BAPOROMTAM ATAKAM 14
14
Domba Jii anama atakan aememes owe atakam
1Emesare, dere banamek apeomo. Era asan Domba Jii era fami juas Sion oup aememe. Owe 144.000 era Domba Jii takan aememes. Era owe, Domba Jii juas waoam, Aritipit juas waoam, abipis taka taka apakeapes. 2Denom Surga oup jende ajume atakam jane ajio. Me era jende ajume atakam, bwi ajirirepue tamen are. Anom wur ajie tamen are. Me jane ajio pak, ere, owe gitar atee aees tamen are. 3Era owe 144.000 owe baomep fe baemap asanpuam, era jatiaptam pak eak taka apok bipuam, era owe duturu bipuam, ai so aees. Wan owe ere, era so baemetaet asan apok. Me ara tapirmi ajitite owe taka, era so ataetes. 4Era owe, asan pota pak, tapes baem apok owe arare. Are tapes damo bajukun apok owe erare. Are Domba Jii aesosmar asaniin asaniin ajamkaiemas. Era owe ere, ajitite owe. Era owe Allaham, era Domba Jiiam, aowe. Are Allaham, era Domba Jiiam, bonaknak ataetes owe erare. 5Era oweam pote atakam amsam apok owe. Are owe atakam ara bakorom apoknak owe.
Malaikat owe bamintep atakam
6Emesare, dere wan malaikat taka wonamo oupnak apietemete aporo. Are Jiinenak Baememaar Akot Atakam atoome. Are era atakam ara tapirmi owe takes bakoretamen. Era atakam, era owe samane takes oweam, taka taka atakam takes oweam, ara tapirmiin tapirmiin takes oweam, jane bajie atakam are. 7Are atakam afaketaere. “Allah era owe bajurusum bare, ere eteemansar. Erarawa Armat Ipit ombare ambaray. ‘Allah akotnak,’ emes atakam aesimay. Bonaknak ere, Allah, wonamo oupam, era tapirmiam, itimbup bwiam, era tapirmi amba ajismar bwiam, takes akenemapome. Emesare. Tanom tere Armat Ipit aeomay.” Emes atakam aesime.
8Emesare, wan malaikat bonak malaikat fe asaramome. Anom atakam afaketaere. “Danais aemanse! Era daytu kota juas Babel, era danais aemanse! Emesare, era kota, samaniin samaniin takes owe, era asan pota pak takan baem, jinamo atam eme. Allaham, jak ambap, emes asan pota pak aememas owe, aemtem.” Emes atakam aesime.
9Wan malaikat arawa, bonak malaikat jamnuk fe asaramome. Are atakam daytu afaketaere. “Wan owe era binatangam, era binatang etoam, asitimemas. Are era binatang juas wao, era abipis apaye, aban apaye, apakeapa. 10Allaham jak ambapnak era owe aemtem. Emesare, Are jak ambap anakotnak era owe aemtem. Are jisimakam, ambapnak jirimi pakam, emes aememas owe, ajurusumtem. Are era owe, turunak malaikat owe bipuam, Domba Jii bipuam, ajurusumtem. 11Era owe bajurusum pak jisamun, juiin juiin apurimomtemetaartem. Anom bakari apoknak. Era binatangam, etoam, asitimmas owe, jokam, eamam, ajirisemaartemas. Era binatang juas wao aptam owe, jokam, eamam, ajirisemaartemas.” Era malaikat emes atakam aesime. 12Erarawa, Allah aowe, jak fiak baememaartas. Ere Allah basakamtam atakam ji baeam, Yesus bajamkaiaaram, emes owe are.
13Emesare, dere Surga oup atakam jane ajio. “Ara atakam aeapomey. ‘Waa ajiire, Tuhan ajamkaimas wanam dambir aemmas owe, ere asan akotnak aemapmas.’ Emes atakam aeapomey.” Emes atakam jane ajio. Me Allah Jipam atakam akore. “Ijee! Allah, era owe akot aemaaris pak aporem. Erarawa Are era owe asan akot aemtem. Emesamare era owe wuturu karai aeaaris pak, akoromtiitemas.” Emes atakam aesime.
Malaikat era tapirmi pak basesakamtaa atakam
14Emesare, dere banamek apeomo. Derarawa, wonamo fasar aporo. Pak takaam era wonamo fasar ten aemape. Era pak, ere asamot ipit bi awar. Me akuusam, emas kuus bajamapom akot pak ajiimompe. Are fero warim aban atoompe. 15Emesare, denom wan malaikat Allah tame aejise aporo. Are atakam, era wonamo fasar ten aemape ipit afaketaere. “Era tapirmi era pak taso, ere pii. Era pak taso basesakamtaa bare etemansar. Erarawa wowarim bataerey. Wonom era pak basesakamtaaey.” Emes atakam aesime. 16Emesare, era wonamo fasar ten aemape ipit, awarim, era tapirmi atoomdae, wanam era pak taso asesakamtaae.
17Emesare, wan malaikatam Surga Allah Tame aejise. Anom fero warim atoome. 18Wan malaikatam, era pak Allah jis bajaatam joopu aejise. Era malaikat, jisimak baemomem fiak pak aemome. Are atakam era fero warim aptam malaikat afaketaere. “Era tapirmi anggur eek takes, ere pii. Erarawa wofero warim bataerey. Era anggur eek basesakamey.” Emes atakam aesime. 19Emesare, era malaikat awarim ataere. Are era tapirmi anggur eek takes asesakamtaae wanam asan taka ajarisimapome. Ararawa, era eek, Allah anggur bwi bafamjisim daytu asan, are takes akoromtukume. Era asan, Allah jokoman aememto asan are. 20Owe, era anggur bwi, era kota tasan afamjisimes. Esee ere, era anggur bwi bafamjisim asan ajise. Me ajise esee, ere kilometer 300 ajirindae. Era esee kakoteam, kuda okone ajiire.
Currently Selected:
BAPOROMTAM ATAKAM 14: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
