IMAMAT 20
20
Kasat neu atoni le ka natuin fa plenat
1 Uisneno anlenu Nai Musa 2he naton lasi i neu to Israel nak, “Ale atoni anbi ki ai atoni anao amnemat le nabala nok ki le natulu in anah neu Molokh, ale to mes anpoli in neki fatu talante in anmate. 3Atoni le natulu in anah neu Molokh, nale'un Au Um-ume ma in nale'un Au kanak le aknino. Of Au kas in ma Au ka so'i teni fa in on lokif taluf Au nonot. 4Kalu to antobe sin matan neu taos mo'et atoni nane ma ka nanaoba fa lasi maten neu in, 5Au eki nok of Au kas in, in ume nanan sin, ale atoni le sin nasaitan Kau ma naluli nabes neu Molokh. Of kan so'i anteni fa sin on lokif taluf Au nonot.
6Atoni le in nao ma antoti fainekat neu mnane le anmo'e malutas ale smanaf atoni amates of Au kas sin ma Au ka so'i teni fa sin on lokif taluf Au nonot. 7Ampanat nai he nati' hi knino, ki piut natuin Au Uisneno es kau. 8Mituin nai Au plenat-plenat sin, natuin Au Uisneno kau le Au beti uteta ki neu Kau.”
9 Uisneno anfe lekat lulut i nak, “Atoni le ansukat in amaf ai in ainaf mes namate nani in. In anmate natuin in sanat kun.
10Leka atoni Israel mese anmapaisa nok atoni mese in fenai le sin fe nonot mese, in ma bife nane mes namate sin. 11Atoni mese le antup nabua nok in amaf in fenai bian, in nale'un in amaf in-ini kun. Atoni nane ma bife nane mes namate sin. Sin anmate natuin sin sanat kun. 12Leka atoni mese antup nabua nok in nanef, sin nua sin mes namate sin. Sin anmapaisa nalali, ma sin anmate natuin sin sanat kun. 13Leka atoni mese antup nabua nok atoni bian, sin anmo'e taos mo'et amle'ut ma le'uf, ma sin nua sin mes namate sin. Sin anmate natuin sin sanat kun. 14Leka atoni mese anmafe nok bife mese ma nok bife nane in ainaf, sin tenu sin mes notu sin talante anmate, natuin sin toas mo'et nane kan matom fa. Toas mo'et onle nane ka nabe'i fa hen moni anbi ki. 15Leka atoni mese antup nabua nok mu'it, atoni ma mu'it nane mes anlolo sin. 16Leka bife mese antup nabua nok mu'it, bife ma mu'it nane mes anlolo sin. Sin anmate natuin sin sanat kun.
17Leka atoni mese antup nabua nok in fetof ai nok in fetof le amaf mese mes es-es in ainaf kun ai ainaf mese mes es-es in amaf kun, kan so'i fa sin anteni on lukif taluf Au nonot. Sin anmo'e nalali taos mo'et le kan matom fa, ma mes sin ansutai in amnekin. 18Leka atoni mese antup nok bife mese le in funan fe nem, kan so'i fa sin anteni on lokif taluf Au nonot.
19Leka atoni mese antup nok in babaf, sin nua sin mes ansutai tanhais nane in amnekin. 20Leka atoni mese antup nabua nok in babaf in fenai, in nale'un babaf. Atoni ma bife nane sin mes ansutai in kasat. Talante sin anmate mes ka napeni fa anah. 21Leka atoni mese in nasik nan in biaf ai in benuf in fenai, in nale'uf in biaf ma in benuf nane ma anmo'e taos mo'et le kan matom fa. Talante sin anmate mes ka napeni fa anah.”
22 Uisneno nakua a'an nak, “Mituin nai ale lekat lulut ma Au plenat, he nati' kaisa anli'u ki na'ko pah Kanaan, le Au eki ki neune. 23Kais amkiso mituin halat uf le natua ma namaika anbi nane. Sin nale'uf Kau nok ale sin taos sin mo'et amle'ut. Es nane te Au li'u sin, he nati' nabe'i him tam neu pah nane. 24Pah amu'it ma maafa nane Au manta'en ulali neu ki, es nane te Au fe ani neu ki anfani hi ini kun.
Hi Usi Uisneno es Au le Au beti aikan ki na'ko uf-uf bian.
25Es nane te hi mes ambeti nok amneot mu'it alekot na'ko mu'it ka alekot. Kais hi miah mu'it le ka alekot. Mu'it nane Au uton ak ka naleko fa, es nane te kalu hi miah of him fani amle'ut. 26Hi Au beti aikan ki na'ko uf-uf bian he nati' him fani Au ini kun. Fun hi mes aknino ki natuin Au Uisneno kau, ma Au knino kau.
27Atoni mese-mese ai bife le anmo'e malutas nok ale smanaf atoni amates mes ampoli meki fatu talante anmate. Atoni nane anmate natuin in sanat kun.”
Currently Selected:
IMAMAT 20: AOZ
Highlight
Copy
Compare
Share
Want to have your highlights saved across all your devices? Sign up or sign in
