KOLOSE 1
1
Paulus
KOLOSE
Yesus Basitim Bajarisiap Owe Ataejirime Suarat
1Dere Paulus. Kristus Yesus, aatakam bakoretam ambirimemomen. Allaham emes akot ajie. Dajoo ipit Timotius, ara surat takan aeapommarom. 2Tararawa, kota Kolose Allah aowe tarare. Tare Kristus eemnak ambesemkorommakam. Erarawa tare dajoo owe. Daritipit Allah, asan akot, tara boemtan. Anom ji baem jak tara batetamtan.
Terima kasih atakam Allah bokorom atakam
3,4Atakam jane ajiom ere, tare Kristus Yesus eemnak ambesemkorommakam. Tanom era Allah aowe takes afaimemakam. Emesare, dare atakam Allah tara ajanimtamtam, danom terima kasih atakam Allah akoromemarom. 5Emesare, Allah Akot Atakam, ere atakamnak. Tare ara atakam jane japen ajiekem, ere tabanamek apeomekem pak aporekem. Erarawa tare Kristus Yesus eemnak ambesemkorommakam. Tanom era turunak owe afaimemakamam. Allaham tabanamek apeomekem pak Surga oup ataapomtamman. 6Emesare, Allah Akot Atakam, asan akot, ara aemansa tapirmi samaniin samaniin owe aemapomum. Era Allah Akot Atakam jane ajimas oweam betema betema ajies. Ere era aemmakam pak tamen are. Tanom Allah Akot Atakam jane ajiekem. Tanom Allah, asan akot, asamot owe bambi atetamtem, emes atakam jane ajiekoromekem. Era baream, waa aemansaram, Allah Akot Atakam, asan akot tara aemaarin. Era Allah Akot Atakam jane ajies oweam betema betema ajiaaris. 7Epafras ara atakam tara aeapomtamen. Emesare, dare armat ipit afaimemarom. Araye daraye Kristus karai takan aetammarom. Are turu ipit arare. Anom taasan Kristus karai baetam jow auuemero. 8Armat ipitam, “Era Kolose owe tare daytu afaimeman. Me Allah Jip emes bimak binip era owe atetame.” Emes atakam aesimtamero.
9Emesare, emes atakam jane ajiom baream, waa ajiiream, dare atakam Allah tara bajanimtam bakari apok aememarom. Dare Allah era akot apormar atakam jipu tara baporomtam, emes atakam Armat Ipit ajanimemarom. Tare bimak binip baso batetaramam, atakam jane bajiekoromam, emes atakam ajanimemarom. Era pak, Allah Jip atetamaro pak are. 10Emes aemtakam apaye, tare Tuhan aowe baemem, awarnak aememtemakam. Tanom era akot apormar atakam jipu aemkoromtemakam. Tanom akot atakam takes aemtemakam. Tanom Allah tamsam betema betema ajitemakam. 11Emesare, Allaham aakotnak fiak pak tara batetamtan. Erarawa tare fiak aememtamakam. Tararawa, era ajirisemtakam pak takes damon, jak jirao aptam emes ajakajiremaartemakam. 12Tanom jak akot aptam, terima kasih atakam, Daritipit aokoromtemakam. Armat Ipit tare era turu owe awar baemem, emes aemapomen. Emesare, tare turu owe aememekem. Erarawa tare Allah atetamtaro pak, Andep pemerintah sare asan, aemomemtemakam. 13Armat Ipit era jiiti pemerintah asan fiak pak asurumtamero. Ararawa, dare, Andep aobaomep asanpu, jiisi atuumosomero. Emesare, Are Andep afaimum. 14Me Andepam asusurumtamero. Anom dadosa bimak binip ajanimemtamero.
Kristus, juas aptamnak ipit atakam
15Emesare, dare Allah bi baemepor asan apok. Kristus ere, Allah bi awar. Me Kristus, biiti ipit arare. Are juas aptamnak ipit. Me Allah akenemapome pak takes ere, juas apok. 16Emesare, Kristus era wonamo oup pak takesam, ara eamansa tapirmi pak takesam, akenemapomen. Are era baso pak takesam, da bapor apok pak takesam, akenemapomen. Are era malaikat owe baomep oweam, era atakam asakamtamemas malaikat oweam, era malaikat pemerintah oweam, era malaikat kapar oweam, takes akenemapomen. Armat Ipitam pak takes akenemapomen. Are era pak takes ara basitim akenemapomen. 17Armat Ipitam bonak taemema emen. Are ara aemansa tapirmi pak takesam, era wonamo oup pak takesam, ban fiak aemommar. 18Armat Ipit, ere kuus emes tamen are. Me ara basitim bajarisiap owe ere, adamo pak emes tamen are. Are era owe ji aeremapome Ipit arare. Are bonak ajaorwasite Ipit arare. Emesare Are anakotnak Ipit. 19Allaham, Andep, Allahnak baemem, atakam asakamtiie. 20Me Andep aesee era salib wus oup ajirindae. Allah emes pak apore ere, Are asamot owe bajamkipimtaer, atakam asakamtiie. Are ara aemansa tapirmi pak takesam, era wonamo oup pak takesam, botaet atakam asakamtiie.
21Bonak ere, tare Allah setep apok aememekem. Tare bimak binip pota atetaramekem. Tanom pota pak aemekem. Emesare tare Allah jokoman owe aememekem. 22Waa ere, Allah, Andep aeme pak apore. Erarawa Armat Ipit tare ajoo owe ataemomen. Era pak, Armat Ipit tare turunak oweam, akot oweam, dosa apok oweam, abipu bataemom are— 23tare Kristus eemnak ambesemkoromtakamam, tare fiak akajiremtakamam, tare era ji aeekem Allah Akot Atakam bamompim apok aemtakam, are. Emesare tare era Akot Atakam jane ajiekem. Oweam Allah Akot Atakam era samaniin samaniin akoretames. Emesare, dere Paulus. Denom Allah Akot Atakam bakoretam, bambi karai bae ipit aememo.
Paulus Kristus basitim bajarisiap owe, akarai baetam ipit atakam
24Emesare, dere Kristus bajamkai tara aememtamemin. Erarawa ajirisememin. Me Kristus basitim bajarisiap owe, Kristus adamo emes tamen. Armat Ipit, ara owe bajortaer ajiriseme. Denom Armat Ipit bajirisemkorom apok aeme pak, bajirisemkorom jak akot aememin. 25Allah, dere, era samaniin samaniin Kristus basitim bajarisiap owe abambi karai baetam ipit, ataemomen. Are apak baem asan akot tara baem, dere ataemomen. Are apak baem, Allah atakam, tara bakoretamkorom are. 26Era atakam Allah bomonnak atukumtiiaarir atakam are. Me bonaknak owe takesam, era arurupis takesam, era atakam jane bajiekorom-ombaren. Japen ere, Armat Ipit era atakam aowe, baso aokoretame. 27Armat Ipit, era bomonnak atakam, aowe baporomtam akot ajie. Era bomonnak atakam, aakotipitnak aememe atakam are. Emesare, era atakam ara samaniin samaniin atakam arare. Era atakamam, “Kristus tajak bomon aemapman. Erarawa tare Allah akotipitnak aememe pak aporkorommakam.” Emes bomonnak atakam baso aokoretame. 28Emesare, dare Kristus atakam, owe takes akoretamemarom. Danom ataane, owe takes aoweomemarom. Danom bimak binip baso aptam, atakam, owe takes aememtamemarom. Ere owe takes Kristus bajamkainak baemapom are. 29Dere emes baem, karai daytinak aeemin. Denom Kristus atetameman fiaknak pak aptam, owentakam daytu ajamomemin emes tamen are.
Currently Selected:
KOLOSE 1: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
