2 TESALONIKA 2
2
Ara Atakam Baoo Ipit atakam
1,2Dajoo owe akot! Yesus Kristus daTuhan aofasiendaetem. Armat Ipit dare adamopu ajarisimapomtemaro. Wan oweam, “Tuhan bofasiendae bare, ere etemanse?” Emes atakam aesimemas. Me tare wan owe bimak binip, “Allah atakam bakoretam ipit emes atakam akoretame.” Wan ere, “Owe emes atakam akoretames.” Wan ere, “Paulus emes atakam surat aeapome.” Emes bimak binip atetarammakam apeno. Dare ere, atakam fiak tara ajanimmarom. Bimak binip jaos fef batetaram bas. Jak potaam fef baemem bas. 3Oweam potet tara batutum apoknaka. Me Tuhan aofasiendaeto bare, asep andaetem. Me, owe tananenak Allah bonak awotapemtemas. Ara Basakamtam Atakam Baoo Ipitam bonak ajisemtem. Asep ere, Allah, ara ipit danais aemtiikoromtem. 4Bonak ere, ara Basakamtam Atakam Baoo Ipit, owe ara asitimmas pak takesam, ara juein owe takesam, bifane afeomemtem. Ara Ipit abimak binip ere, “De taka akot. Me wan pak takes pota taka.” Emes bimak binip atetaramtem. Are Allah Tame ajiiaptem, wanam, “Dere Allah,” emes atakam aesimtem.
5Emesare, dere tare takan aemapaarum, dere ara atakam tara akoretamaaru. Tare emes bimak binip batomomem apokane? 6Emesare, ara Basakamtam Atakam Baoo Ipit bajisem aememe. Me, wan fiak pak taka era pak akekemtaaen. Tare emes pak tamsam. Emesare, Allah akot aporto, Are ara Basakamtam Atakam Baoo Ipit bajisem, emes atetamtem. 7Waaam owe tanane Musa Basakamtam Atakam tiruu aooemas. Me, ara bakekemtaa fiak pak, era baoo owe akekemtaaem— Allah, ara bakekemtaa fiak pak aotaerto bare ajiire. 8Era bare ere, era Basakamtam Atakam Baoo Ipitkor ajisemtem. Tuhan Yesus ere, aserenak pak aptam aofasiendaetem. Are bwea jeses atoomemtem. Era jeses afuosto pak, era Basakamtam Atakam Baoo Ipit atatiitem. Era sarenak pak ara ipit danais aemtiitem. 9Era Basakamtam Atakam Baoo Ipit ajinaoto, Bii Kapar Ipit, afiak pak, ara ipit atetamtem. Ara ipit arawa, potet jinim bae pak kupis atutumtem. 10Are asan pota potet batutum pak, danais aemamestas owe, aemtem. Emesare, ara owe era atakamnak ji bae apok aemtemas. Are ara atakamnak bafaim apok aemtemas. Erarawa Allah era owe bajortaer apok ere. 11Emesare, Allah ara owe aemtas pak aportem. Erarawa Are potet batutum pak daytu ara owe atetamtem. Era owerawa, ara pote atakam, atakamnak jiraoemtemas. 12Emesare, Allah, era atakamnak bamesem apok owe takesam, era jokoman pak baem jak aseserommas owe takesam, atakam asakamtiitem.
Allah, tare bajorem owe baemem, emes aereremartaaen
13Dajoo owe akot! Tuhan tara afaimeman. Bonaknak ere, Allah tare bajorem aereremartaaen. Erarawa dare tare terima kasih atakam Allah akoromaaremarom. Allah Jip, turunak owe aemapomum. Emesare, era oweam ajoremtemas— ere ara atakamnak ambesemmas owe are. 14Emesare, Allah tare emes pak baem ajaten. Dare Kristus Akot Atakam akoretamom, Allah tare Yesus Kristus daTuhan, aakotipitnak pak takan baemomaar, ajaten. 15Dajoo owe akot! Emesare, era ambesemmakam atakam ambesemkoromaaray. Danom era atakam aememtamom. Wanam dare ara atakam akoretamom. Danom ara atakam, surat aeapomtamom. Emesare, ara atakamnak bamompim bas. 16,17Daritipit Allah, afaimero. Are asan akot aemero. Erarawa Are dare jak fiak baememaar, emes atetamero. Are era akot pak bajinao banamek bapeap, emes bimak binip atetamero. Emesare, Armat Ipitam, Yesus Kristus daTuhanam, jak fiaknak tara baemapomtan. Are tare akot pak baemaaram, tare atakam akot bakoreaar, emes bimak binip tara batetamtan.
Currently Selected:
2 TESALONIKA 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
