BILANGAN 25

Halak Israel di Dolok Peor

1Dompak marbandar halak Israel di Rura Sittim, mamungka ma adong na marcampur sian angka halaklahi dohot angka boru Moab na adong disi. 2Dioban angka dadaboru i ma halahi tu angka pesta, marhaul laho pasangapkon Debata Moab. Dipangan halak Israel ma panganon i jana dohot halahi manyomba Baal, debata 3di Dolok Peor. Jadi gabe muruk ma Tuhan tu halahi 4didok ma tu si Musa, “Palagut ma sude pamimpin ni Israel, dung i bunu ma halahi di jolo ni halak na bahat i gabe hatutulus ni parentangKu, anso mintop murukKu tu bangso on.” 5Dung i didok si Musa ma tu sude pamimpin ni Israel, “Ganop hamu angkon mamunu angka jolma sian margamunu na dung manyomba Baal-Peor.”

6Dompak tumatangis si Musa dohot na bahat i di pintu ni Bandar Parmianan Ni Tuhan, diida halahi ma sahalak Israel maroban sada boru Midian masuk tu bandarna. 7Hatiha diida si Pinehas anak ni si Eleasar pahompu ni si Harun na masa i, kehe ma ia, ditinggalkon ia parpunguan i. Dung i dibuat ia sada hujur, 8kehe ia paihut-ihut halaklahi dohot dadaboru i masuk tu bandar. Dung i dijujarkon ia ma hujur i tu halahi na dua rap hona halahi na dua. Dung songon i mantak ma bala na jorbut i di Israel. 9Tapi hatiha i mate do 24.000 halak.

10Dung i didok Tuhan ma tu si Musa, 11“Nada tahan si Pinehas mida halak Israel manyomba debata na asing, dibalik ni Au. Hara ni i nada muruk be Au tu halak Israel, antahonKu ma mamusa halahi. 12Jadi paboa ma tu si Pinehas, giot baenonKu parjanjian dohot ia ro di salolot-lolotna. 13Ia dohot pomparannia ditotopkon ma gabe malim sapanjangna, hara ni na so tartahan ia mida halak na manyomba debata sileban dibalik ni Au. Hara ni i sesaonKu ma dosa ni Israel.”

14Goar ni halak Israel na dibunu rap dohot boru Midian i, i ma si Zimri, anak ni si Salu pamimpin ni sada ompu sian Marga Simeon. 15Goar ni daboru i, i ma si Kosbi boru ni si Zur, i ma pamimpin sian sada bagian marga di Midian.

16Dilehen Tuhan ma parenta on tu si Musa, 17“Porangi ma halak Midian, pusa ma halahi 18hara ni hajahatan na nibaen ni halahi paoto-oto hamu di Peor, jana hara ni si Kosbi na dung dibunu i hatiha masa bala na di Peor i.”

Currently Selected:

BILANGAN 25: LAIAKB

Highlight

Copy

Compare