KOLOSE 2
2
1Dere karai daytinak, tanom, era Laodikia oweam, debi amsam apok owe takesam, aetamo. Dere tare era atakam jane bajie akot ajimin. 2Era aetammin karai, era owe jak fiak baemapom karai. Era ara owe armamom bajamfaimam atakam. Ere era owe atakam jane bajiekorom amsam baem are. Era atakam jane ajiekoromtas, asan akot aemaptemas. Ararawa, Allah bomonnak atakam aportemas. Era bomonnak atakam, ere Kristus are. 3Allah abimak binip basonak atakamam, era amsam pakam, ere bambi akotnak. Anom turu atakam erare. Kristus ere, era atakam abajamkai owe baso aporomtamtem. 4Emesare, wan owe atakam akot akoremas. Me, pir aeemas. Dere ere, ara atakam tara aokoretammin. Era owe potet tara batutum-ombar. 5Emesare, dere tare takan baemap apok. Me, dere tabimak binip daytu atetarammin. Tanom bimak binip takan apormin. Tanom Kristus eemnak bamesemkorom apormin. Erarawa dere jak akot aememmin.
Kristus bajamkai, asan akot atakam
6Tare Kristus Yesus tara baemomemkorom akot aporekem. Erarawa tare Armat Ipit ataetekem. Emesare, tanom Armat Ipit atakam ji aeaaray. 7Tanom Armat Ipit takan ajamememaaray. Tanom Armat Ipit bajamkai fiak betema betema ajiaaray. Tanom Armat Ipit eemnak bamesemkorom betema betema ajiaaray— owe tara aememtamen tamena. Tanom terima kasih atakam Allah bakoromaaray.
8Tanom turuar. Owe tare Kristus bajamkai bamompim batatapimtaa-ombar. Era owe, ara aemansa tapirmi pak atakam akoretemas. Emesare, ara atakam bambi atakam arare. Anom pote bakore atakam erare. Era atakam era duturu owe aememtamemas tarai atakam jipu erare. Wan bii ara aemansa tapirmi pak aemomemas. Era atakamam ara bii atakam jipu erare. Era atakam, Kristus atakam jipu apok. 9Emesare, Kristus asamot ipit ajaoreme. Are Allah anakot arare. 10Tare Armat Ipit ajamkaiekem. Erarawa tanom turunak owe aememekem. Armat Ipit era malaikat pemerintah oweam, era malaikat kapar oweam, akapar Ipit arare.
11Tare Armat Ipit ajamkaiekem, tare tamane pitini basakamosom tair emes tamen are. Era pitini basakamosom ere, asamot owe aemes pak apok. Ere Kristus aeme pak are. Emesare, asamot damo, dosa aptam. Me, Armat Ipit ajamkaiekem, Are tare dosa fiak pak asurumtamen. 12Owe bwi tara akupimtaeren, are tare Kristus se takan awuapomen emes tamen. Allaham Armat Ipit ajaoromwasumtume. Tanom Allah afiak pak ambesemekem. Erarawa era bwi akupimtaeren owe tara aowasumtumen, are, tare Kristus takan aowasumtumen emes tamen are. 13Bonak, tare dosa owe aememekem. Tanom tamane pitini basakamosom apok owe aememekem. Erarawa tare dambir owe emes tamen aememekem. Allah ere, tare Kristus takan ajaoromwasumtume emes tamen are. Are dadosa takes bimak binip ajanimemtamero. 14Emesare, dare Musa Basakamtam Atakam baokomsakam daytu aemom. Allah, era aokomsakamom pak, surat aeapome emes tamen are. Era surat, dare dosa owe, emes aporomtame. Allah ere, era aokomsakamom surat, akokomosome emes tamen are. Are era surat salib wus oup apauapome emes tamen are. Erarawa Are era surat aemosomkorome emes tamen are. 15Kristus era salib wus oup dambir ateme, Are bii pemerintah owe afiak pakam, bii kapar owe afiak pakam, aemosome. Are ara bii owe akikimome emes tamen are. Anom ara owe, era wan owe takes bipu akumimosome.
16Emesare, owe, era banda pak andemasam, era bwi andemasam, ara agama pakambwi aememasam, era ai pir pakambwi aememasam, era Yahudi owe Samayen Bare aememasam, tare dosa apaye atakam basakamtii bas. 17Era pak takes bonak ajamtiie. Pak anakot ere, asep are. Era anakot, ere Kristus are. 18Wan owe amba baemetemtem apok tamen aememas. Me, are pir aemas. Are ere, malaikat owe asitimemas. Anom ara pak bambi apores pak, atakam daytu akoremas. Era owe ere, ate tara baeom bas. Era owe, ere asamot bimak binip pak taka atetaramemas. Erarawa amba atemtememas. 19Era owe Kristus ambompimmas. Me Kristus ere, kuus tamen. Me abajamkai owe adamo tamen. Kristus, fima adamo poman akekemtaaem. Armat Ipitam adamo komane aetoomem. Era komane botoomem pak betema betema bajie, ere Allah bimak binip akukuretiie pak jipu arare.
Owe, Kristus dambir takan batem anama bajaorwasit atakam
20Tare Kristus dambir takan atemekem tamen. Erarawa tare ara aemansa tapirmi ataane baowe pak ambompimekem. Erarawa, tare ara aemansa tapirmi aapak, emes tamen aememmakam, wama tamenem? Erarawa ara aemansa tapirmi basakamtam atakam: 21“Era pak baososom bas.” “Era pak bandapor bas.” “Era pak bakurum bas.” Emes atakam asakamtames. Emes basakamtam atakam ji aemakam ere, wama tamenem? 22Owe era pak ataettas apaye, ataentas apaye, ere ara pak ajaniostem. Era basakamtam atakamam asamot owe basakamtam atakam taka. Anom asamot owe aatakam baememtam taka. 23Emesare, era basakamtam atakam, malaikat owe basitim basakamtam atakam arare. Anom owe damo bimak binip daytu apok, basakamtam atakam arare. (Me, era pak pir bae pak.) Era basakamtam atakamam, owe amba bajirisem basakamtam atakam. Emes owe, “Era basakamtam atakam, bimak binip baso pak,” emes atakam aesimemas. Era basakamtam atakam ere, owe ara asamot jak basenomem pak jipu baem, baemekumimosom asan apok.
Currently Selected:
KOLOSE 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
