KELUARAN 15
15
Sit pules Nai Musa
1Oke te Nai Musa ma atoni-atoni Israel ansi sit le i ma anpules Uisneno nak,
“Au he si sit pules neu Uisneno,
natuin In nis nalali nok matani.
Ale bikase ma asaet sin
In anpolin sin neu tasi in nanan;
2 Uisneno au apesit le matani;
In es nafetin kau.
In le nane au Uisneno, au he uliatat In,
Uisneno le au na'i au be'i nabes neune, au uliatat In.
3 Uisneno nane meo naek abe'it ma matani,
In kanan nane, Uisneno.
4Meo pa'e Mesir ma ale sin aklet sin
In anpolin natam sin neu tasi in nanan.
In meo pa'e nakaf sin le abe'it ma matani
In nalema sin anbi Tasi Gelagah in nanan.
5Tasi amnanut an olo nan sin,
ma onle fatu ansanu neu in tu'in.
6Ho be'im ho matanim neki lasi am kakat nae le'uf, koi Uisneno,
Ho mo'e musu nasitbok oke.
7Nok Ho apinat le anaek
Ho mule'un sin le anlaban Ko.
Ho to'as nane anpin on ai,
ma notu sin on aen ta'u.
8Tasi Ho amfu, in oe an nunuon namnanu,
anhake namep on baki lape,
talante sin anao nok tasi in atnanan.
9Musu nak, ‘Of au li'u sin ma au heke sin,
au faki au suni, ma au umate sin.
Oke te au usik an sin amaus,
au bati ma au umlil talante namsopu.’
10Mes leka Uisneno anfun In asnasan haef mese
nasanut amle'ut neu atoni Mesir.
Sin anleman onle tnopas le mafena
anbi okin amaunut in nanan.
11Uisneno me es nabe'i hen laban Ko,
koi Uisneno Apinat Anesit ma aknino?
Sekau nabe'i anmo'e ale lasi amkakat
ma taos mo'et anaet onle Uisneno?
12Ho menu Ho nukum ne'u, ma musu namneku natuin pah
pinan an olo nan sin.
13Hom fani atopus neu to le Ho mufetin mulali sin,
natuin Ho mu'ki neu fef ba'an.
Nok be'it matani Ho muneo ma muhafo sin,
ma Hom topu sin neu Ho bale knino.
14-15Uf-uf sin anen ma na'tai,
atoni Filistin ma ale atopus Edom sin naskeken.
Atoni Moab le abe'it ma matani sin na'tai,
atoni Kanaan sin namtau.
16Sin namtau nae le'uf ansaksi be'it ma matani Uisneno.
Anbi tabu Ho to sin anfin ma ankon,
musu kan mu'i fa kuasat hen eka sin;
to le Ho mufetin sin anfini ma ankono kun.
17Oke te Ho meki Israel neu bale le Hom beti
hen fani Ho bale maika.
Sin namaika nabala anbi Ho tubu knino,
anbi Ho Ume le Ho es mufena.
18Ho Uisneno ko, Kesel,
le muplenat tal nabal-bal.”
Bi Miryam in sit pules
19Anbi tabu atoni Israel sin anlak tasi, sin anao natuin in atnanan le anmeto. Mes leka aklet-aklet atoni Mesir nok bikase ma atoni asaet sin antam anbi tasi, Uisneno naekub nafani in oe talante sin anleman.
20Oke te bi Miryam, mafefa knino bife mese, Nai Harun in tataf, in naiti ket', ma ale bife sin anleku ma nabso'an. 21Bi Miryam ansi neu sin nak,
“Amsi nai neu Uisneno,
natuin In nis ma anbe'u nalali nok matani.
Ale bikase ma asaet sin
anpolin natam sin neu tasi in nanan.”
Oe min menu
22Nalali te Nai Musa in neki to Israel na'ko Tasi Gelagah sin anao neu mnela snaen Syur. Anbi neno teme tenu sin anao natuin mnela snaen mes sin ka nit fa oe. 23Oke te sin nem antia bale mese in kanan Mara, mes oe anbi nane meun le'uf kun, talante ka nabe'i fa he sin ninu. Es nane te bale nane antek nak Mara, in oten nak menu. 24Ma atoni-atoni nane namunu Nai Musa ma sin natoti in nak, “Hai of minu sa' ka?” 25Nai Musa in onen neu Uisneno nok amneot, oke te Uisneno naton neune hau tuka mese. Nai Musa anpolin natam hau nane neu oe in nanan, oke te oe nane namin anfani, talante nabe'i sin ninu.
Anbi bale nane Uisneno anfe In lekat lulut neu sin, ma anbi nane amsa In ansu' sin. 26Uisneno nakua a'an nak, “Mituin Au plenat sin nok amneot, ma mo'e nai sa' le naleko anbi Au kisot; mituin nai ale Au plenat sin. Kalu hi mo'e onane, of Au ka kas ki fa eki menas-menas le Au usanut ulali neu atoni Mesir. Au le i Uisneno le es uleko ki.”
27Nalali onane te sin nem antia bale le in kanan Elim. Anbi nane anmu'i oe mata bo'es am nua ma pet kase bo'hitu. Sin nahakeb sin um-ume anhaumak oe mata nane.
Currently Selected:
KELUARAN 15: AOZ
Highlight
Copy
Compare
Share
Want to have your highlights saved across all your devices? Sign up or sign in
