IMAMAT 21
21
Monit knino ale Ana' fuat knino
1 Uisneno anlenu Nai Musa he nati' natiaba plenat i neu ale Ana' fuat knino sanut mofut Nai Harun nak, “Ana' fuat knino ka nabe'i fa he nale'un in aon natuin in nok anbi luli besa ansub amates na'ko in biaf in benuf, 2somak kalu amates nane in ainaf, in amaf, in olif ai in tataf, 3ai in fetof le kan mamone fa, ma natua ume mese nok in. 4In ka nabe'i fa he nale'un in aon natuin in nok anbi luli besa ansub amates na'ko in fenai in biaf in benuf sin.
5Ana' fuat knino mese ka nabe'i fa hen eu monas in anakan aon bian ma ka nabe'i fa he napalan in konon ai napapa' in aon neki aikan he nalile ma naton neu in ankae ma ankul. 6In anfani Au ini le mabeti kun ma ka nabe'i fa he nale'un Au kanak. In natulu ma natnat fua tulu mnahat ai bukae neu Kau, es nane te in mes he knino kun. 7Ana' fuat knino mese ka nabe'i fa hen mafe nok bife amapaisa ai bife le ka ao teme fa ai le anmapolin, natuin Ana' fuat knino nane Au ini kun. 8Nonot Israel mes hen simo Ana' fuat knino on atoni le nateta nani in neu Kau natuin in natulu natnat fua tulu mnahat ai bukae neu Kau. Au Uisneno kau; Au le i knino kau ma Au uknino Au nonot. 9Kalu anbife na'ko Ana' fuat knino mese anfani bife amapaisa in nale'uf in amaf ma mes notu in talante anmate.
10Ana' Fuat knino Amnanut namepan nalali in nok antesi mina luli besa neu in anakan ma anpake in neki blua pake Ana' Fuat knino Amnanut neu in. Es nane te ka nabe'i fa he nafetin in nakfunu ansisa'e ai anpisu in blua pake on ataka neu in ankae ma ankul. 11-12Natulu ma natnat nalali in neu Kau hen fani Au ini kun, es nane te ka nabe'i fa he nale'un in aon. In ka nabe'i fa amsa he nale'un Au Um-ume natuin anpoi na'ko nane hen tam neu ume le anmu'i amates le in aon nitun anbi nane, maski nak in amaf in aon nitun ai in ainaf kun. 13-14In al nabe'i anmafe nok bife ao temef na'ko in nonot kun. In ka nabe'i fa anmafe nok bife banu ai bife mese le mapolin, anbife amapaisa mese, of in antam amle'ut. Au Uisneno kau ma Au uteta ulali in anfani Ana' fuat knino Amnanut.” 15Kalu in antanhai lekat lulut nane, in anhenu le namneo aknino, of sin antam amle'ut. Au Uisneno kau Au uteta ulali in anfani Ana' Fuat knino Amnanut.”
16 Uisneno naplenat Nai Musa 17he nati' naton lasi i neu Nai Harun nak, “Atoni mese na'ko ho sanut mofut le aon namle'u ka nabe'i fa he natulu natnat fua tulu mnahat ai bukae neu Kau. Nane nanaobon talante nabal-bal. 18Atoni le natulu ma natnat fua tulu ka nabe'i fa he in aon namle'u, esle' atoni afolot, ai ao ole, atoni le in human namle'u ai lokif taluf anbi in aon le namle'u, 19le in niman an ole ai in haen anse'al, 20le in asa'un ankuubu ai atoni kol-kole, le in matan namen ai le namen men poko' ma le anboe in. 21Ale sanut mofut Ana' fuat knino Nai Harun le in aon namle'u ka nabe'i fa he natulu ma natnat fua tulu mnahat ai bukae neu Kau. 22Mes nabe'i in nah mnahat ai bukae le natulu natnat, leko fua tulu mnahat ai bukae le aknino ai fua tulu mnahat ai bukae le knino le'uf kun. 23Fun natuin atoni nane in aon namle'u, in ka nabe'i fa hen haumak pilu ekat le an eka Ke'an Knino ai baki tulu. In ka nabe'i fa he nale'un ale blua le nateta nalali sin neu Kau, natuin Au Uisneno kau, ma Au esle' uteta ale blua nane.”
24Nane lekat lulut le Nai Musa natiaba neu Nai Harun ma in anah sin, ma neu nonot Israel ok-oke.
Currently Selected:
IMAMAT 21: AOZ
Highlight
Copy
Compare
Share
Want to have your highlights saved across all your devices? Sign up or sign in
