KELUARAN 36
36
1Nai Bezaleel, Nai Aholiab, ma ale atoni apakaet sin le napeni tenab alekot ma hinet na'ko Uisneno, sin nahine ale lanan neu he nati' anmo'e ale sa' le anpake neu he nati' nafena Um-ume Uisneno. Sin of anmo'e ale sa' le Uisneno naplenat nalali.”
To Israel sin naiti ma anfe ale sa'
2Nai Musa anboin Nai Bezaleel, Nai Aholiab ma ale atoni-atoni le sin napeni hinet na'ko Uisneno ma le anlomi hen tuntaku, oke te anlenu sin he nafena mepu. 3Nai Musa anfe neu sin ale blua le atoni Israel sin nabuaba neu he nafena Um-ume Uisneno. Mes to Israel sin neki tulu piut neu Nai Musa anbi nok-noka. 4Oke te ale apakaet le nafena mepu nane sin nem ma natonan ma natonan Nai Musa nak, 5“Ale blua le atoni-atoni nabuaba nane nesi na'ko salit neu mepu le Uisneno anlenu nani.”
6Ma Nai Musa naton neu ale ale' um-ume oke nak ale blua le sin nabuaba neu Um-ume Uisneno nanokbon nalali, es nane te atoni-atoni kais neki sa'-sa' anteni. 7Ale sa'-sa' le sin nabuaba nane anesi na'ko salit neu he nasopu ale mepu nane.
Ale apakaet sin nafena Um-ume Uisneno
(Kel. 26:1-37)
8Namuni te ahinet-ahinet anbi ale apakaet sin anmepu Um-ume Uisneno. Um-ume nane sin anmo'e na'ko pilu muti manula tuka bo'mese le matenu na'ko ab mate manafu, kanalu ma me', ma nabuna ahake neno tunan in human anbin. 9Tuka mese in amnanun namnes nok es; in amnanun meter 12 ma in menuan meter 2. 10Pilu tuka sin antalu anfani pilu naek tuk es, ma tuka nim sin bian anmo'e onan amsa. 11Anbi pilu naek nua en nane sin ninen antao in ninen na'ko pilu mate, 12anbi pilu naek mese antao aisat bo'nim, talante pilu nua en nane anfani pasan mese. 13Ma anmo'e kai mnatu bo'nim ma nameseb pilu naek nua en nane.
14Nalali te sin anmo'e Um-ume nane in toben neki pilu tuka bo'es am mese le antenu na'ko bibi in funun. 15Tuka mese in amnanun namnes nok es, in amnanun meter bo'es am tenu ma in menuan meter nua. 16Pilu tuka nim sin antalu anfani pilu naek mese, ma pilu tuka ne en nane sin anmo'e onan amsa. 17Anbi pilu ahunut ma amunit sin ninen antao es-es aisat bo'nim. 18Oke te anmo'e a'kaif bo'nim na'ko niti molo he nameseb pilu naeken nane anfani Um-ume in oben. 19Nalali te anmo'e eka nua neu Um-ume le nane, es na'ko bibi kase keso in pasun le anlep neu me', ma bian na'ko pasu malula.
20Nalali te sin anmo'e Um-ume in hau mneo ma mnanu na'ko hau ankai kase. 21Hau mneo mese in amnanun meter ha ma in menuan senti bo'ne am ne. 22Anbi bena mese antao suan nua le anpasan sin, talante bena-bena nane anmalutab sin es nok es. 23Anbi Um-ume in bian a'ne'u sin antao bena bo'nua, 24nok in sukit sin bo'ha le anmo'e na'ko noni muti, nua anbi bena mese neu in suan nua sin. 25Neu Um-ume in bian a'li antao bena bo'nua, 26nok in sukit sin bo'ha na'ko noni muti nua anbi bena mese. 27Neu Um-ume in kotin antom neno tesan, antao bena ne 28ma bena nua neu in si'un. 29Bena-bena anbi in si'un anmalutab sin na'ko pinan antia in fafon. Bena nua sin le nasiubok nane anmo'e sin onane amsa. 30Es nane te sin alsin bena fanu nok sukit na'ko noni muti bo'es am ne, nua anbi bena mese in un.
31Ma sin anmo'e hau kbat bo'es am nim na'ko ankai kase, bena nim neu Um-ume in kabenan mese, 32ma nim anteni neu in kabenan bian, ma nim anteni neu Um-ume in kotin aon neno tesan. 33Hau kbat abit atnanan, in amnanun astena na'ko bena mese ma antao na'ko Um-ume in panan bian antia in aon bian. 34Um-ume in benan sin ma in kbaten le nane an amu sin neki mnatu, neu hen tuntaku hau-hau nane.
35Sin an mo'e amsa pilu eno na'ko pilu muti manula le matenu na'ko ab mate manafu, kanalu ma me', nalali te nabuna ahake neno tunan in masan. 36Neu he nati' naboni pilu le nane anmo'e nani ni ha na'ko ankai kase ma an amu neki mnatu nok in kai mnatu ma nahakeb sin anbi sukit ha le anmo'e na'ko noni muti. 37Ma anmo'e pilu eka naek neu Um-ume in enon anmo'e na'ko pilu muti manula le antenu nok ab mate manafu, kanalu ma me' ma namasab neki buna. 38Neu pilu eka naek nane sin anmo'e ni nim le anmatalub sin neki kaif. Ni nim panken ma sin mataluken nane an amu sin neki mnatu, ma in sukin nim sin anmo'e sin na'ko niti molo.
Currently Selected:
KELUARAN 36: AOZ
Highlight
Copy
Compare
Share
Want to have your highlights saved across all your devices? Sign up or sign in
