KELUARAN 37
37
Anmo'e Peti Fef Bela
(Kel. 25:10-22)
1Nai Bezaleel anmo'e Peti Fef Bela na'ko ankai kase, in amnanun senti 110, in menuan ma in alatan es-es senti 66. 2In nanan ma in kotin an amu neki mnatu nesaf, ma anmo'e in ninen neki mnatu anfun natef. 3Nalali te anmo'e niti mnatu ha he nati' antao in hau lo'i ma antao nani sin anbi in haenen ha sin, niti nua anbi in aon bian. 4Anmo'e nani in hau lo'i na'ko ankai kase, ma an amu nani neki mnatu, 5oke te hau lo'i nane natam natuin niti le anbi peti in haenen. 6Nalali te anmo'e in toben na'ko mnatu nesaf, in amnanun senti 110 ma in menuan senti 66. 7Ma in anmo'e amsa ahake neno tunan nua na'ko mnatu nesaf matosi, 8ahake neno tunan mese anbi peti in toben aon bian ma es anbi peti in panan tukan, 9ma anmo'e sin anmabaina neun es nok es, ma in ninen le naufon nane an amu nan peti in toben.
Anmo'e mei neu bukae utunu'
(Kel. 25:23-30)
10Nai Bezaleel anmo'e mei na'ko ankai kase le in amnanun senti 88, in mnanun senti 44 ma in alatan senti 66.
11An amu mei le nane neki mnatu nesaf ma nanineb in neki mnatu nesaf anfun natef. 12Ma in anmo'e mei in ninen senti 7,5. In ninen nane antao mnatu nesaf anfun natef. 13Anmo'e niti ha neu in hau lo'i ma antao sin anbi mei in haenen ha sin. 14Niti le he nati' antuntaku hau lo'i le nane antao sin anhaumak mei in ninen. 15Hau lo'i le nane anmo'e na'ko ankai kase ma an amu neki mnatu. 16In amsa anmo'e pika-pika, klas-klas, boti oe ma fane-fane neu ne natulu tua min kase. Mei blua en nane anmo'e sin na'ko mnatu nesaf.
Anmo'e tet paku
(Kel. 25:31-40)
17Ma Nai Bezaleel anmo'e tet paku na'ko mnatu nesaf. In sukit ma in na'an anmo'e na'ko mnatu tosi. In tuna-tuna, ma in sufa teme ma in sufan le anboe anmo'e mese nok in na'an.
18Anbi in na'an nane anmo'e tlaef ne, tlaef tenu anbi aon bian am bian. 19Anbi tlaef mese anmo'e onle tuna tenu nok in sufa teme ma in sufan le natbo. 20Anbi in na'an anmo'e masaf onle tuna ha nok in sufan ma in sufa teme. 21Anbi pasan mese-mese in pinan nane anmo'e tuna sufa mese. 22Paku nane in haen ok-oke nok in sufan sin ma in tlaef sin anmo'e na'ko mnatu tuka mese le matutu kun. 23Anbi paku nane in haen anmo'e paku hitu nok blua he naknino paku nane in abas ma in toben nane na'ko mnatu nesaf. 24Neu he nati' anmo'e tet paku nane ma in blua sin anmo'e na'ko mnatu nesaf kilo 35.
Anmo'e baki tulu he natulu atu fomeni
(Kel. 30:1-5)
25Nai Bezaleel anmo'e baki tulu bale mnotu atu fomeni na'ko ankai kase. Baki tulu nane in kabenan ha; in amnanun ma in menuan es-es senti 45 ma in alatan senti 90. Ma anbi in susuf ha sin fafon anmo'e sunaf le namasab nok baki tulu le nane. 26Anbi kabenan ha sin ma sunaf sin fafon an amu neki mnatu nesaf ma in ninen anmo'e na'ko mnatu anfunam natef. 27Anmo'e niti nua amsa anbi in kabenan he nati' antuntaku baki tulu nane in hau lo'i. 28Hau lo'i le nane anmo'e na'ko ankai kase ma an amu neki mnatu.
Anmo'e min buat ma atu fomeni
(Kel. 30:22-38)
29Nai Bezaleel amsa anmo'e mina neu buat ma klali nesaf le anfomeni ma anselo onle min fobona.
Currently Selected:
KELUARAN 37: AOZ
Highlight
Copy
Compare
Share
Want to have your highlights saved across all your devices? Sign up or sign in
