IMAMAT 9
9
Nai Harun natulu ma natnat fua tulu
1Neno mese namuni na'ko luli besa namepan nane oke, anbi neno fanu, Nai Musa anboin Nai Harun ma in anah sin ma ale atopu to Israel. 2Nai Musa nak neu Nai Harun nak, “Maiti nai bijae keso tipu' mese ma bibi kase keso mese, mu'it nua en nane le kan mu'i fa in amle'un. Mutulu ma Mutnat mu'it nua en nane neu Uisneno, bijae keso nane neu fua tulu sako sanat ma bibi kase keso nane neu fua tulu mnotu. 3Oke te amlenu nonot Israel natulu ma natnat bibi keso mese neu fua tulu sako sanat ma bijae ana' mese ma bibi kase ana' mese le es-es te ton mese ma kan mu'i fa in amle'un neu fua tulu mnotu. 4Amlenu sin amsa he natulu ma natnat bijae keso mese ma bibi keso mese neu fua tulu halan. Nane ok-oke sin mes natulu ma natnat neu Uisneno bua-bua nok fua tulu bukae le antao mina, natuin anbi neno i Uisneno nem neu sin.”
5Ale sa' le Nai Musa antoti sin neki nem neu Um-ume matan, ma to ok-oke nabua anbi nane ha naluli ma nabes neu Uisneno. 6Oke te Nai Musa nak, “Uisneno anlenu ki he mo'e lasi le i he nati' nabe'i hi mit meosine Uisneno an bolan ki.” 7Nalali te in nak neu Nai Harun nak, “Amnao nai neu baki tulu ma mubalab nai fua tulu sako sanat ma fua tulu mnotu, he nati' ho sanat ma to sin sanat Uisneno ansako nani sin. Amtao ma mo'e nane onle Uisneno naplenat nani neu ko.”
8Ma Nai Harun in nao neu baki tulu ma anlolo bijae keso le of natulu neu sako sanat neu in sanat anmes kun. 9Nai Harun in anah-anah sin natiaba mu'it nane in na' neu Nai Harun, ma in anlep in kalulun neu na' nane in nanan, ma in no sen neu sunaf-sunaf anbi baki tulu in si'uf ha sin. Nalali te na' le anesi anpofin neu baki tulu in un. 10Baluf, akif ma sisi bian le leok le'uf na'ko mu'it nane notu nani anbi baki tulu in fafon onle Uisneno naplenat nani neu Nai Musa. 11Mes sisi ma pasu na'ko mu'it nane motu mani sin anbi Um-ume in kotin.
12Nalali te Nai Harun anlolo mu'it neu fua tulu mnotu neu in aon anmes kun. Nai Harun in anah-anah sin natiaba mu'it nane in na' neune, oke te in anpofin neu baki tulu kabenan ha sin. 13Nalali te sin nana'at neune mu'it in anakan ma bian-bian anteni na'ko mu'it nane, ma in notu nani sin anbi baki tulu in fafon. 14Nalali te mu'it nane in taifen ma in pusun anboe sin ma notu sin nok fua tulu mnotu anbi baki tulu in fafon.
15Oke onane te in natulu ma natnat bibi neu fua tulu sako nanat to. Bibi nane anlolo nani ma natulu on fua tulu sako sanat neu in sanat anmes kun. 16Oke te naiti mu'it amsa neu fua tulu mnotu, ma natulu nani natuin lekat lulut. 17Oke onane te natulu ma natnat fua tulu bukae; in naiti ut nima mese, ma notu nani anbi baki tulu in fafon. Nane on ansato neu fua tulu mnotu neno-neno. 18Oke te anlolo amsa bijae keso mese ma bibi kase keso mese neu fua tulu halan neu to. Nai Harun in anah-anah sin natiaba mu'it nane in na' neune, oke te in anpofin neu baki tulu in si'uf ha sin. 19Sisi bian le mabaluf na'ko bijae ma bibi nane sin antao neu mu'it nane in abasan, 20oke te Nai Harun in notu nani sin anbi baki tulu in fafon. 21Mu'it nane in abasan ma pusun a'ne'u, natulu ma natnat nani on tulu tnatas etus tonas neu Uisneno. Nane pa' ma nama' Ana' fuat knino, onle Nai Musa naplenat nani.
22Leka natulu ma natnat nalali ale fua tulu nane ok-oke, Nai Harun in naiti in niman neu nonot Israel ma anfe neu sin tetus, oke te in ansanu. 23Nalali te Nai Musa ma Nai Harun sin antam neu Um-ume Uisneno in nanan. Oke onane te sin anpoi ma anfe tetus neu nonot. Oke te nonot Israel ok-oke sin nit meusine Uisneno nem. 24Nok askeken Uisneno nasanut ai le notu nani fua tulu mnotu nane ok-oke ma sisi bian-bian anteni le anmu'i baluf anbi baki tulu in fafon. Leka nonot Israel sin nit, naba' oke te sin naluli ma nabes.
Currently Selected:
IMAMAT 9: AOZ
Highlight
Copy
Compare
Share
Want to have your highlights saved across all your devices? Sign up or sign in
