KELUARAN 30
30
Baki fuat bale he notu atu fomeni
(Kel. 37:25-28)
1 Uisneno nakua a'an anteni neu Nai Musa nak, “Anmo'e baki fuat mese na'ko ankai kase anfani bale he notu atu fomeni. 2Baki fuat nane in kabenan ha; in amnanun ma in menuan senti 45, ma in alatan senti 90. Anbi in kabenan anmo'e sunaf-sunaf le anmatalun mese nok baki fuat le nane. 3Anbi in fafon, nok in siufen ha sin ma sunaf-sunaf nane so am amu sin meki mnatu nesaf ma munineb meki mnatu nesaf amsa. 4Anmo'e niti nua anbi kabenan in ninen apinan he nati' antuntaku hau lo'i baki fuat le nane. 5Hau lo'i nane so anmo'e na'ko ankai kase ma am amu meki mnatu. 6Amtao baki fuat le nane anbi kotin na'ko pilu le anbi Peti Fef Bela in matan, anbi bale of Au u eku oke ko anbine. 7Anbi nok-noka leku Nai Harun nem ma naloitan paku, so in notu atu fomeni anbi baki fuat nane in tunan. 8Lasi nane so in anmo'e nani amsa anbi leku in napina paku anbi neno mese. So in natulu atu fomeni nane piut anbi ale batan. 9Anbi baki fuat nane in tunan kais mitulu atu fomeni le makaina, tulu mu'it ai tulu bukae; ma kais am opan tulu tua min kase anbi in fafon. 10Haef mese anbi ton mese so Nai Harun anmo'e tolas he naknino baki fuat nok lanan mu'it le he natulu anfani tulu sako sanat in na' neu sunaf-sunaf anbi baki fuat nane. Lasi nane so in nanaoba piut haef mese anbi ton mese anbi ale batan. Baki fuat nane so naknino anfun natef ma anpaisan neu Kau.”
Tnatas neu Um-ume Uisneno
11 Uisneno nakua a'an neu Nai Musa nak, 12“Anbi leku him so'i to Israel, atoni mese-mese so anbaen neu Kau noni hen soinan in aon he nati' kais in antoman asnama anbi leku hi minaoba so'it le nane. 13Atoni-atoni le antam aif ma antam so'it so in anbaen noni fauk-fauk le anlek nani anmatom nok upa' anbi Au Um-ume le anfani sutais neu Kau. 14Atoni mese-mese le anso'i natam anbi so'it le nane esle' atoni le in uan ton bo'nua ai anesi, so in anfe sutais le nane. 15Atoni amu'it of kan baen anesi fa, ma atoni anukat kais anbaen kan tia fa anbi tabu anbaen hen soinan in aon. 16Ma amsimo noni nane na'ko atoni Israel sin, ma miotab neu luli besa anbi Au Um-ume. Le nane ok-oke anfani on noni hen soinan sin monin, ma of Au umnau sin piut, ma uneo uhafo sin.”
Bak na'ko nit molo
17 Uisneno nakua a'an neu Nai Musa nak, 18“Anmo'e bak mese na'ko niti molo ma in sukit na'ko niti molo amsa. Amtao bak le nane anbi Um-ume ma baki fuat sin atnanan, ma mutua meki oe.
19Oe nane neu Nai Harun nok in anah sin he nati' sin anboe sin niman ma sin haen 20-21nahun na'ko sin antam neu Um-ume ai anhaumak baki fuat he neki fua mnotu. Lasi nane so sin nanaoba nani he nati' kais sin anmate. Lekat lulut le i so sin ma sin sufan anmo'e nani tal nabal-bal.”
Mina neu tolas
22 Uisneno nakua a'an neu Nai Musa nak, 23“Maiti nai fo bona-fo bona alekot anesit, klali kilo ne, hau meunana kilo tenu, tefu fo bona kilo tenu, ma hau fomeni kilo ne. 24Amtai sin meki atnais le him pake anbi Au Um-ume in nanan. Ma amsato amteni min fomeni liter ha, 25anmo'e min tolas ma amselo onle min fomeni. 26Ampake selot le nane he nati' ampofi Au Um-ume, Peti Fef Bela, 27mei ma ale in blua nane, tet paku ma in blua sin, bale fua mnotu atu fomeni, 28baki fua mnotu nok in blua sin ma bak oe nok in sukit. 29Nok lanan le nane so ho muteta ale blua nane neu Kau, he nati' sin al sin na knino. Ale sa' le antoman baki fuat nane so in natulu neu Uisneno, ma sekau le anpoe in of napeni amle'ut natuin in kninon le nane. 30So hi mipehe Nai Harun nok in anah sin he nati' sin mamepan anfani Ana' fuat knino he nati' antuthae Kau. 31Mitonan to Israel mak min tolas le nane ampaisan neu Kau anbi ale batan. 32Mina le nane ka nabe'i fa he him ponin neu atoni to. Kais anmo'e mina masaf le nane amsa nok selot le namnes. Natuin mina nane in knino kun, ma so hi mibaina anfani blua knino. 33Atoni le anmo'e mina masaf nane, ai le anpake mes in kan fani fa Ana' fuat knino, Au ka umasab fa anfani lokif taluf na'ko Au to.”
Atu fomeni
34 Uisneno nakua a'an neu Nai Musa nak, “Maiti fobona masaf fauk-fauk le in amfaun namnes, esle' paku kase in oen, panbu' tasi in apo'an, hau molo in oen ma atu fomeni nesaf. 35Maiti alsin le nane ma anmo'e atu fomeni selo le anfomeni. Amtao masi akle'o he nati' atu fomeni le nane naleko nabala ma nabe'i anpake neu Kau. 36-37Atu fomeni nane in bian so nati' maul talante namnul. Meki neu Au Um-ume ma amkifun anbi Peti Fef Bela in matan. Atu fomeni nane knino kun ma so him paisan neu Kau. Kais hi mo'e atu fomeni maselo meki selot le namnes neu ko. 38Sekau es anmo'e fobona onle nane, of Au ka umasab fa anfani lokif taluf na'ko Au to.”
Currently Selected:
KELUARAN 30: AOZ
Highlight
Copy
Compare
Share
Want to have your highlights saved across all your devices? Sign up or sign in
