1 KORINTUS 2
2
Kristus salib wus oup dambir ateme atakam
1Dejoo owe akotnak! Dere Allah atakam tara bakoretam ajinao ere, dere bomon atakam batoomjinao apok. Denom era tastu pak atakam batoomjinao apok. 2Dere ere, atakam, bonak asakamtiio: “Dere Korintus owe takan ajamemaptey, dere Yesus Kristusam, era salib wus oup dambir atemeam, emes atakam taka akoretamtemin.” Emes atakam aesimo. 3Dere tara ajinaomo ere, dere damo kumiti ipit aememo. Dere ombaream, damo di tamenam, aememo. 4,5Era aemo pak, tare ara asamot owe bimak binip baso pak atakamiin jane bajie-ombar. Tanom asamot owe bimak binip baso pak atakam batemtem-ombar. Me, dere ere, tare Allah afiak pak bapor, wanam deatakam eemnak bapor, akot ajio. Erarawa, dere atakam tara akoromoam, atakam tara akoretamoam, ere dere asamot bimak binip baso pak atakam tara batatapimtaa apok. Dere ere, Allah Jip atetamen fiak pak tara aporomtamo.
Bimak binip baso anakot pak atakam
6Dare ere, atakam Yesus bajamkai fiak owe akoretam, danom bimak binip baso pak atakam akoremarom. Me bimak binip baso pak atakam ere, ara aemansa tapirmi pak apok. Are ara aemansa tapirmi kapar owe abimak binip baso pak atakam apok. Era owe, ere apakapiostemas. 7Era akoremarom bimak binip baso pak, ere Allah pak. Anom bomonnak. Bonaknak ere, Are era bimak binip baso pak, atakam asamot owe bakore apok. Me, Armat Ipit ara tapirmi bakenemtii apok aeme, Are era bimak binip baso pak, atakam bonak asakamtiie. Era pak, asan akotnak dara baem pak are. 8Ara aemansa tapirmi kapar owe ere, ara atakam jane bajie apok aemes. Jane ajies ere, are akotnak Tuhan, salib wus oup batatopom apok. 9Ere Alkitab atakam jipu:
“Me asamot owe bapor apok pakam, jane bajie apok pakam, era bimak binip batetaram apok pakam, ere Allah, era pak takes, ara afaimemas owe batetam, akenemapome.”
Emes atakam aeapoma. 10Me, Allah ere, era bomon pak aporomtamero. Ere Allah Jip aeme pak are. Allah Jip takes aoorporem. Are Allah bomonnak bakukuretii pakam aoorporem. 11Asamot ipit abimak binip amsam ipit, ere era ipit apa. Allah Jipam, Allah bimak binip amsam apa. 12Emesare. Dare ara aemansa tapirmi jip bataet apok. Dare Allah atetamero Jip ataetom. Erarawa dare Allah atetamtaro bambi pak aporkoromtemarom. 13Danom era pak atakam akoretam, dare ara asamot owe aememtamemas bimak binip baso pak atakam bakore apok. Dare Allah Jip aememtamero atakam akoremarom. Dare Allah Jip atakam, era Allah Jip aptam owe akoretamemarom. 14Me Allah Jip aptam apok owe ere, Allah Jip atetamto pak bataet apok aememas. Era owe bimak binip ere, “Era pak janda pak,” emes bimak binip atetaramemas. Are Allah Jip atetamto pak atakam jane baemejie asan apok. Me Allah Jip aptam owe ere, era pak akot, emes atakam asakamtiiemas. 15Me Allah Jip atakam ji bae owe, ere takes, akot pak apaye, pota pak apaye, atakam asakamtiiemas. Wan owe ere, Allah Jip atakam ji bae owe, owe akot apaye, owe pota apaye, atakam baemesakamtii asan apok. 16Alkitabam:
“Me Tuhan bimak binip amsam owe tanam? Me Armat Ipit ataane baowe owe tanam?”
Emes atakam aeapoma. Dare ere, Kristus abimak binip atoomom.
Currently Selected:
1 KORINTUS 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
