BILANGAN 29
29
Sihaulkononkon hatiha taon baru
(Ham. 23:23-25)
1“Di tanggal sada bulan pitu angkon marlagut do hamu maribadat, nada tola mangkarejohon barang aha pe. Di ari i angkon paluon ma angka sarune. 2Haulkon hamu ma haul situtungon tu Tuhan, i ma: sada lombu jantan, sada biri-biri jantan dohot pitu biri-biri na marumur sataon sudena i na so martihas. Uap ni haul i ma pajopkon roha ni Tuhan. 3Haulkon hamu ma haul gandum na dung nitontuhon, i ma topung na nicampur dohot miak zetun; tolu kilogram tu lombu jantan, dua kilogram tu biri-biri jantan, 4jana sakilogram tu ganop anak ni biri-biri. 5Lehenon muse ma sada hambeng jantan gabe haul hasesaan ni dosa. Di bagasan pangalaho na songon i ma patulusonmunu karejo hasesaan ni dosa ni na bahat i. 6Angka haul on ma na gabe tamba-tamba tu haul situtungon na dilehen rap dohot haul gandumna, di tanggal sada ganop bulan. Laing gabe tamba-tamba do i tu haul situtungon siganop ari na dilehen rap dohot haul gandum dohot haul aek ni anggurna. Uap ni angka haul sipanganon i pajopkon roha ni Tuhan.”
Sihaulkononkon di ari hasesaan ni dosa
(Ham. 23:26-32)
7“Di tanggal sampulu bulan pitu, angkon marlagut do hamu laho maribadat. Di ari i marpuaso ma hamu jana nada tola mangkarejohon barang aha pe. 8Haulkon hamu ma haul situtungon tu Tuhan, i ma: sada lombu jantan, sada biri-biri jantan jana pitu anak ni biri-biri jantan na marumur sataon, sudena i na so martihas. Uap ni haul i do pajop roha ni Tuhan. 9Haulkon hamu muse ma haul gandum songon na dung ditontuhon, i ma topung na dicampur dohot miak zetun, tolu kilogram tu lombu jantan, dua kilogram tu biri-biri jantan, 10jana sakilogram tu ganop anak ni biri-biri. 11Asing sian hambeng na dihaulkon di ari hasesaan ni dosa ni na bahat i, lehen hamu muse dope sada hambeng jantan gabe haul hasesaan ni dosa. Haul situtungon siganop ari rap dohot haul gandum dohot haul aek ni anggurna, angkon haulkonon muse do di ari i.”
Ari Pesta Undung-undung Bulung Rata
(Ham. 23:33-44)
12“Di tanggal lima bolas bulan pitu, angkon marlagut do hamu maribadat laho pasangap Tuhan. Pesta i angkon pestahononmunu pitu ari honokna. Salolot ni pesta i nada tola karejohononmunu barang aha pe. 13Di ari parjolo haulkon hamu ma tu Tuhan haul sipanganon, i ma tolu bolas lombu jantan jara-jara, dua biri-biri jantan, dohot opat bolas anak ni biri-biri jantan umur sataon, sudena i na so martihas. Uap ni haul i pajopkon roha ni Tuhan. 14Haulkon hamu muse ma haul gandum songon na dung ditontuhon, i ma topung na nicampur dohot miak zetun; tolu kilogram ganop lombu jantan, dua kilogram ganop biri-biri jantan, 15jana sakilogram tu ganop anak ni biri-biri. Rap dohot haul gandum i pasahat muse ma haul aek ni anggur sacukupna. 16Asing sian i angkon haulkononmunu sada hambeng jantan gabe haul hasesaan ni dosa. Haul i gabe tamba-tamba tu haul situtungon siganop ari rap dohot haul gandum dohot haul aek ni anggurna.
17Di ari paduahon haulkon hamu ma dua bolas lombu jantan na poso, dua biri-biri jantan dohot opat bolas anak ni biri-biri jantan na marumur sataon, sudena i na so martihas. 18-19Haulkon ma rap dohot i sude angka haul na asing na porlu tu ari parjolo.
20Di ari patoluhon haulkon hamu ma sabolas lombu jantan, dua biri-biri jantan, dohot opat bolas anak ni biri-biri jantan na marumur sataon sudena i na so martihas. 21-22Haulkon hamu muse ma rap dohot i sude angka haul na asing na hasaya tu ari parjolo.
23Di ari paopatkon haulkon hamu ma sampulu lombu jantan na poso, dua biri-biri jantan dohot opat bolas anak ni biri-biri jantan na marumur sataon sudena i na so martihas. 24-25Rap dohot i haulkon hamu muse ma sude angka haul na hasaya tu ari parjolo.
26Di ari palimahon haulkon hamu ma sambilan lombu jantan na poso, dua biri-biri jantan, dohot opat bolas anak ni biri-biri jantan na marumur sataon, sudena i na so martihas. 27-28Rap dohot i lehen hamu muse ma sude angka haul na asing na hasaya tu ari parjolo.
29Di ari paonomkon haulkon hamu ma salapan lombu jantan na poso, dua biri-biri jantan, dohot opat bolas anak ni biri-biri jantan na marumur sataon, sudena i na so martihas. 30-31Rap dohot i haulkon hamu muse ma sude angka haul na hasaya tu ari parjolo.
32Di ari papituhon haulkon hamu ma pitu lombu jantan na poso, dua biri-biri jantan, opat bolas anak ni biri-biri jantan na marumur sataon, sudena i na so martihas. 33-34Rap dohot i haulkon hamu muse ma sude angka haul na asing na hasaya tu ari parjolo.
35Di ari pasalapankon marlagut ma hamu maribadat jana nada tola mangkarejohon barang aha pe karejo di ari i. 36Haulkon ma tu Tuhan i sada haul situtungon na gabe haul sipanganon, i ma: sada lombu jantan na poso, sada biri-biri jantan dohot pitu anak ni biri-biri jantan na marumur sataon jana sudena i na so martihas. Uap ni haul i pajopkon roha ni Tuhan. 37-38Rap dohot i haulkon hamu muse ma sude angka haul na asing na hasaya tu ari parjolo.
39Songon i ma aturan taringot tu haul situtungon, haul gandum, haul aek ni anggur dohot haul haluaan na angkon pasahatonmunu tu Tuhan, di angka ari pesta na dung ditontuhon i. Haul on na gabe tamba-tamba do i tu angka haul na nipasahatmunu laho manggarar niet sanga gabe haul sian jop ni roha.”
40Dung i dilehen si Musa ma tu bangso Israel sude na niparentahon ni Tuhan i tusia.
Currently Selected:
BILANGAN 29: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
