BILANGAN 24
24
1Nai Bileam in nahin nalalien nak Uisneno anlomi he nati' in anfe tetus neu to Israel. Es nane te in ka nao fa he nami ataka onle in anmo'e anbi ahunut. Nai Bileam ankiso an ali neu mnela snaen, 2ma in nit to Israel nasnasbon anbi um-ume pukan-pukan natuin uf-uf in to. Oke te Smanan Uisneno ansanu neu Nai Bileam, 3ma in antek beno i nak,
“I a'at Nai Bileam, Nai Beor anmone,
uab molok atoni mamata mese,
4le an nen nalali Uisneno a'an
ma in nit amnitas na'ko Akuasat Afin-finit,
fun in antup, mes nok mataf le natfai.
5Lo leok le'uf kun ho um-ume sin
hoi Yakub,
ma ho bale-bale maika sin,
hoi Israel!
6Onle nonof menuan le in naufon,
ai on etu anbi noe in ninen;
on ekam le Uisneno ansenan,
ai on aijob anbi noe in ninen.
7Sin napeni oe ulan nok athoes;
fini le ansenan napeni oe naek.
In Kesel of nis ma anbe'u
nesin Nai Agag,
ma in aplenat of maliaba.
8Uisneno es neki sin anpoi na'ko Mesir,
on bijae fui in anmabe'u neu sin.
Musu na'ko uf-uf of in an olo nan sin,
sin nuifen of In naklati nani sin,
ma sin as'anef sin of In na'ipu nani sin.
9Uf nane on meu asu keso ma meo asu ainaf,
in nem ma in antup.
Sekau es nabe'i he nafena in?
So nati' atoni le anfe tetus neu ko
so nati' in amsa napeni tetus,
ma atoni le ansukat ko
in amsa napeni sukat.”
10Nok to'as Nai Balak in nabubu in niman kalulun sin ma in nak neu Nai Bileam nak, “Au boin ko hem sukat au musu-musu sin, mes hom fe tetus neu sin antia hae tenu. 11Hom nao nai anbi tabu le i, amfani nai meu ho ume! Au ba'an neu ko upa', mes Uisneno ka nafetin ko fa he hom simo upa' nane.”
12Nai Bileam natae nak, “Ait au ka uton ulali fa neu Usi ho haef sin ak 13maski au Usi anfe kau noni muti ma mnatu le anbi au Usi in sonaf, ai ka nabe'i fa he tanhai plenat Uisneno ma mo'e sa' es natuin au nekak in alomin? Au al nabe'i u'uab sa' le Uisneno anlenu he au umolok.”
Beno-beno amsoput
14Nai Bileam nak neu Nai Balak nak, “Tabu le i au he nao fani neu au nonot. Mes fe au ka nao fa, leko au uton neu ko Usi antom sa' le nonot Israel of anmo'e neu Usi ho to anbi neno amnemat.” 15Oke te Nai Bileam in namolok nak,
“Le i a'at Nai Bileam, Nai Beor anmone;
uab a'at atoni mamata mese
16le in nen nalali a'an Uisneno,
ma le nabe'i nahin Amnanut Afin-finit;
le nit amnitas na'ko Akuasat Afin-finit
le in antup mes nok matan natfai.
17Au it in, mes ka tabu i fa;
au it in, mes na'ko lo.
Kesel mese nem na'ko Israel,
of in nem on afkun apinat.
Ale uisfen Moab in of naskuku nani sin
uf Nai Set in of naskuku nani sin.
18Pah Edom of in musu sin antoko nani,
mes Israel anmo'e lasi matani.
19Of anbol na'ko Nai Yakub ana' aplenat mese,
le nale'un in musu-musu sin.”
20Nalali te anbi mnitas nane Nai Bileam in nit atoni-atoni Amalek. Es nane te in na'uab beno i,
“Na'ko ale uf anbi pah pinan,
Amalek esle' in amu'i kuasat anesi matani.
Mes uf nane namuni te,
of namneku talante nabal-bal.” 21Anbi mnitas nane Nai Bileam in nit Nai Kain in sufan, oke te in na'uab beno i,
“Ho bale maika namneo matani ma namep,
on kol kuna anbi tubu fatu in tunan.
22Mes hi, atoni Keni,
of nale'un ki,
ka lo fa anteni Asyur of naiti neki ki
onle nis ma anbe'u ki anbi makenat.”
23Nalali te Nai Bileam in na'uab beno i amsa,
“Amle'ut! Sekau es anmoni,
leka Uisneno anmo'e lasi nane?
24Mes na'ko Siprus of abnao makenat mese in nem,
sin of nis ma anbe'u Asyur ma Heber,
nalali te abnao makenat nane of in namle'u.”
25Oke te Nai Bileam naloitan ma nabalab he nao anfani kun neu in bale, ma Nai Balak in anao kun amsa.
Currently Selected:
BILANGAN 24: AOZ
Highlight
Copy
Compare
Share
Want to have your highlights saved across all your devices? Sign up or sign in
