KELUARAN 29
29
Lekat lulut he namepan Nai Harun ma in anah sin hen fani Ana' fuat knino
(Im. 8:1-36)
1“Le i lanan he hi mimepan Nai Harun ma in anah sin he nati' sin nabe'i antuthae Kau anfani Ana' fuat knino. Maiti bijae keso tipu mese ma bibi kase keso nua le kan mu'i fa in amle'un. 2Amkabu ut kais nok lalu haef, na'ko ut alekot. Utunu' nane in bian so anmo'e utunu' nok fomeni, ma in bian kais nok mina, ma in nesin anmo'e kokis, ma amnose mina neune. 3Amtao sin neu poni in nanan ma mitulu le nane neu Kau minaoba nok tulu bijae keso tipu ma bibi kase nua en nane.
4Amlenu Nai Harun ma in anah-anah sin he nem anbi Au Um-ume in eno nok naknino sin aon. 5Mipakeb blua pake Ana' fuat knino neu Nai Harun: sobalu, efod, sobalu bet kone le an aum nan efod, pilu basaf ma futu tnanaf. 6Amtaone pilu neu in nakan, ma mikiab neu in pilu nane meki mnatu nok lunat ‘Mabeti neu Uisneno’. 7Oke te maiti mina tolas, am op neu in nakan ma mu'pehe in.
8Nalali onane te, amboin in anah-anah sin ma amtao neu 9sin sobalu ma futu tnanaf neu sin, oke te amtao pilu neu sin nakan. So hi mimepan Nai Harun nok in anah sin onle nane. Sin ma sin sufan so' anfani atuthaes neu Kau anfani Ana' fuat knino tal nabal-bal.
10Namuni onane so hi meki bijae keso nane anbi Au matak, anbi Au Um-ume in enon. So Nai Harun nok in anah sin antao sin niman neu mu'it nane in anakan. 11Amlolo bijae keso nane anbi Au matak, anbi Au Um-ume in enon. 12Maiti bijae nane in na', ma amnose meki ho klulum neu sunaf-sunaf anbi baki tulu le nane, Na' le nane in nesin so hom opan anbi baki tulu nane in nupun. 13Nalali onane te maiti afa' le an amu in taifen, ma nesan alekot na'ko in aten ma in akin sin ma in afan ma amtao sin oke anbi baki tulu in tunan ma motu mani he nati' anfani tulu neu Kau. 14Bijae nane in nesan, in pasun ma in taifen so motu mani sin anbi Um-ume in kotin. Nane tulu sako sanat neu ale Ana' fuat knino sin.
15Namuni onane te maiti mese na'ko bijae keso le nane. Nai Harun nok in anah sin so antao sin niman anbi mu'it nane in anakan. 16Amlolo mu'it le nane, maiti in na' ma amponin neu baki fuat nane in kabenan ha sin. 17Bibi kase nane so amketu tuka-tuka. So amboe in taifen ma in pusun ma amtao sin antom fafon na'ko in anakan ma tukan bian sin. 18Mitulu bibi kase keso nane oke anbi bale fuat in tunan he nati' anfani fua mnotu. Fua tulu nane in fon anhalin Au nekak.
19Maiti amteni bibi kase keso nane, esle' bibi kase keso neu tolas mepan. Amlenu Nai Harun ma in anah sin antao sin niman neu mu'it nane in anakan. 20Oke te amlolo bibi kase nane, maiti in na' akle'o ma amnose neu Nai Harun ma in anah sin luken ne'u in un ma neu in klulu naet na'ko haen ma niman ne'u. Na' le nane in nesin amponin neu baki fuat un kabenan ha sin. 21Maiti na' akle'o le anbi baki fuat in tunan ma min tolas, ma amlisin neu Nai Harun nok in anah sin ma neu sin blua pake. Nok lanan nane Nai Harun ma in anah sin ma sin blua pake nane naknino'ok neu Kau.
22Maiti bibi kase keso nane in afan, ma in ikon le maafa, ma afa le an amu in taifen, ma in aten alekot, ma in akin nok in afan, ma in pusun ne'u. 23Na'ko ki'u utunu' le ho mutulu mulali neu Kau, maiti utunu' nane na'ko masaf mese: mese le maselo nok min fomeni, mese le ka maselo fa neki mina, ma kokis mese. 24Ma amtao ale bukae nane anbi Nai Harun ma in anah sin niman ma amlenu sin he na'aiti neu Kau anfani tulu loitan balab. 25Ma amsimo utunu' le nane na'ko sin ma motu anbi baki fuat in tunan anbi fua mnotu nane in tunan. Tulu le nane in fon anhalin Au nekak.
26Maiti bibi kase keso nane in a'basan ma mitulu anfani tulu loitan balab neu Kau. Ma nane anfani ho ini.
27Anbi tolas mepan Ana' fuat knino in nanan, bibi kase keso in basan, in pusun le anpake anbi tolas le nane so mitulu mani neu Kau anfani tulu loitan balab ma ampaisan neu ale Ana' fuat knino sin. 28Le i Au fekat le ka nabe'i fa he him seka: Anbi leku Au to sin nem ma natulu fuat halan nekaf, mu'it nane in basan, in pusun nane anfani Ana' fuat knino sin ini.
29Nai Harun in blua pake luli besa so hi misanut neu in anah sin, he nati' sin anpake anbi leku namepan sin. 30Nai Harun in anah le anfani Ana' fuat knino anseka in amaf le antam neu Au Um-ume he nati' nanaoba luli besa anbi ke'an knino, so in anpake blua le nane anbi neno hitu in nanan.
31Maiti bibi kase keso nane in nesan le ampake anbi tolas namepan Nai Harun ma in anah sin ma mihan sisi le nane anbi bale mese le naknin'on. 32Sisi nane so sin anbukae nani nok utunu' in nesin anbi Au Um-ume in enon. 33So sin anbukae mnahat le natulu tolas sako sanat in nanan anbi leku namepan nani. Alkun Ana' fuat knino es nabe'i anbukae mnahat le mabeti neu Kau. 34Leka anbi noka fa am nok-noka sisi ai utunu' nane fe anesi, in nesin nane so sin notu nani, ma ka nabe'i fa he hi miahan natuin anbati nalali neu Kau.
35Tolas mepan neu Nai Harun ma in anah sin so hi mo'e mani anbi neno hitu in nanan, onle Au uplenat ulali neu ko. 36So hi mitulu bijae keso mese anbi neno mese anfani tulu sako sanat. Amo'e lasi halan ma miknino mani baki fuat nane. 37Anmo'e lasi nane neno-neno anbi neno hitu in nanan. Nok nane baki fuat naknino'on anfun ma natef; ale sa' le antoman baki fuat nane so mina'at neu Uisneno, ma sekau es anpoi of napeni amle'ut natuin in knino kun.”
Fua tulu anbi nok-noka ma neno mabe
(Bil. 28:1-8)
38“So ho mutulu bibi kase keso le in uan ton mese neno-neno anbi Au baki fuat le nane in tunan tal nabal-bal. 39Ana mese neu tulu anbi nok-noka ma le ana mese anten neu tulu anbi neno an mabe. 40So mutulu bibi kase keso anbi nok-noka nok ut alekot kilo mese amselo nok min fomeni nesaf botil mese ma batis. Naik na'ko le nane tua min kase botil mese ma batis amsa. 41Bibi kase neu he matulu anbi neno mabe so anmo'e namnes onane amsa, esle' nok ut, min fomeni ma tua min kase. Fua mnotu nane info bonan anhalin Au nekak. 42Ma neu ale batan, so hi mitulu fua mnotu anbi Au matak anbi Au Um-ume in enon. Anbi nane of Au u eku oke Au to ma umol-molok neu ko. 43Anbi nane of Au u eku oke to Israel, ma Au apinat of naknino bale le nane. 44Of Au uknino ani Um-ume ma baki fuat le nane. Nai Harun ma in anah sin Au beti sin na'ko le bian he nati' sin antuthae Kau anfani Ana' fuat knino. 45Of Au umaika anbi to Israel sin atnanan, ma Au fani on sin Uisneno. 46Sin of nahin nak Au le i sin Uisneno le upoitan ulali sin na'ko pah Mesir, he nati' Au umaika anbi sin atnanan. Au le i sin Uisneno.”
Currently Selected:
KELUARAN 29: AOZ
Highlight
Copy
Compare
Share
Want to have your highlights saved across all your devices? Sign up or sign in
