2 TIMOTIUS 4
4
1Dare Allah bipuam, Kristus Yesus bipuam, aememmarom. Me Kristus Yesus, jatiaptam oweam, dambir aemes oweam, adosa, atakam asakamtiitem. Armat Ipitam aondaetem. Are owe aoomeptem. Emesare, dere atakam fiak wora asakamtammin. 2Allah atakam akoretamey. Asan akot aportem apaye, asan pota aportem apaye, era atakam bakore jati fiak afekemtamey. Owe era pota pak aemes atakam, atakam baso era owe akoretamey. Oweam bajatemotaerey. Ataane aweomey. Era atakamam aememtamey. Era pak takes jak jirao aptam aemey. 3Era aemaptas bare, owe, era atakamnak jane bajie pota aememtemas. Emesare, are ajak basenomem pak jipu taka aemtemas. Are guru tanane ajarisisimtaatemas. Era guru tanane, era owe jane bajie jak basenomem pak, emes atakam baememtam guru. 4Are era atakamnak beak sos asotamtemas, wanam era pote tarai atakam jane taka ajitemas. 5Wore ere, bimak binip aptam aememey. Era ajirisemtas takes, jak fiaka. Wore Allah Akot Atakam bakoretam ipit. Era pak baem aememey. Emesare, era pak ajamememkoromey.
6Emesare, dere Allah karai baetam ipit. Erarawa owe atatiitemanis. Ara aemansa tapirmi beken ajiostey bare, setep kope. 7Dere karai Kristus Yesus baetam jati daytinak aeaaru. Dere era karai aekoromo. Denom Kristus Yesus eemnak bamesemkorom, bamompim apok aemo. 8Emesare, dere akotnak pak ataettemin. Era akotnak pak, ere turunak owe kuus bajiimapom akotnak pak are. Emesare, Tuhan, owe adosa, atakam basakamtii Ipit. Are turunak Ipit. Era bare daytu ere, Armat Ipit era akotnak pak dera atetamteman. Me, Are era akotnak pak de taka batetam apok. Wan owe Armat Ipit aojisemto bare bandae, emes jak aseseromemas. Armat Ipit era akotnak pak emes owe takes atetamtem.
Timotius bajinao atakam
9,10Emesare, Demas ara aemansa tapirmi pak jak aseseromem. Erarawa are beken ajiosen, wanam Tesalonika aesose. Emesare wonom fef ajinaoporan. Kreskes, Galatia aesose. Titusam, Dalmatia aesose. 11Lukas taka dere takan aemapmamum. Wonom Markus atoomjinaoey. Are dekarai pi ajatteman. 12Denom Tikikus, Efesus ataejirimo. 13Dere debaju Troas beken ajejinaoo. Karpus tame asinta. Ajinaotem, era baju atoomjinaoey. Era buku tananeam atoomjinaoey. Me binatang pitini kertas buku beken bajejinao bas. Ere anakotnak pak.
14Me tembaga pak bakenem ipit juas Aleksander, pota pak tanane aemen. Tuhan ere, era ipit aeme pak jipu biti ajitem. 15Wonom era ipit turuar. Are era akoretamom atakam fiaknak ookorompe.
16Emesare, dere era jokoman pak baoorpor ipit bipu aememo. Armat ipit, dere jaos apaye, jaos apok apaye, aoorporen. Era bonak aememo bare, owe takes beken ajiosenis. Me, Tuhan era owe aemes pak, “Tare dosa aemekem,” emes atakam basakamtii bas. 17Emesare, Tuhan depu aememe. Are jak fiak atetamen. Erarawa dere aatakam akoretamkoromo. Era atakam ere, Yahudi apok saman takes jane bajie are. Emesare, Tuhan ajortaeren. Erarawa dere dambir batem apok aemo. 18Owe pota pak dera baem aemtanis, Tuhan dera ajortaerkoromteman. Armat Ipitam dere Surga oup Aowe Baomep Asan, asan akot atoomtemetteman. Emesare, owe, Tuhan tere baeomaartas. Ara atakam, ere atakamnak.
Selamat atakam
19Wore selamat atakam, Priska anama Akwila, Onesiforus tame oweam, aesimtamey. 20Erastus Korintus emes aemape. Trofimus damo aemanse. Erarawa dere armat ipit Miletus beken ajejinaoo. 21Era jufu baemes apok, wonom fef atakamjinaoporey. Ebulasam, Pudesam, Linusam, Klaudiaam, wan Yesus ajamkaimas owe takesam, selamat atakam wora akorejinaomanis.
22Emesare, Tuhan wore jak fiak batetamtan. Armat Ipitam asan akot tare takes baemtan.
Currently Selected:
2 TIMOTIUS 4: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
