ROMA 14
14
Tare wan Yesus bajamkai owe jaos atakam basakamtii bas atakam
1Kristus eemnak bamesemkorom apok oweam bataeray. Tanom, era owe abimak binip atetaramemas, atakam bajamkore bas. 2Wan owe abimak binip ere, “Era pak kupis banda pak.” Emes bimak binip atetaramemas. Kristus bamesemkorom apok owe ere, dasa banda apok aememas. 3Me dasa andemas owe, era dasa banda apok owe bifane bas. Wanam, era dasa banda apok owe, era dasa andemas owe, dosa atakam basakamtii bas. 4Tare, owe akarai baetam owe dosa baem, atakam basakamtii bas. Me karai armat ipit, era owe aememmas pak akot apaye, pota apaye, emes atakam amba asakamtiitem. Era owe ere, akot pak aemtemas. Tuhan, ere fiaknak. Are era owe akot pak baem, emes fiak pak batetam are, erare.
5Wan owe abimak binip ere, “Era bare, ere daytu. Me wan bare, ere daytu apok.” Emes bimak binip atetaramemas. Wan owe ere, “Era bare takes, ere awar.” Emes bimak binip atetaramemas. Emesare, oweo aememayes era pak, atakam amba basakamtiitetertas. 6Owe, “Dare era bare, bare daytu aemaptemarom,” emes atakam aesimtas, are era pak, Tuhan basitim, aememas. Me dasa andemas owe, terima kasih atakam Allah akoromemas. Erarawa are Tuhan basitim, dasa andemas. Era dasa banda apok oweam, era pak Tuhan basitim aememas. Are terima kasih atakam Allah akoromemas. 7Jatiaptam aememtam ere, dare dapa damo baemem apok. Dambir atemtam, anom dapa damo baemem apok. 8Jatiaptam aememtam ere, dare Tuhan basitim owe. Dambir atemtam, anom dare Tuhan basitim owe. Jatiaptam aememtam apaye, dambir atemtam apaye ere, dare Tuhan aowe. 9Kristus era jatiaptam aememmas owe aTuhan baemem, emes jak aseserome. Are dambir atemes owe aTuhan baemem, emes jak aseserome. Erarawa Are dambir ateme, wanam ajaorwasite. 10Tare ere, wan Yesus bajamkai owe, dosa atakam asakamtiimakam wama tamenem? Tare wan Yesus bajamkai owe bifane afeomemmakam wama tamenem? Dare takes Allah bipu aememtemarom. Armat Ipit arawa, dadosa, atakam asakamtiitem. 11Alkitab bomon, Tuhan atakam akoren:
“Era akoremin atakam, atakam anakotnak. Emesare, owe takes debipu jindi andaepuomeptetertemanis. Owe takesam, atakam baso akoromtemas: ‘Era aemema Ipit, ere Allah.’ Emes atakam aesimtemas.”
Tuhan emes atakam aesimen. 12Emesare, dare oweo aememayom era aemaarum pak, atakam basonak Allah akoromtetertemarom.
Dare owe Kristus bajamkai fiak baemapom atakam
13Emesare, “Wore dosa aemem,” emes atakam bakore bajanimtiiamo. Me, emes atakam asakamtiiay: “Dare pota pak baem bas. Ere dare Yesus takan ajamkaimas owe, dosa baem-ombar.” Emes atakam asakamtiiay. 14Dere Tuhan Yesus ajamkaimin. Emesare, era banda pak kupis, dosa pak apok demsam. Me, owe, emes bimak binip atetaramtas, “Era pak dosa pak,” emes atakam aesimtas, wanam are era pak andetas, ere dosa aemtemas. 15Me pak andemakam ere, tare Yesus takan bajamkai owe, jak pota aemapomemakam apaye, ere tare era owe bafaim akarimtiimakam. Era andemakam pak ere, Kristus dambir atemtame owe, Kristus bajamkai bamompim bas. 16Tare emes bimak binip atetarammakam apeno: “Era aemmarom pak ere akot.” Emes atakam aesimemakam apeno. Me, wan owe, tare era pak baem dosa pak emes are apaye, ere tare era pak boem bas. 17Allah dara aomeptaro, erarawa dare era andemarom pakam, andemarom bwiam, bimak binip daytu bas. Dare ere, turunak owe baemem bimak binip daytu akot. Dare ji baem jak batoomam, jak akot batoomam, emes bimak binip daytu akot. Ere takes, Allah Jip atetamemar bimak binip are. 18Allah, Kristus emes karai baetam owe, owe akot aporem. Asamot oweam era owe asitimemas.
19Emesare, dajoo owejie akipimtaerporaaramo. Danom owe, Kristus bajamkai fiak baemapom aemporaaramo. 20Tare pak kupis banda akot apormakam apaye, tare ere, Allah karai bae pak tai pota baemtii bas. Era banda pak takes, ere akot. Me, owe, wan owe pak banda aportas, wanam dosa aemtas, ere era pak banda owe, pota pak aemmas. 21Tare dasa andetakam apaye, anggur bwi andetakam apaye, wan pak aemtakam apaye, wanam era aemtakam pak tare Yesus takan bajamkai owe dosa aemapomtakam, ere era pak baem bas. Tare era pak baem apok aemtakam, ere akot. 22Tare, “Era pak kupis banda dosa apok,” emes bimak binip atetaramtakam apaye, era pak atakam Allah taka akoromay. Wanam, “Wan pak banda dosa,” emes bimak binip atetaramtakam apaye, era pakam atakam Allah taka akoromay. Tanom era pakam atakam asamot owe bakorom bas. Owe, abimak binip jipu pak aemtas, wanam era pak baem dosa apok aportas, ere era owe, asan akot owe. 23Owe pak andetas, me, bimak binip arke atetaramtas, ere era pak banda, akot pak apaye, dosa pak apaye, baporkorom apok aemmas. Erarawa Allah, era pak banda, dosa, emes atakam asakamtiim. Owe pak aemtas, me era pak baem akot pak apaye, pota pak apaye, baporkorom apok aemtas, are dosa aememas.
Currently Selected:
ROMA 14: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
