BILANGAN 33
33
Lanan na'ko Mesir nao neu Moab
1Leka to Israel sin nasaitan Mesir, nao natuin uf nonot mese-mese natuin Nai Musa ma Nai Harun sin na' ma antopu sin, sin anao nok bale fauk-fauk. 2Uisneno naplenat Nai Musa hen tui kanaf na'ko bale mese-mese le sin anao nokan.
3To Israel nasaitan Mesir anbi neno bo'es am nim fun mese, neno mese namuni na'ko Paskah ahunut. Natuin Uisneno naneo ma nahafo sin oke te sin nasaitan kot Rameses, fun to Mesir sin ansaksi lasi nane, 4le fe sin ansub sin an-unu sin le Uisneno namate nalali sin. Nok taos mo'et nane, Uisneno nalile ma naton nak In nabe'i nesi na'ko ale uisneno teta Mesir.
5Leka to Israel nasaitan Rameses, sin nahakeb um-ume anbi Sukot. 6Oke te sin anfen anteni ma nahakeb um-ume anbi Etam, anbi mnela snaen in ninen. 7Na'ko nane sin anfani nem neu Pi-Hahirot, anbi neno saen Baal Zefon, oke te sin nahakeb um-ume anhaumak Migdol. 8Nalali te sin nasaitan Pi-Hahirot, sin anlak tasi ma antam neu mnela snaen Etam; leka sin nao nan neno tenu in a'lon, sin nahakeb um-ume anbi Mara. 9Na'ko nane sin anao piut ma nahakeb sin um-ume anbi Elim; anbi nane anmu'i oe mata bo'es am nua ma bub fua mina u'bo'hitu.
10Oke te sin nasaitan Elim ma nahakeb sin um-ume anhaumak Tasi Suez in ninen. 11-14Oke te sin anfen na'ko nane ma nahakeb sin um-ume anbi mnela snaen Sin, oke te anhaumak dofka, oke te anbi Alus, ma namuni te anbi Rafidim, mes anbi nane katit fa oe mninu.
15-37Na'ko Rafidim sin anao anfini neu Tubu Hor ma nahakeb sin um-ume anbi bale-bale le i: mnela snaen Sinai, Kibrot-Taawa, “Naukel Apalu”, Hazerot, Ritma, Rimon-Peres, Libna, Risa, Kehelata, Tubu, Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, mnela snaen Zin, ma Tubu Hor, anbi nakat pah Edom.
38-39Natuin plenat Uisneno, Ana' fuat knino Nai Harun ansae neu Tubu Hor. Anbi nane in anmate anbi neno mese fun nima anbi ton bo'ha leka nonot Israel nasaitan Mesir. Anbi tabu in anmate, Nai Harun in ton 123.
40Anbi tabu nane kesel pah Arad, anbi Pah Negeb, Kanaan bian a'ne'u, in anen hanaf nak to Israel fe sin anao an ali in pah.
41-49Anbi lanan anao na'ko Tubu Hor neu pah Moab, atoni Israel nahakeb sin um-ume anbi bale-bale le i: Zalmona, Funon, Obot, fatu tutnae Abarim anbi pah Moab, Dibon-Gad, Almon-Diblataim, Tubu Abarim anhaumak Tubu Nebo, ma anbi mnela Moab anbi Noe Yordan ninen, anhaumak kot Yerikho anbi Bet-Yesimot ma Nonof Sitim atnankenu.
Plenat-plenat nahunun na'ko fe kan lak fa Noe Yordan
50Anbi mnela Moab nane, anbi Noe Yordan ninen anhaumak kot Yerikho, Uisneno anfe neu Nai Musa 51plenat-plenat le i neu to Israel nak, “Leka hi amlak Noe Yordan he amtam meu pah Kanaan, 52hi mes amli'u ale taufen pah nane ok-oke. Mile'un ale sin le'u mahuma na'ko fatu ma noni molo ma sin bale luli besa. 53Pah nane hi mes misik mani ma hi mitua, natuin Au fe ani neu ki. 54Namuni te hi mes ambati mani anfani hi bale bela mnasi neu hi sufam sin nok lanan amhel sulat. Neu uf le anaek hi mes amfe neu sin pa' le anaek, ma neu uf le nabau, hi mes amfe neu sin pa' le nabau. 55Mes leka tuafen pah nane hi kam li'u fa sin, atoni-atoni le sin natua nabala anbi nane of sin nasusab ki on asnaen anbi hi matam ai on kasunat ma katila anbi hi haem. Sin es of anmaken nok ki. 56Leka hi kam li'u fa sin, Au of ule'un ki onle Au sali ulali neu sin.”
Currently Selected:
BILANGAN 33: AOZ
Highlight
Copy
Compare
Share
Want to have your highlights saved across all your devices? Sign up or sign in
