BILANGAN 28
28
Silehen-lehen na dung nitontuhon
(Har. 29:38-46)
1Didok Tuhan ma tu si Musa. 2“Parentahon ma tu bangso Israel, anso tongtong diingot halahi manghaulkon haul sipanganon na pajob roha ni Tuhan, hombar tu hatiha na dung ditontuhon.”
3“Angka on ma haul sipanganon na angkon sihaulkononmunu tu Tuhan. Na gabe haul ganop ari, dua anak ni biri-biri jantan na marumur sataon na so martihas. 4Anak ni biri-biri na parjolo angkon dihaulkon manyogot jana na paduahon di potang ari. 5Ganop rap dohot anak ni biri-biri i angkon dilehen muse sakilogram topung dicampur dohot saliter miak zetun na dumenggan. 6On ma haul siganop ari na angkon sidung tutungon. Di Dolok Sinai do na parjolo situtu dihaulkon haul gabe haul sipanganon. Uap ni haul i pajopkon roha ni Tuhan. 7Rap dohot anak ni biri-biri na parjolo, angkon dilehen haul anggur saliter bahatna. Disiramkon ma aek ni anggur i tu ginjang langgatan. 8Potang ari haulkonon ma biri-biri na paduahon dos dohot haul manyogot i, rap dohot haul anggur. On pe gabe haul sipanganon do. Uap ni haul i pajopkon roha ni Tuhan.”
Sihaulkonon hatiha Ari Sabat
9“Di Ari Sabat angkon haulkononkon dua anak ni biri-biri marumur sataon na so martihas, dua kilogram topung na nicampur dohot miak zetun na gabe haul gandum dohot haul aek ni anggur. 10Haul situtungon i angkon dihaulkon ganop Ari Sabat songon tamba ni haul siganop ari rap dohot haul aek ni anggur.”
Sihaulkononkon di ari sada ganop bulan
11“Ganop bona ni bulan angkon haulkonon tu Tuhan haul situtungon, i ma: dua lombu jantan na poso, sada biri-biri jantan, pitu anak ni biri-biri jantan na marumur sataon, sudena i na so martihas. 12Na gabe haul gandum angkon dilehen topung na dicampur dohot miak zetun; ganop sada lombu jantan tolu kilogram topung, dua kilogram topung tu biri-biri jantan, 13jana sakilogram topung tu ganop sada anak ni biri-biri jantan. Haul situtungon on gabe haul sipanganon, jana uapna i pajopkon roha ni Tuhan. 14Di haul aek ni anggur angkon lehenon rap dohot haul situtungon i, na hasaya tusi: dua liter aek ni anggur ganop tu lombu jantan, sada satonga liter tu biri-biri jantan jana saliter tu ganop anak ni biri-biri. I ma aturan taringot tu haul situtungon na angkon lehenon di tanggal sada ganop bulan jana angkon baenon ganop taon. 15Songon tamba ni haul situtungon siganop ari dohot haul aek ni anggur, angkon laing lehenonmunu dope sada hambeng jantan gabe haul hasesaan ni dosa.”
Sihaulkononkon di Ari Pesta Roti Na So Marragi
(Ham. 23:5-14)
16“Di tanggal opat bolas bulan sada, angkon pestahononmunu do Pesta Paskah pasangapkon Tuhan. 17Di tanggal lima bolas mamungka ma ari pesta ugamo pitu ari honokna. Sahonok ni na pitu ari i, hum roti na so marragi do tola panganonmunu. 18Di ari parjolo Ari Pesta i angkon marpungu ma hamu maribadat, jana nada tola karejohononmunu barang aha pe. 19Lehen hamu ma haul situtungon na gabe haul sipanganon di Tuhan i, i ma: dua lombu jantan, sada biri-biri jantan dohot pitu anak ni biri-biri jantan na marumur sataon, sudena i na so martihas. 20Angkon haulkononmunu haul gandum, i ma: topung na marcampur dohot miak zetun: tolu kilogram topung tu ganop sada lombu jantan, dua kilogram tu ganop biri-biri jantan, 21jana sakilogram tu ganop anak ni biri-biri jantan. 22Lehen hamu muse ma sada hambeng jantan gabe haul hasesaan ni dosa. Marhite pangalaho na songon i ma hamu patuluskon karejo hasesaan ni dosa ni na bahat i. 23Sude haul on na gabe tamba-tamba tu haul situtungon manyogot na somal. 24Dos dohot i pangalahona angkon lehenonmunu tu Tuhan haul sipanganon pitu ari honokna. Tamba ni haul na somal di haul situtungon siganop ari do on rap dohot haul anggur. Uap ni haul i pajopkon roha ni Tuhan. 25Di ari papituhon marpungu ma hamu, jana nada tola mangkarejohon barang aha pe di ari i.”
Sihaulkononkon di Pesta Gotilon
(Ham. 23:15-22)
26“Di ari parjolo di Pesta Gotilon di hatiha mangalehen sabagian sian gandum na nisabi parjolo tu Tuhan, angkon marpungu do hamu maribadat, jana nada tola mangkarejohon barang aha pe. 27Lehen hamu ma haul situtungon, uapna i pajopkon roha ni Tuhan, i ma dua lombu jantan sada biri-biri jantan dung i pitu anak ni biri-biri jantan na marumur sataon jana na so martihas. 28Haul gandum na angkon lehenon, i ma topung na marcampur dohot miak zetun. Tolu kilogram tu ganop sada lombu jantan dua kilogram tu ganop biri-biri jantan 29jana sakilogram tu ganop anak ni biri-biri. 30Lehen hamu muse sada hambeng jantan na gabe haul hasesaan ni dosa. Dohot pangalaho na songon i ma hamu patuluskon karejo hasesaan ni dosa ni na bahat. 31Angka haul on rap dohot haul anggur na gabe tamba-tamba tu haul situtungon siganop ari do i dohot haul gandum.”
Currently Selected:
BILANGAN 28: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
