ULANGAN 3
3
Israel sin nis ma anbe'u Kesel Nai Og
(Bil. 21:31-35)
1“Nalali te hit atfen ma atnao teu bian a'li at ali pah Basan. Nai Og, kesel Basan nem nok ale in to ok-oke he anmaken nok kit anhaumak kot Edrei. 2Mes Uisneno nakua a'an neu kau nak, ‘Kais mumtausan in, Musa. Au of una'at in, in solalus sin ma in pah ok-oke neu ko. Amtao ma anmo'e in onle ho amtao ma anmo'e Nai Sihon, kesel Amori le naplenat anbi Hesybon.’
3Es nane te hit Uisneno nana'at neu kit amsa Kesel Nai Og ma in to neu kit ma hit tis ma atbe'u sin al-al sin. 4Anbi tabu nane hit tis tan ale sin kot ok-oke, katit fa mese amsa le he namaika. Bua'-bua' kot bo'ne le hit tasik tan sin anbi pah Argob, le Kesel Nai Og naplenat na'ko Basan. 5Ale kot nane nahelan sin neki baki lape amnanut, eno-eno naek ma senit-senit makusa neu hen ek eno-eno nane. Anmu'i kot namfau anteni le ka mabaki lape fa. 6Ale kot nane hit tale'un taskuku tani sin, ma ale atoni, bife ma sin anah-anah sin hit tamate sin, onle hit atmoe nok kot-kot Kesel Nai Sihon na'ko Hesybon. 7Sin mu'it hit tasik tan sin ma kot-kot nane hit atet tan sin.
8Anbi tabu nane hit taiti na'ko kesel Amori nua sin, sin pah anbi Noe Yordan neno saen ma Noe Arnon talantia Tubu Hermon. (9Tubu Hermon atoni Sidon antek nak Siryon, ma atoni Amori antek nak Senir.) 10Hit taiti Kesel Nai Og in pah ok-oke na'ko Basan: in kot-kot sin anbi mnela fafon, pah Gilead ma Basan, talantia neno saen kot Salka ma Edrei.”
(11Kesel Nai Og nane atoni Refaim amsoput. In peti nitu nane anmo'e na'ko fatu, in amnanun meter ha ma in menuan ala kle'ot meter nua natuin su'at le natetab nani. Talantia neno i fe nabe'i hit tit anbi Raba, atoni Amon sin kot.)
Uf-uf le natua pah anbi Noe Yordan aon neno saen
(Bil. 32:1-42)
12“Leka pah nane anfani hit ini, au fe ani pah aon bian a'li kot Aroer anhaumak Noe Arnon, ma pah Nuaf Gilead aon bian, ma in kot-kot sin neu uf Nai Ruben ma Nai Gad. 13Ma neu uf Nai Manasye aon bian au fe ani pah Gilead aon bian, onane amsa Basan afi Nai Og in bale plenat, esle' pah Argob ok-oke.”
(Basan mateka on pah atoni Refaim. 14Nai Yair na'ko uf Nai Manasye in naiti pah Argob ok-oke, esle' na'ko Basan talantia nakat Gesur ma Maakha. In nakanab kuan-kuan nane natuin in kanan, ma talantia neno i fe mateka on kuan-kuan Nai Yair.)
15“Pah Gilead au fe ani neu Nai Makhir in nonot na'ko uf Nai Manasye. 16Ma neu uf-uf Nai Ruben ma Nai Gad au fe ani pah Gilead ma Noe Arnon. Atnankenu noe nane atnanan anfani sin nakat anbi bian a'ne'u, ma anbi bian a'li sin nanak kot Noe Yabok, ma bian anteni anfani nakat pah atoni Amon. 17Anbi neno tesan, sin pah menuan talantia Noe Yordan, na'ko Nifu Galilea anbi bian a'li antia Tasi Maten anbi bian a'ne'u, talantia Tubu Pisga haen anbi aon neno saen.
18Anbi tabu nane au fe neu sin plenat i: Hi Uisneno anfe neu ki pah Noe Yordan aon neno saen bale he hi mitua mani. Mes hi solalus sin mes anpake bale manuat ma anlak Noe Yordan nahunun uf-uf Israel bian. 19Al hi anah sin ma hi fenai sin ma hi mu'it sin le namfau nabe'i namaika anbi kot-kot le au fe ulali neu ki. 20Amtuntaku atoni-atoni na'ko hi nonot talantia natua pah le of hi Uisneno anfe neu ki anbi Noe Yordan aon neno tesan, ma talantia Uisneno anlomi anfe neu sin anmoni nok alekot anbi nane, onle In antao ma anmo'e neu ki anbi i. Oke onane te nabe'i hi amfani meu pah hi ini le au fe ulali neu ki.
21Oke te au naak neu Nai Yosua: Ho mit mulali ale sa' le ho Uisneno anmo'e nalali neu Nai Sihon ma Nai Og, kesel nua eun nane. Onane amsa In of anmo'e neu kesel mese-mese le ho musik sin pah. 22Kais mumtausan sin, natuin ho Uisneno of anmabe'u anseka ko.”
Ka nafetin fa Nai Musa hen tam neu Kanaan
23“Anbi tabu nane au toti neu Uisneno nak: 24Koi Uisneno Anesit Afinit, au uhin nak sa' le ho mulila ma muton neu kau le i fe on ahunut na'ko Ho taos Ho mo'et le anae le'uf ma amkakat. Katit fa uisneno teta anbi neno tnanan ma pah pinan le papmese onle Ho le nabe'i anmo'e lasi-lasi le matani. 25Mufetin kau he au lak Noe Yordan, koi Uisneno, he au kiso it pah le maafa anbi noe aon bian, pah nuaf le amasat ma Nuaf Libanon.
26Mes hi amtao ma anmo'e milali talantia Uisneno nato'an kau ma In kan lomi fa hen simo au han totis. Mes Uisneno nakua a'an nak, ‘Nanokbon nai, Musa, kais hom tek lasi nane anteni! 27Amnao nai meu Tubu Pisga in tunan ma amkiso nai neu bian a'li ma bian a'ne'u, neu neno saen ma neno tesan. Amkiso mulek-leko sa' le hom kiso nane, natuin ho of kam lak fa Noe Yordan. 28Amfe nai fainekat ma lekat lulut neu Nai Yosua. Muhelan in nekan nai, natuin in es of ana' ma antopu nonot nane he sin anlak noe ma sin natua pah le ho mit le nane.’
29Ma hit tamaika atbi anonof anbi kot Bet-Peor in aon bian.”
Currently Selected:
ULANGAN 3: AOZ
Highlight
Copy
Compare
Share
Want to have your highlights saved across all your devices? Sign up or sign in
