KELUARAN 27
27
Baki tulu
(Kel. 38:1-7)
1“Anmo'e baki tulu mese na'ko ankai kase. Ma si'uf ha, in amnanun ma in menuan es-es meter 2,2 ma in alatun meter 1,3. 2Anbi si'uf mese-mese in tunan so anmo'e sunaf-sunaf le anmalutan mese nok baki tulu. Ma am amu sin meki niti molo. 3Anmo'e tasu-tasu, blua neu afu, pika-pika, ma blua tao ai. Blua-blua nane anmo'e na'ko niti molo. 4Mikano kaba na'ko niti molo ma amtao niti ha neu in hau lo'i anbi in si'uf ha sin in apinan. 5Kaba makano le nane in alatan so anbati tnana na'ko baki tulu nane in atnanan. So mifena kaba makano nane anbi baki tulu in apinan. 6Anmo'e hau lo'i nua na'ko ankai kase ma am amu mani meki niti molo, 7ma mitam anao natuin niti-niti nanan le anbi baki tulu leka him lo'i baki tulu nane. 8Anmo'e baki tulu nane na'ko bena ma in nanan nane nanupubon, namnes nok sukit le Au uton ulali neu ko anbi tubu le i in tunan.”
Po'an Um-ume Uisneno
(Kel. 38:9-20)
9“Anmo'e po'an anfun natef Au Um-ume ma am amu meki pilu muti malula. Ma anbi in bian a'ne'u, pilu nane in amnanun meter 44, 10ma amtuntaku meki niti molo bo'nua, es-es amsuki meki niti molo, ma in ka'i ma in poni nane na'ko niti molo. 11Anmo'e onan amsa neu in kabenan a'li. 12Anbi aon bian neno tesan, pilu nane in amnanun meter 22, nok ni bo'mese ma sukit bo'mese. 13Anbi aon bian neno saet, le anmu'i in eno, pilu nane in amnanun meter 22 amsa. 14-15Anbi eno nane in aon bian a'li ma a'ne'u amtao pilu, es-es in amnanun meter 6,6 ma nok ni tenu anbi sukit tenu in nanan. 16Neu in eno so amtao pilu eka naek in amnanun meter 9 na'ko ab malula, le antenu na'ko pilu manafu mas mate, kanalu ma me amtasa ma mabuna. He nati' amtuntaku pilu nane so' hi mihakeb ni ha nok sukit ha. 17Ale ni le nane anfun am natef po'an nane so hi matalub sin es nok es meki klais le hi mo'e na'ko noni muti, ma in sukit na'ko niti molo. 18Pilu anfun natef po'an nane in amnanun meter 44, in menuan meter 22 ma in alatan meter 2,2. In pilu nane so anmo'e na'ko pilu muti malula ma in sukit na'ko niti molo. 19Ale blua le him pake anbi Um-ume in nanan, ma ale suan neu Um-ume ma neu in pilu so anmo'e na'ko niti molo.”
Paku in palolin
(Im. 24:1-4)
20“Amlenu atoni Israel neki mina bub fua mina le ka maselo fa ma le naleko nesi neu paku le anbi Um-ume In nanan he nati' mamnotu ma anpin piut. 21Nai Harun ma in anah sin so anpaloli paku le nane na'ko neno anmabe talante nok-noka anbi bale Au bine, anbi pilu le maboni in kotin anhaumak nok Peti Fef Bela in matan. Plenat le i so atoni Israel nok sin sufan anmo'e nani talante nabal-bal.”
Currently Selected:
KELUARAN 27: AOZ
Highlight
Copy
Compare
Share
Want to have your highlights saved across all your devices? Sign up or sign in
