IMAMAT 3
3
Fua tulu halan
1Leka atoni mese natulu bijae mese neu fua tulu halan, bijae nane nabe'i keso, nabe'i ainaf, mes ka nabe'i fa hen mu'i in amle'un. 2Atoni le natulu bijae nane mes antao in niman neu mu'it nane in anakan ma anlolo anbi Um-ume Uisneno in enon. Ale Ana' fuat knino sanut mofut Nai Harun mes anpofi baki tulu in kabenan ha sin neki bijae nane in na'. 3Fua tulu halan le he natulu neu Uisneno, Ana' fuat knino mes natulu sisi na'ko bijae nane: balun le an amu taifen, 4akif nok in balun ma atef bian le leok le'uf. 5Ale nane ok-oke bua-bua nok fua tulu mnotu bian, mes notu nani sin anbi baki tulu in tunan. Fua tulu bukae nane in fon anhalin Uisneno in nekan.
6Kalu le natulu neu fua tulu halan nane bibi kase mese ai bibi, mu'it nane nabe'i keso, nabe'i ainaf, mes ka nabe'i fa hen mu'i in amle'un. 7Leka atoni mese natulu bibi kase mese, in mes neki neu Um-ume Uisneno. 8Anbi nane in mes antao in niman neu bibi kase nane in anakan oke te anlolo nani anbi Um-ume in enon. Oke te Ana' fuat knino mes anpofi baki tulu in kabenan ha sin neki na'. 9Fua tulu halan le he natulu neu Uisneno, Ana' fuat knino mes natulu sisi bian i na'ko bibi keso nane: in balun, in ikon ok-oke le anmu'i in balun ma anheli anpaumak nuif in kotin, balun le an amu nan in taifen, 10akif nok in balun ma bian le leok le'uf na'ko in atef. 11Ana' fuat knino ameput nane mes notu ale nane oke anbi baki tulu in tunan on fua tulu bukae neu Uisneno.
12Kalu le natulu nane bibi mese, atoni le natulu nane mes neki neu Um-ume Uisneno. 13Anbi nane in antao in niman neu mu'it nane in anakan oke te anlolo anbi Um-ume Uisneno in enon. Ana' fuat knino mes anpofi baki tulu in kabenan ha sin neki na'. 14Fua tulu bukae le he natulu neu Uisneno, Ana' fuat knino mes natulu sisi bian na'ko bibi nane: balun le an amu nan in taifen, 15akif nok in balun ma bian le na leko na'ko in atef. 16Ana' fuat knino ameput nane mes notu nani oke anbi baki tulu in fafon. Fua tulu bukae nane in fon anhalin Uisneno In nekan. Mu'it nane in balun ok-oke neu Uisneno. 17Atoni Israel namneo-namneo ka nabe'i fa hen bukae mu'it in balun ai in na'. Lekat lulut nane antia nabal-bal ma mes atoni Israel mese-mese natuin nani he in natua anbi bale me amsa.
Currently Selected:
IMAMAT 3: AOZ
Highlight
Copy
Compare
Share
Want to have your highlights saved across all your devices? Sign up or sign in
