TITUS 1
1
Paulus
TITUS
Ataejirime Surat
1Titus. Dere Paulus. Dere ara aemansa surat wora aeapomtammin. Dere Allah bambi karai baetam ipit. Yesus Kristusam dere aatakam bakoretam ambirimemomen. Armat Ipit, dere Allah aereremartaae owe, Armat Ipit eemnak bamesemkorom baemem, ambirimemomen. Are dere aatakamnak baememtam ambirimemomen. Emesare, era atakamnak ji bae owe, turunak aememtemas. 2Bonaknak ere, Armat Ipit ara pakiin pakiin bakenemapom apok ere, Are jiinenak dara batetam, ataaji aee. Emesare, Allah pote atakam baemekore asan apok. Ere, dare era atakamnak eemnak ambesemkorommarom jiinenak dara batetam emes jiirey aeemarom. 3Armat Ipit asan akot apore. Are aatakam baso akoretame. Are aatakam bakoretam karai atetamen. Are dere emes baem atakam asakamtamen. Emesare, Armat Ipit dara Bajortaer Ipit.
4Titus! Dere wore Kristus Yesus eemnak bamesemkorom aporomtamo. Erarawa wore detiinak. Deraye woraye, Armat Ipit, eemnak takan ambesemkoromamum. Emesare, Daritipit Allaham, Kristus Yesus dara Bajortaer Ipitam, asan akot wora baemtanis. Are ji baem jak wora batetamtanis.
Yesus basitim bajarisiap owe armat baemem owe bataemom atakam
5Dere wore Kreta tapirmi beken ajioso. Era bafaafetiikorom apok pak, bafaafetiikorom, beken ejioso. Wore era samaniin samaniin Yesus basitim bajarisiap owe armat baemem owe bataemom, beken ajioso. Era pak ere, atakam wora asakamtamo atakam jipua. 6Wore era armat baemem ipit ataemomtem, era ipit atet apok ipita. Era ipitam tapes taka ipita. Ajiiam Yesus Kristus eemnak bamesemkorom ipita. Ajiiam asan pota apok ipita. Ajiiam aatakam baoo apok ipita. 7Era armat baemem ipit, ere Allah akarai baetam ipit. Erarawa are atet apok ipita. Are jane apok ipit bas. Are jak ambap fef ipit bas. Are bir bwi banda jaytu ipit bas. Are owentakam ipit bas. Are pak bataet jak baseseromem ipit bas. 8Erarawa are owe atame batoomjii jak akot ipita. Are akot pak jak baseseromem ipita. Are bimak binip turu ipita. Are turunak ipita. Are jak fiak ipita. 9Are era aememtames atakamnak bajamkai fiak ipita. Erarawa anom era atakamnak, wan owe aememtamtem. Are ataane era owe aweomtem. Era atakamnak aooemas owe, bimak binip pota atetaramemas. Yesus basitim bajarisiap armat baemem ipti ataemomtem era pak era owe baso aporomtamtem.
Owe Kristus eemnak bamesemkorom atakam
10Emesare, owe tanane atakam aooemas. Atakam bambi afampirimtiitamemas. Are potet wan owe atutumemas. Me wan emes aememas owe, bonaknak ere, Yahudi agama ajamkaies. Asep ararawa, are daagama aojamkaies. 11Are, pota pak, owe tanane aememtamemas. Erarawa are, tame tanane, asan pota atutumemas. Ere are pak bataet jak aseseromemas. Erarawa are era damke bakamemom pak aememas. Emesare, era owe era atakam okone bakamimemtas. 12Me wan Kreta ipit, aatakam bakoretam ipit. Are atakamam, “Kreta owe takes pote atakam owe. Are jokoman binatang emes tamen are. Are pakanam pota owe.” Emes atakam aesime. 13Emesare, era akoretame atakam, atakamnak. Erarawa, wore era Kreta owe fiaknak ajatemotaerey. Are Yesus Kristus eemnak bamesemkorom betema betema bajitas. 14Era bajatemotaer atakam ere, era owe era Yahudi pote tarai atakam ji bae-ombar. Anom era owe era atakamnak aooes owe abasakamtam atakam ji bae-ombar. 15Turunak owe, era pakiin pakiin takes, akot pak aporemas. Me, asan pota oweam, Yesus Kristus bamesem apok oweam, asan pota pak bimak binip daytu atetaramemas. Me ajak bomon atakamam asan pota. Erarawa are era pakiin pakiin takes, asan pota pak aporemas. 16Era oweam, “Allah damsam,” emes atakam aesimemas. Me, era aememas pak, Allah atakam jipu amsam apok. Era owe wan owe bifane afeomemas. Anom era atakam aooemas. Are akot pak baemem asan apok.
Currently Selected:
TITUS 1: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
