1 PETRUS 3
3
Jipit aremom atakam
1Emesamare, ara aemapmakam tapes, tambiis atakam ji aeay. Me wan tambiis Allah atakam aooemas owe apeno. Me, are taakot pak aemakam aportan, are Kristus ajamkaitemas. Tanom Kristus bajamkai atakam, era tambiis bakorom apok aemtakam, are ajamkaitemas. 2Tambiis tare asan pota pak baem apoknak aporteman. Are tare Allah eemnak bamesemkorm aporteman. Erarawa are Kristus ajamkaitemas. 3Tare tapes akot baemap akot aportakam, are damo tasee pak taka bas. Ere tafini banam bajikapom pak apok. Anom tasee pak bajasee pak apok. Anom akot pakaian bajasee pak apok. 4Me, tare tapes akot baemap, ere tajak bomon tasee pak are. Ere tare tayiakotam, bikupam, emes baemap pak are. Emes baem, ere bakari apok pak erare. Allaham emes akotnak aporem. 5Me bonaknak Allah karai aetames tapesam, jiirey Allah aeesen. Are ambiis atakam ji aeesen. Erarawa are tapes akot aemapesen. 6Saraam emes aemen. Are Abraham atakam ji aeen. Are, “Dere Abraham ban ten aemapo.” Emes atakam aesimen. Tare akot pak baemaaram, ombare apokam, emes aemmakam apaye, ere tare Sara awarais aemapmakam.
7Emesamare, petae aptam owe tatapesti takan aemapmakam, tanom janda bas. Tatapesti, ere damo kumiti. Tararawa tatapesti basitimay. Allah, ajiinenak, tatapestiam, tanom, takan atetamteman. Emesare, tanom emes baem apok aemtakam, wanam atakam Allah ajanimtakam, Armat Ipit era ajanimtakam atakam baemtam apok aemteman.
Bajamfaimam atakam
8Emesare, dere asep atakamam akoremin. Tare takes bimak binip awara. Tanom takes jak awara. Tare Kristus takan ajamkaimakam. Erarawa ajamfaimamay. Tayiakot ajamemamatay. “Dere akot. Wan owe pota,” emes bimak binip bas. 9Owe, asan pota pak tara aemtan apaye, tanom biti bajie bas. Owe tame atakam tara atetan apaye, biti bajie bas. Tare ere, Allah, asan akot era owe baem, atakam ajanimay. Me, Allah, asan akot tara batetam, emes ajaten. 10Alkitabam:
“Era jak akot batoompam, asan akot baememam, emes jak aseseromemas owe, asan pota atakam bakore bakaritas. Anom pote atakam bakore bakaritas.
11Are asan pota pak beak sos basotamtas. Are akot pak baemtas. Are owe bajamkipimamtaerporaartas.
12Tuhan, banamek, era turunak owe atakamamapomum. Era owe atakam Armat Ipit ajanimtas, Are aatakam jane ajim. Me, Are era asan pota pak aememas owe, beak sos asotamum.”
Emes atakam aeapoma.
13Tare era akot pak baem jak aseseromemtakam, ere tara bajurusum owe tanam? 14Me, tare akot pak aemtakam, wanam ajirisemtakam, tare jak akota. Tanom asamot owe ombare bas. Jak potaam baemem bas. 15Me, tare tajak bomon, Kristus asitimay. Are taTuhan ataeemay. Owe tara ajateportan, “Era jiirey aeemakam pak wama tamenem?” Emes atakam aesimtan, ere tanom atep era owe bajitittaer aememaaray. Me, atep ajittakam, atakam akota. Atataren atakam bas. 16Tanom tajak bomon atakam ji aeay. Erarawa, owe tame atakam tara akoromtan apaye, jokoman atakam tara akoromtan apaye, era owe tare Kristus ajamkaimakamam, akot pak aememmakamam, emes aportemas. Ararawa, damke amba akemtemas. 17Allah akot aporto, tare akot pak baem, wanam owe tara bajurusum, ere akot. Me, tare pota pak baem, wanam owe tara bajurusum, ere pota. 18Kristus dadosa bimak binip bajanimemtam dambir bare takakor ateme. Armat Ipit, ere turunak. Dare ere, jaos. Armat Ipitam dambir atemtamero. Ere dare Allahpu batoomtin are. Owe Armat Ipit atatiies. Me, Allah Jip ere, Armat Ipit ajaoromwasumtume. 19Me wan dambir owe aanakot owe, buji tame bomon emes tamen aemapes. Me Kristus dambir aemanse ere, aanakot ipit, era dambir owe anakot owe asan aesose. Are era asan owe akoretame. 20Era anakot owe, Allah atakam aooes owe aanakot owe arare. Nuham era ti daytu taojakmape, Allah era owe dosa bamekem apaye jak jirao banamek apemen. Era bwi daytu aemese ere, Allah, owe arke bajortaer apoken. Era owe poman ban bamintep ere, bwi dambir apoken. 21Era bonaknak bwi, ara waa bakupimtaer bwi tamen are. Era bakupimtaer bwi, owe ajortaerem. Ara bakupimtaer bwi, damo pano baeosom pak apok. Me, ara bwi bakupimtaer owe, “Dare dajak bomon atakam jipu aemmarom,” emes ataaji Allah aeemas. Yesus Kristus ajaorwasite. Erarawa ara bakupimtaer bwi, owe emes tamen ajortaerem. 22Me Yesus Kristusam Surga oup atemete. Are Allah bo poman aapeta. Are era basakamtam atakam malaikat owe takesam, era basakamtam atakam oweam, era fiaknak aemanses pak takesam, atakam asakamtamum.
Currently Selected:
1 PETRUS 3: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
