YUNUS 4
4
Nek to'as na'ko Nai Yunus ma lasi sako sanat na'ko Uisneno
1Nai Yunus in nekan kan malin fa neu lasi nane; mes in nato' kun. 2Oke te in onen nak, “Koi Uisneno, ai au ka umolok ulali fa nahun na'ko au he poi usaitan au ume, ak namneo of Ho he ka mo'e fa onle i? Natuin lasi le nane tabu le nane au aen eu Spanyol! Au uhin nak Ho Uisneno amatakus ma amanekat, ma nek amnaut, nek mahoe ma Ho muloitan he nati' mubaina salit lasi kasat. 3Tabu le i, koi Uisneno, maut he nati' au mate, natuin alekot anesi kalu au mate na'ko au he moni.”
4 Uisneno natae nak, “Ho ka mu'i fa molok he nati' ho muto' onle nane.”
5Nalali te Nai Yunus in nao neu aon bian neno saen na'ko kot nane, ma in tok anbi nane. In anmo'e ume mese ma nahaofton anbi in nanan, ma anpao sa' le of anbol anbi kot Niniwe. 6Fun Uisneno namonib hau anonok mese ma nahafo Nai Yunus talantia in nekan anmalin. Namneo Nai Yunus anmalin anesin hau sena le nane. 7Mes anbi noka fa nok-noka, Uisneno anmo'e klue mese ma neku nafek hau sena nane in a'ba'an, talantia in anmaknene. 8Leka manas anpe nalali te, Uisneno nasanut anin maputu le anfu na'ko neno saen. Nai Yunus ala kle'ot anmate anfin natuin manas in maputun le notu in anakan. In nekan an ole ma in anlomi hen mate. Nalali te in namolok nak, “Naleko nesi au mate na'ko au moni!”
9Mes Uisneno nakua a'an neune nak, “Ka nabe'i fa he ho mususab ho nekam neu hau sena le nane!”
Nai Yunus in natae nak, “Nansa' he kaisa? Namneo au so uto' talantia au mate.”
10Ma Uisneno nakua a'an neune nak, “Hau sena nane anmoni al anbi fai mese ha, ma in anmaknene anbi noka fa; ho es ka mumonib fa ai ampanat in. Maski nak onane amsa ho nekam in antu' natuin in anmaknene. 11Au mo'e onme ka es au nekak he ka nasusbon fa leka Au utenab neu Niniwe kot anaek le nane. Natuin naik na'ko in mu'it le ka maso'ik fa, anbi nane amsa anmu'i li'ana 120.000 manesi le fe kan beti nahin fa sa' es alekot ma sa' es amle'ut.”
Currently Selected:
YUNUS 4: AOZ
Highlight
Copy
Compare
Share
Want to have your highlights saved across all your devices? Sign up or sign in
