IMAMAT 10
10
Sanat Nai Nadab ma Nai Abihu
1Anbi neno mese Nai Nadab ma Nai Abihu, Nai Harun in anah sin, sin naiti ai in balan mese-mese ma antao ai fla. Oke te sin antao atu fomeni neu ai nane in nanan ma natulu ma natnat neu Uisneno. Mes ai nane ka naleko fa natuin Uisneno kan lenu fa sin he natulu ma natnat. 2Ma Uisneno nasanut ai nem neu sin ma notu sin talante sin anmate anbi Um-ume Uisneno. 3Oke te Nai Musa nak neu Nai Harun nak, “Nane esle' Uisneno In ansali leka In nakua a'an nak, ‘Ale sin le hen tuthae Kau sin mes he tola Kau. Of Au uton Au apinat neu Au nonot sin ok-oke.’ ” Mes Nai Harun in anta'ah kun.
4Nalali te Nai Musa no'en Nai Misael ma Nai Elsafan, Nai Uziel in anah sin, Nai Harun in babaf. In nak neu sin nak, “Aim nai neu i, maiti hi benu sin le hi fe be'i mese sin aon nitu na'ko Um-ume Uisneno ma amtao sin neu Um-ume kotin.” 5Sin nem ma naiti sin benuf sin aon nitu le fe anpake blua pake nane anpoi na'ko um-ume, onle Nai Musa naplenat nani neu sin.
6Oke te Nai Musa nak neu Nai Harun ma in anhen bian, esle' Nai Eleazar ma Nai Itamar nak, “Kais amfe hi nakfunuf sin ansisa'e, ma kais ampisu he blua pake he milile mak him kae ma amkul. Kalu hi mo'e onane, hi of amate, ma nonot Israel ok-oke Uisneno nato'an sin. Mes atoni Israel bian ok-oke nabe'i ankae ma ankul neu atoni nua en le anmate natuin ai na'ko Uisneno. 7Kais misaitan Um-ume Uisneno he nati'e kais hi mate, natuin namepan nalali ki neki mina luli besa he nati'e him tuthae Uisneno.” Sin anmo'e nani onle Nai Musa nak neu sin.
Lekat lulut neu ale Ana' fuat knino
8 Uisneno nakua a'an neu Nai Harun nak, 9“Leka hi minu nilali tua min kase ai mninut le neki mafu ho ma ho anah sin ka nabe'i fa hem tam neu Au Um-ume. Kalu him tanhai lekat lulut nane, of hi mate. Plenat nane ho sanut mofut mes mituin mani. 10Hi mes ambeti mihin sa' le anbeti nateta neu Uisneno ma sa' le kan beti nateta nani fa, sa' le amle'ut ma sa' le ka amle'ut fa. 11Ale plenat le Au fe ani neu ki nao nok Nai Musa hi minoina mani sin neu nonot Israel.”
12Nai Musa nak neu Nai Harun ma neu in anah nua sin, Nai Eleazar ma Nai Itamar nak, “Maiti man ane kase le anesit na'ko bukae le natulu ma natnat neu Uisneno. Na'ko ut le nane anmo'e utunu' le kan pake fa lalu haef, oke te miah mani anbi baki tulu in aon bian, natuin fua tulu nane knino le'uf kun. 13Utunu' nane mes hi miah mani anbi bale le aknino, natuin na'ko bukae le natulu ma natnat neu Uisneno, utunu' nane anfani hi in-ini ma hi an atoni sin. Nane plenat Uisneno 14neu kau. Mes hi ma hi anmone ma hi anbife sin nabe'i hi maih sisi basaf tulu tnatas etus tonas ma sisi pusuf tulu tnatas le nateta nani. Nane pa' ma nama' ale Ana' fuat knino na'ko fua tulu halan nekaf nonot Israel. Hi nabe'i miah mani anbi bale alekot ma amasat. 15Sisi pusuf tulu tnatas le nateta nani ma sisi basaf tulu tnatas etus tonas nane mes meki sin bua-bua nok baluf neu fua tulu mnotu on tulu tnatas le nateta nani neu Uisneno. Sisi bian-bian nane anfani hi ini ma hi anah sin talante nabal-bal, onle Uisneno naplenat nani.”
16Nalali te Nai Musa natoti antom a bibi neu fua tulu sako sanat. Sin naton neune nak bibi nane antunu nalali. Lasi nane anmo'e Nai Musa nato'an Nai Eleazar ma Nai Itamar, ma in nak neu sin nak, 17“Nansa' fua tulu sako sanat nane hi ka miah mani fa anbi bale le aknino? Fua tulu nane knino le'uf kun; Uisneno anfe nani neu ki, he nati'e sanat nonot Israel ansako nani sin. 18Bibi nane in na' ka meki fa neu Um-ume Uisneno, es nane te mes fua tulu nane hi miah mani anbi nane onle au uplenat ulali.”
19Nai Harun natae nak, “Namneo neno i nonot Israel natulu ma natnat nalali fua tulu sako sanat ma fua tulu mnotu neu Uisneno. Maski onane, amle'ut i in nem nameku kau. Ai maski nak neno i au uah fua tulu sako sanat nane amsa, ait Uisneno of anmalin?” 20Nai Musa in anmalin nok han taes nane.
Currently Selected:
IMAMAT 10: AOZ
Highlight
Copy
Compare
Share
Want to have your highlights saved across all your devices? Sign up or sign in
