BILANGAN 34
34
Nakat-nakat pah nane
1 Uisneno anfe neu Nai Musa 2plenat-plenat le i neu Israel nak, “Ka lo fa anteni hi amtam meu pah Kanaan, pah le Au fe neu ki anfani bale bela mnasi. Nakat-nakat hi pah nane esle' i. 3Anbi bian a'ne'u nakat nane na'ko mnela snaen Zin nao nok Edom. Anbi neno saen nakat nane na'ko bian a'ne'u Tasi Maten, 4anbeo nao nok neno kabenana ne'u an ali Lanan Akrabim ma nao anfini neu Zin antia Kades-Barnea anbi bian a'ne'u. Na'ko nane anbeo neu neno tesan antia Hazar-Adar, ma anfini neu Azmon. 5Na'ko nane anbeo neu nonof anbi nakat Mesir ma namsopu anbi Tasi Tnana.
6Tasi Tnana anfani on nakat neu hi pah anbi neno tesan.
7Anbi bian a'li, nakat nane na'ko Tasi Tnana an ali Tubu Hor 8ma na'ko nane nao neu Lanan Hamat, oke te anfini neu Zedad, 9ma nao neu Zifron ma namsopu anbi Hazar-Enan.
10Anbi neno saen, nakat nane na'ko Hazar-Enan nao neu Sefam. 11Ma na'ko nane ansanu neu Ribla ani Ain aon neno saen, oke te anfini neu neten-neten anbi mnela neno saen Nifu Galilea, 12oke te anao neu bian a'ne'u Noe Yordan nona antia Tasi Maten.
Nane hi pah natuin nakat-nakat le anfun natef nani.”
13Nai Musa nak neu to Israel nak, “Nane pah le of hi amsimo nok lanan amhel sulat, pah le natuin plenat Uisneno mes him bati neu uf nonot Israel sin sio ma batis. 14Uf-uf na'ko Nai Ruben ma Nai Gad ma bian na'ko uf Nai Manasye sin napeni nalali sin pa', ma pah nane amsa anbati nalali neu sin ume nanan sin. 15Sin pah bale bela mnasi nane anbi Noe Yordan ninen neno saen, anhaumak kot Yerikho.”
Ale anakaf le anlek sin hen bati pah nane
16 Uisneno nakua a'an neu Nai Musa nak, 17“Le mes hen bati pah nane neu ki es Ana' fuat knino Nai Eleazar, ma Nai Yosua Nai Nun anmone. 18Amlek amsa anakaf mese na'ko uf mese-mese hen sin anbab Nai Eleazar ma Nai Yosua he anbati pah nane.” 19-28Kanaf atoni-atoni nane esle':
| Uf | Anakaf |
|---|---|
| Yuda | Nai Kaleb Nai Yefune anmone |
| Simeon | Nai Samuel Nai Amihud anmone |
| Benyamin | Nai Elidad Nai Kislon anmone |
| Dan | Nai Buki Nai Yogli anmone |
| Manasye | Nai Haniel Nai Efod anmone |
| Efraim | Nai Kemuel Nai Siftan anmone |
| Zebulon | Nai Nai Elisafan Nai Parnah anmone |
| Isakhar | Nai Paltiel Nai Azan anmone |
| Asyer | Nai Ahihud Nai Selomi anmone |
| Naftali | Nai Pedael Nai Amihud anmone |
29Nane atoni-atoni le Uisneno naplenat sin he anbati pah bale bela neu to Israel anbi pah Kanaan.
Currently Selected:
BILANGAN 34: AOZ
Highlight
Copy
Compare
Share
Want to have your highlights saved across all your devices? Sign up or sign in
