3 YOHANES 1
1
3 YOHANES
Asepnak Aeapome Surat
1Gayus! Dejoo ipit akot! Dere Yesus basitim bajarisiap armat ipit. Dere ara aemansa surat wora aeapomtammin. Denom bafaimnak wora afaimmin.
2Dejoo ipit akot! Dere, Allah asan akotam, damo akotam, wora batetamkorom, atakam ajanimmin. Ere Yesus akot ajamkaimarem emes jipua. 3Wan Yesus ajamkaimas owe ambaromes. Are atakam akoretamenis. “Gayus turunak aememmar. Are ara atakamnak ajamkaiaareme.” Emes atakam aesimtamenis. Emes atakam jane ajio, denom jak akot aememo. 4Owe atakam dera akoretamtanis, “Worereis ara atakamnak ajamkaiaaremas,” emes atakam aesimtamtanis, ere jak akotnak aememtemin. Me wan atakam takes, jak akot kopeepe emes aemapomman.
Gayus ere, turunak ipit atakam
5Dejoo ipit akot! Wore wan Yesus ajamkaimas owe womsam apok. Me, era owe tatapirmi ambaremmas, wonom pak era owe afaafetamemarem. Erarawa wore turunak ipit. 6Era oweam, atakam, era asan Yesus basitim bajarisiap owe aesimtames. “Gayus owe daytu afaimum.” Emes atakam aesimes. Era oweam baesos aememtas, wonom era owe waut banda pak atetamey. Ere Allah akot apormar pak jipua. 7Era owe Kristus karai baetam aesoses. Are Kristus bamesem apok owe, aapak bataan apok aemas. 8Erarawa dare pak era owe batetam. Dare emes aemtam apaye, dare era owe atakamnak bakoretam takan aemtemarom.
Diotrefes anama Demetrius atakam
9Emesare, dere surat woasan Yesus basitim bajarisiap owe ataejirimo. Me, Diotrefes, juas aptam ipit baemem jak aseseromum. Erarawa are daatakam ji bae apok aemum. 10Era ipit da atakam wan owe akoretamum. Era atakam pota. Anom atakamnak apok. Me, era pote pak aemmar, era taka apok. Are Yesus bajamkai owe atame batoomjii apok. Anom wan owe era owe atame batoomjiiam atii ateme. Oweam era owe atame batoomjii aememmas apaye, are emes baem owe, Yesus basitim bajarisiap owe asan, aobirimjisimum. Emesare, ajinaotey ere, dere era aememmar pak, atakam baso akoretemin.
11Dejoo ipit akot! Wore era asan pota owe era aememas pak jipu ajamemtem. Me, era akot owe era aememas pak jipu aemey. Era akot pak aemaaremas owe ere, Allah atakam jipu aememas. Era asan pota aemaaremas owe ere, Allah asmam apok. 12Owe takes akoremas, “Demetrius owe akot,” emes atakam aesimemas. Me armat ipit atakamnak ji aeem. Emesare, owe era ipit akot apormas. Danom, armat ipit akot, emes atakam akoremarom. Tanom daokoremarom atakam, atakamnak apormakam.
Ajiire baemtii atakam
13Dere wan atakam tanane wora bakorom aemin. Me, dere era atakam surat baeapom pota. 14Dere jaka asan fef bajinao bimak binip akukuretiimin. Dararawa, atakam bipu ajamkoramtemarom.
15Allah ji baem jak wora batetamtan. Me ara asan dajoo owe selamat atakam wora akorommanis. Wonom selamat atakam jaka asan dajoo owe, oweo aememteterayes, aesimtamteterey.
Currently Selected:
3 YOHANES 1: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994