenómbá i ánitu, hai ineeꞌheꞌ woꞌo mandeꞌ waheꞌ ba bauꞌ to tiꞌara rapopesuwuꞌ sieruꞌ waheꞌna, hai bona ineeꞌheꞌ motoina ba motoama deleꞌ, hai ineeꞌheꞌ mebualosi.”
26Napeuláꞌi ntepuꞌu Paulu paturoꞌraꞌ iti, onoꞌ miꞌi haneꞌi kahalona ia lao hingkakani hai tauna to iba iti, hai mantepuꞌuheꞌ mouláꞌ ádá popamagasaꞌ. Roo onoꞌ, mesuaꞌ miꞌi Paulu i tangabaa Támbina Pueꞌ Ala#21:26 tangabaa Támbina Pueꞌ Ala: Tadulako menómbá peheꞌ to peisá mesuaꞌ i lalu Támbina Pueꞌ Ala. Tauna ntaniꞌ mesuaꞌ peheꞌ i tangabaa. mopahaweꞌ i tadulako menómbá kaimpirána ina hópóꞌ alo popamagasaꞌ iti. Ane hópóꞌ miꞌi tempóna, Paulu hai tauna to iba iti hangaa-ngaa moánti hai mampeweꞌiheꞌ popenómbáraꞌ hadua-hadua.
Paulu rahakaꞌ i Támbina Pueꞌ Ala
27Ina hópóꞌ miꞌi pitu alona popamagasaꞌ to rapakanótó iti, bahangapaheꞌ toIahudiꞌ hangko i poropensi Asia moita Paulu i Támbina Pueꞌ Ala. Mopamaꞌamuꞌheꞌ laluraꞌ tauna to handaꞌ bona mohakaꞌheꞌ Paulu. 28Mongangaheꞌ rapasimbuku, rauliꞌ, “Halalu-halalu toSáráeliꞌ! Maimokou! Nidureiangkaiꞌ! Tauna deꞌe, iumbá-umbá peá kalaoána, mopaturoꞌ tauna bona moewaꞌkeꞌ toIahudiꞌ. Ia woꞌo mosápuáka Paturoꞌna Musa hai motitibei Támbina Pueꞌ Ala deꞌe! Hai pelumbuꞌ mani, ia moánti mai tauna to tiꞌara toIahudiꞌ mesuaꞌ i lalu Támbina Pueꞌ Ala, haneꞌi támbi to magasaꞌ deꞌe rapakedái!” 29Molaluitaheꞌ noꞌonoꞌ, láwiꞌ ininá moitaheꞌ Toropimu hingkakani hai Paulu i lalu kótá, onoꞌ haneꞌi rauliꞌ ripaꞌi, Toropimu iti naꞌánti Paulu mesuaꞌ i Támbina Pueꞌ Ala, mole tiꞌara toꞌu.#21:29 Tauna to tiꞌara toIahudiꞌ hangaa-ngaa menómbáheꞌ i tangabaa to tepataniꞌáheꞌ peá. Toropimu ia miꞌi toEpesu, tiꞌara toIahudiꞌ.
30Karahádina Támbina Pueꞌ Ala rapakedái, mohewomoheꞌ tauna i humalele kótá Ierusale, haneꞌi mobábáráráheꞌ lao i Támbina Pueꞌ Ala. Paulu rahakaꞌ hai radiiꞌ soso lao i rawa. Roo onoꞌ, babaꞌ Támbina Pueꞌ Ala kásáliu ratuko.#21:30 Babaꞌna Támbina Pueꞌ Ala ratuko láwiꞌ rauliꞌ riꞌi rapakedái miꞌi, hai hangaa-ngaa rapamagasaꞌ huleꞌ hangko tiꞌara piꞌi peisá rapakeꞌ menómbá popenómbá i Pueꞌ Ala. 31Tangaꞌraꞌ tauna to handaꞌ ina mopapate Paulu, araheꞌ to lao mopahaweꞌ apa to pewaliꞌ iti i kapalaꞌ tadulako surudadoꞌ toRoma. Rauliꞌ kaꞌárána pohiho to rumihi i humalele kótá. 32Mewaliꞌ kapalaꞌ tadulako surudadoꞌ iti hawiáꞌ moánti bahangapa surudadoꞌ hai tadulakoraꞌ, melangkaheꞌ monóntóhi tauna to handaꞌ iti. Karaitána tauna to handaꞌ kahaweꞌraꞌ surudadoꞌ iti, kásáliu mengkarooheꞌ mopapahái Paulu. 33Roo onoꞌ, kapalaꞌ tadulako surudadoꞌ iti mohakaꞌ Paulu hai mohuoꞌ surudadoꞌna morante taena rombali, haneꞌi napekuneꞌ, “Heáná tauna deꞌe? Apa to nabábehi?” 34Araheꞌ to mohániki nodeꞌe, araheꞌ woꞌo to mohániki nodoꞌo. Ánti pohewo-heworaꞌ, maꞌángkárá kanaisána apa katoꞌuána to pewaliꞌ, onoꞌ miꞌi haneꞌi nahuoꞌheꞌ surudadoꞌna moánti Paulu lao i lalu támbi surudadoꞌ. 35Kahaweꞌraꞌ i tukaꞌ támbi iti, mabukoꞌ ntepuꞌuheꞌ tauna to handaꞌ, onoꞌ miꞌi haneꞌi surudadoꞌ iti hangaa-ngaa mokowaꞌheꞌ Paulu. 36Tauna to handaꞌ meuláꞌheꞌ oaꞌ, hai monganga-ngangaheꞌ, rauliꞌ, “Nipapate pemiꞌi!”
Paulu membiáꞌ tempó molaluita i tauna to handaꞌ
37Ina mesuaꞌmoheꞌ i lalu támbi surudadoꞌ, napembiáꞌ Paulu i kapalaꞌ tadulako surudadoꞌ, nauliꞌ, “Ba peisáꞌaꞌ molaluita hampaiꞌ?”
Nauliꞌ kapalaꞌ tadulako surudadoꞌ iti, “Ee! Nuisá rikaa paꞌi mobásá Iunani?! 38Ane noꞌonoꞌi, io tiꞌarakoꞌ toMásiriꞌ to hangko roo mopamaꞌamuꞌ laluraꞌ tauna to handaꞌ hai moánti iba sábuna topeꞌewaꞌ lao i pádá loriꞌ.”
39Nahániki Paulu, “Kódóꞌ deꞌe toIahudiꞌaꞌ, hangko i kótá Tarusu, kótá to tekahangaꞌiá i poropensi Kilikia. Kupembiáꞌ bona nuweꞌiaꞌ tempó mopahaweꞌ laluitangkuꞌ i tauna to handaꞌ deꞌe.”
40Mewaliꞌ naweꞌi miꞌi tempó molaluita, onoꞌ haneꞌi meángkáꞌ miꞌi Paulu i tukaꞌ haneꞌi tauna to handaꞌ napakaniiꞌheꞌ hai taena. Roo onoꞌ, mantepuꞌu miꞌi Paulu molaluita i lalu básáraꞌ toIahudiꞌ.#21:40 básáraꞌ toIahudiꞌ: básá Iberani ba básá Árá. Kahandaꞌraꞌ toIahudiꞌ moisá mani básá Árá haneꞌi básá Iberani.
Currently Selected:
Surona Pueꞌ Iesu 21: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
