2 KORINTUS 12
12
Paulus pak taka bambi apore atakam
1Dere era aemaaru pak apormin, wanam dema baemetemtem, ere bambi taka. Me, dema aemetemtemmin. Dere Tuhan, bambi aporomtamen pakam, era tiruu aporomtamen pakam, emes atakam akoremin. 2Emesare, dere Kristus bajamkai ipit taka demsam. Tahun 14 aofeapmarom ere, Allah era ipit Surga oupnak asan ametetoomtemete. Me, Allah era ipit Surga oup atoomtemetenak apaye, era ipit pak bambi apore apaye, ere demsam apok. Allah, ere amsam. 3Dere ere, era ipit demsam. Me, Allah era ipit Surga oupnak atoomtemete apaye, era ipit pak bambi apore apaye, demsam apok. Allah, ere amsam. 4Emesare, Allah era ipit era Akot Asan atoomtemete. Era asan ere, armat ipit karao atakam jane ajie. Emesare, asamot owe era atakam baemekore asan apok. 5Dere era ipit aeme pak atemtemmin. Dere ere, dema baemetemtem asan apok. Dere era damo pota ipit aememaaru pak taka dema atemtemmin. 6Dere ere, dema atemtemtey apaye, dere atakamnak akoretemin. Erarawa dere jaytu ipit emes tamen baemem apok aemtemin. Me, owe era aemo pak, pota emes apores apeno. Anom era akoreo atakam pota emes apores apeno. Erarawa dere dema batemtem apok. Era owe, era aemo pakam, era akoreo atakamam, akotnak, emes atakam bakore-ombar.
7Allah era aporomtamen pak, ere akotnak. Armat Ipit ere, itis dedamo dasa ataapomen emes tamen are. Ere Bii Kapar Ipit dera bajurusum pak are. Anom dedamo asesa baemapom pak are. Era pak dere, “Dere owe akot,” emes bimak binip batetaram-ombar. 8Denom Tuhan dedamo asesa pak baemosomtam atakam bare bamintep ajanimo. 9Me Tuhan ere, atep ajiten. “Dere asan akotnak wora aemmin. Wore kumitikope aemaptam apaye, ere dere defiak pak daytinak wora aporomtamtemin.” Emes atakam aesimen. Emesare, dere kumiti ipit aemapaaru pak, dema atemtemtemin. Erarawa Kristus afiak pak dera atetamteman. 10Dere kumiti aemaptey apaye, owe tame dera atetanis apaye, dere asan pota aemaptey apaye, owe dera aemsokomtanis apaye, dere Kristus karai baetam ajirisemtey apaye, ere dere jak akot aememtemin. Dere kumiti aememtey, dere Allah afiak pak atoomemtemin.
Paulus Korintus owe aemes pak, bimak binip daytu atetarame atakam
11Emesare, dere era aemekem pak apormin. Erarawa dere janda ipit emes tamen aememmin. Tare dera asitimenkum ere, ere akot. Me, dere owe pota. Tanom wan owe, “Emesare, era owe Yesus atakam bakoretam bamirimemom owe akotnak,” emes atakam akoremakam. Dere ere, era owe awar. 12Dere tare takan aememaarum, Tuhan dere aatakam bakoretam ambirimemomen ipitnak, emes tara aporomtamaarin. Dere jinim bae pak tadamopu, jak jirao aptam aemaaru. 13Dere, asan akot, wan samaniin samaniin Yesus basitim bajarisiap owe aemo apaye? Derarawa, asan pota tara aemo apaye? Dere emes aemo ere, wama tamenem? Emesare, dere pak dera bafaafetam atakam tara bajanim apok aemo. Erarawa dere asan pota tara aemo apeno. Emesare, era pota pak aemo, bimak binip ajanimemtamani.
14Emesare, dere jaki tatapirmi bare jamnuk emejito. Derarawa, tara bojinaomem aememmin. Dere ajinaomemtey, dere pak dera bafaafetam atakam tara bajanim apok aemtemin. Dere tapak dimam apok. Dere ere, ta dimam ataestemin. Emesare, jii, pak, arisare bafaafetam bas. Arisare ere, pak arereis aobafaafetam amaye. 15Dere depak takes, asan akot tara baem, tara batetamkorom, akot ajimin. Denom, asan akot tara baem, dambir batemtam, akot ajimin. Emesare, dere daytu tara afaimmin. Erarawa tare kope dera bafaim ape?
16Me, dere asan pota tara baem apok. Tanom emes tamsam. Me wan owe ere, “Paulus pir baetaet ipit. Are potet tara atutumen. Erarawa are siso tara andaekoresimomen emes tamen are.” Emes atakam aesimeman. 17Me, tara ataejinaomtamo owe, tapak bambi ataeres apaye? Erarawa dere potet tara atutumo apaye? 18Dere Titus tara bajinaopor atakam fiak ajanimo. Denom wan dajoo ipit tara ataejinaomtamo. Titus ere, potet tara atutumen apaye? Me Titusam, denom, jak awar. Danom karai awar.
19Dejoo owe akotnak! Tare ere, “Paulus, ara jaos pak baem apok atakam akorem,” emes bimak binip atetaramaarukum apaye? Era atakam akoreom ere, Kristus akot apormar pak jipu. Danom Allah bipu atakam akoremarom. Era atakam, tare Kristus bajamkai fiak baemapom are. 20Dere tara ajinaomemtey apeno, tare dejak aseserommin pak jipu apok aememtemakam apeno. Denom tajak aseserommakam pak jipu apok aememtemin apeno. Dere emes ombare aememmin. Tare tarmamon atakam ajamkoramemakam apeno. Itimam ajamkeamemakam apeno. Jak ambap aemememakam apeno. Tare taakot apormakam pak jipu taka aememakam apeno. Tame ajamtamemakam apeno. Owe dosa tiruu atakam ajamkoramemakam apeno. Tanom tamba aemetemtememakam apeno. Tanom atutumemakam apeno. Emesare, dere emes aportemin apeno. 21Dere tara aojinaomemtey, Allah, dere tabipu damke akamapomteman apeno. Dere emes ombare aememmin. Tare wan owe tanane dosa aemekem. Erarawa tare asan pota pak aemekem. Tanom tani tamane bajamdamat aemekem. Tanom tani tamane bajamdamat aemekem. Tanom pota pak aemekem. Me tare wan owe emes aemekem, wanam era pak beak sos basotam apok aemekem. Dere emes aportey, dere bate ambattemin apeno.
Currently Selected:
2 KORINTUS 12: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
