ULANGAN 2
2
1Namuni te hit atfani teu mnela snaen atnao tatuin lanan le an ali neu Tasi Akaba, onle Uisneno naplenat. A'lo le'uf hit atfun atbi pah nuaf Edom. 2Oke te Uisneno nakua a'an neu kau 3nak fun a'lo leufen hit atfun atbi bale nane. Es nane te hit mes het nao teu bian a'li. 4Nalali te Uisneno anlenu kau he fe neu ki lekat lulut i nak, ‘Ka lo fa anteni hi of amtam meu pah Edom, pah hi biaf sin, Nai Esau in sufan. Sin of namtausan ki, 5mes ka nabe'i fa hi amlaban sin, natuin na'ko sin pah an-ana mese amsa of Au ka fe ani fa neu ki, natuin pah Edom Au fe ulali neu Nai Esau in sufan. 6Hi nabe'i amsos mnahat ma mninut na'ko sin.’
7Mimnau nai onme hi Uisneno anfe nalali ki tetus anbi ale sa' le hi amtao ma anmo'e. In anpanat ma anpao ki leka hi amfun ale mnela le manuan i. In naneo ma nahafo ki anbi ton bo'ha in a'lon ma In anfe ale sa' le hi mami.
8Nalali te hit atnao piut, tasaitan lanan le anao natuin kot-kot Elat ma Ezion-Geber nao an ali Tasi Maten, oke te atbeo teu neno saen ton tasi at ali ale Mnela Moab. 9Uisneno nakua a'an neu kau nak, ‘Atoni Moab, Nai Lot in sufan, ka nabe'i fa he hi mile'un sin. Kais misel sin amsa. Pah Ar au fe ulali neu sin ma na'ko sin pah an-ana mese amsa of Au ka fe ani fa neu ki.’ ” (10Afi neno ahunut atoni Emim sin es natua pah Ar. Sin aoken anaek, papmese on atoni Enak, sin amsa atoni ao anaek on otu. 11On atoni Enak, sin amsa antek sin nak atoni Refaim, mes atoni Moab nakanab sin nak atoni Emim. 12Afi neno ahunut atoni Hori sin natua anbi Edom, mes Nai Esau in sufan anli'u sin ma nale'un sin, le namuni te antoko sin pah; onane amsa to Israel anbi neno namuni te anli'u sin musu-musu sin na'ko pah le Uisneno anfe nani neu sin.)
13“Namuni te hit atlak Noe Zered onle Uisneno naplenat nani neu kit. 14Nane anbol anbi ton bo'tenu am fanu leka hit tasaitan Kades-Barnea. Ale amakenat na'ko batan nane sin anmate ok-oke onle Uisneno naton nani. 15Uisneno anlaban sin piut-piut talantia namuni te sin namle'u ok-oke.
16-17Leka sin anmate nalali ok-oke, Uisneno nakua a'an neu kit nak, 18‘Neno le i hi amnao mituin pah Moab, amnao mok pah Ar. 19Ma hi amhaumak pah atoni Amon, Nai Lot in sufan. Kais hi mile'un sin ai amaken mok sin, fun na'ko pah le Au fe ulali neu sin, an-ana mese amsa of Au ka fe ani fa neu ki.’ ”
( 20Pah nane amsa mateka on pah Refaim, kanaf uf le afi natua anbi nane; atoni Amon nakanab sin nak atoni Zamzumim. 21Onle atoni Enak, sin amsa atoni le sin aoken anaek. Sin abe'it matani, ma sin namfau. Mes Uisneno nale'un sin, talantia atoni Amon sin antet nan pah nane, oke te sin natua anbi nane. 22Onane amsa Uisneno antao ma anmo'e neu atoni Edom, Nai Esau in sufan sin, le sin natua pah Nuaf Edom. Uisneno nale'un atoni Hori, talantia atoni Edom antet nan sin pah nane ma natua pah nane, oke te sin natua nabala anbi nane talantia muni i. 23Pah anbi Tasi Tnana in ninen atoni-atoni na'ko pah Kreta sin antoko nani. Sin nale'un nalali atoni Awi, kua-tuaf pah nane, oke te sin natua pah nane talantia bian a'ne'u kot Gaza in a'lon.)
24“Leka hit atfinin pah Moab, Uisneno nakua a'an neu kit nak, ‘Amnao nai esle' i amlak Noe Amon. Au of una'at neu ki Nai Sihon, kesel Amori le naplenat anbi Hesybon, bua'-bua' nok in pah. Amlaban in nai, ma amtoko nai in pah. 25Naubon na'ko neno le i Au of anmo'e ki ma uf-uf anbi me-me of sin namtausan ki. Atoni mese-mese of anlilitai ma namtau leka sin anen antom ki.’ ”
Israel sin nis ma anbe'u Kesel Nai Sihon
(Bil. 21:21-30)
26“Namuni te au sonu haef fauk-fauk na'ko mnela snaen Kedemot neu Kesel Nai Sihon na'ko Hesybon he natiaba han tola i: 27‘Mufetin kai he hai amnao mituin Usi ho pah. Hai of amnao amfini ma hai kam beo fa na'ko lanan anaek. 28Hai of ambaen mnahat le hai miah ma oe le hai minu. Hai al amlomi amnao mituin pah i, 29talantia hai amlak Noe Yordan hem tam meu pah le hai Uisneno anfe nani neu kai. Nai Esau in sufan sin le natua anbi Edom ma atoni Moab le natua anbi Ar amsa nafetin nalali kai he amnao mituin sin pah.’
30Mes Kesel Nai Sihon ka nafetin kit fa he atnao tatuin in pah nane. Hi Uisneno anmo'e in talantia in nanak fatu ma neku nisin he nati' hit tis ma atbe'u in. In pah hit fe tatua talantia neno i.
31Nalali te Uisneno nakua a'an neu kau nak, ‘Kesel Nai Sihon ma in pah Au una'at ani neu ki; maiti ma amtoko pah nane nai.’ 32Oke te Nai Sihon nok in to ok-oke sin nem hen maken nok kit anhaumak kot Yahas. 33Mes hit Uisneno nana'at in neu kit, oke te hit tis ma atbe'u in nok in anah-anah sin ma in to ok-oke. 34Anbi tabu nane amsa hit tasik ma tale'un taskuku ale in kot mese-mese, ma tamate ale in to ok-oke, atoni, bife, ma li'ana. Katit fa esle' hit tafetin sin hen moni. 35Sin mu'it sin hit taiti sin ma sin kot-kot sin hit tasik tani sin. 36Nok tuntakus hit Uisneno hit nabe'i tasik tan ale kot nane ok-oke, naubon na'ko Aroer, anbi Anonof Arnon in tu'an, ma kot anbi mnela nane atnanan, talantia pah Gilead. Katit fa kot le in baki lape nane mataen le'uf neu kit. 37Mes hit kat haumak fa pah atoni Amon ai Noe Yabok in ninen ai kot-kot anbi pah nuaf ai bale bian me amsa le hit Uisneno nakain.”
Currently Selected:
ULANGAN 2: AOZ
Highlight
Copy
Compare
Share
Want to have your highlights saved across all your devices? Sign up or sign in
