BILANGAN 26
26
Pamilangion na padua nolihon
1Dung salpu bala i didok Tuhan ma tu si Musa dohot tu si Eleasar anak ni si Harun, 2“Etongi hamu ma sude halak Israel marsasaompu. Sude halaklahi na marumur dua pulu taon tu ginjang na dung tarbaen masuk tentara angkon disuratkon.” 3-4Dipatulus si Musa dohot si Eleasar ma parenta i. Dipio halahi ma sude halaklahi, pungu-pungu sude na satorbang mangihutkon umurna. Dipalagut halahi ma di tano na hornop na di Moab, di bariba ni Batang aek Jordan donok tu Jeriko.
Angka on ma halak Israel na haruar sian Mesir i:
5Sian Marga Ruben (Si Ruben do anak siangkaan ni si Jakob): Marga Hanokh, Palu, 6Hesron dohot Karmi. 7Angka halaklahi sian marga-marga on bahatna 43.730 halak. 8Pomparan ni si Palu, i ma si Eliab, 9angka anakna, i ma si Nemuel, si Datan dohot si Abiram. (Anggo si Datan dohot si Abiram, na dung dipili bangso i do i nian. Tapi halahi do na dohot mangalo si Musa dohot si Harun na gabe satahi dohot dongan ni si Korah mangalo Tuhan. 10Tano i pe mabola jana talak ma mamondut halahi, mate ma halahi, si Kora dohot dongannia di na ro api manutung pola 250 halaklahi na mate i. Gabe parningotan ma i di halak Israel. 11Tapi anggo anak ni si Kora nada dohot dibunu.)
12Sian pomparan ni si Simeon marsasaompu: Marga Nemuel, Jamin, Jakin, 13Zerah dohot Saul. 14Angka halaklahi sian marga-marga on 22.200 halak bahatna.
15Pomparan ni si Gad marsasaompu: Marga Zefon, Hagi, Suni, 16Osni dohot Eri, 17Arod dohot Areli. 18Halaklahi sian marga-marga on 40.500 halak bahatna.
19Angka anak ni Juda i ma si Er dohot si Onan, na dung mate di tano Kanaan. 20Pomparan ni si Juda: Marga Sela, Peres dohot Zerah. 21Ia angka anak ni si Peres, si Hesron, haroroan ni Marga Hesron, dohot si Hamul, haroroan ni Marga Hamul. 22Angka halaklahi sian marga-marga on 76.500 halak bahatna.
23Sian Marga Isakar: Marga Tola, Pua, 24Jasub dohot Simron. 25Bahat ni halaklahi sian marga on 64.300 halak.
26Pomparan ni si Zebulon: Marga Sered, Elon dohot Jahleel. 27Angka halaklahi sian marga-marga on 60.500 halak bahatna.
28Sian si Josep amang ni dua halak halaklahi: Marga Manase dohot Efraim.
29Sian Marga Manase: Si Makir anak ni si Manase. I do amang ni si Gilead. Jana angka marga on i ma pomparan ni si Gilead: 30Marga Eser, Helek, 31Asriel, Sekem, 32Semida dohot Hefer. 33Si Zelafehad anak ni si Hefer nada adong anaknia halaklahi, hum dadaboru do. Goar-goar ni halahi, i ma: Si Mahla, si Noa, si Hogla, si Milka dohot si Tirsa. 34Angka halaklahi sian marga-marga on 52.700 halak bahatna.
35Pomparan ni si Efraim: Marga Sutelah, Beker dohot Tahan. 36Marga Eran, i ma pomparan ni si Sutelah. 37Angka halaklahi sian marga-marga on 32.500 halak bahatna. Songon i ma angka marga sian pomparan ni si Josep.
38Pomparan ni si Benyamin: Marga Bela, Asbel, Ahiram, 39Sefufam dohot Hufam. 40Marga Ared dohot Naaman i ma pomparan ni si Bela. 41Angka halaklahi sian marga-marga on 45.600 halak bahatna.
42Pomparan ni si Dan: Marga Suham. 43Bahat ni halaklahi sian marga on 64.400 halak bahatna.
44Pomparan ni si Aser: Marga Jimna, Jiswi dohot Beria. 45Marga Heber dohot Malkiel i ma pomparan ni si Beria. 46Sada do boru ni si Aser goarna si Serah. 47Angka halaklahi sian marga-marga on 53.400 halak bahatna.
48Pomparan ni si Naftali: Marga Jahseel, Guni, 49Jeser dohot Silem. 50Angka halaklahi sian marga-marga on 45.400 halak bahatna.
51Bahat ni halaklahi di sude halak Israel 601.730 halak.
52Didok Tuhan tu si Musa, 53“Bagi-bagi ma tano i tu halak Israel marsasaompu marguru tu bahat ni halahi marsasaompu. 54-56Baen ma dadu laho mambagi tano i. Lehen ma tano na umbidang tu ompu na umbahat bope bagian na ummenek tu saompu na ummotik.”
57Pomparan ni si Levi i ma Marga Gerson, Kehat dohot Merari. 58Tu bagasan pomparan ni halahi tarmasuk horong ni Marga Libni, Hebron, Mahli, Musi dohot Kora. Si Kehat i ma amang ni si Amram, 59na mardongan saripehon sada boru Levi. Dadaboru i margoar si Jokebed na sorang di Mesir do i. Anaknia dohot si Amram dua halaklahi i ma si Musa dohot si Harun dohot sada anak dadaboru na margoar si Miryam. 60Opat anak ni si Harun, i ma si Nadab dohot si Abihu, si Eleasar dohot si Itamar. 61Si Nadab dohot si Abihu na mate di hatiha manghaulkon api na so nihagiotan ni Tuhan. 62Bahat ni anak halaklahi sian Marga Levi na marumur sabulan sanga lobi adong do 23.000 halak. Asing do halahi disuratkon sian halak Israel i, angke nada dilehen di halahi tano siteanon ni Israel i.
63Songon i ma daftar na nibaen ni si Musa dohot si Eleasar taringot tu marga-marga ni Israel dompak dibaen halahi pamilangion di tano na hornop ni Moab di bariba ni Batang aek Jordan mardonokkon Jeriko. 64Sian halak na nidaftar ni si Musa dohot si Harun na di Parhorsihan Sinai i, sahalak pe nada adong be na mangolu. 65Madung didok Tuhan i hian do tu halahi bahaso angkon marujung di halongonan do ngolu ni halahi. Jana tutu do sude halahi mate, asing ni si Kaleb anak ni si Jefunne dohot si Josua anak ni si Nun.
Currently Selected:
BILANGAN 26: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
